Ti Calling-ko kas Presidente ti Relief Society
Dagiti Pagrebbengan
Agyamyaman ti Apo iti kinatallugodmo nga agserbi iti Simbaanna. Iti baba ti pakagupgopan dagiti pagrebbengam para iti calling-mo.
Panggep ti Relief Society
Ti Relief Society ket maysa a nadiosan a naipasdek nga organisasion para kadagiti amin a nataengan a babbai iti Simbaan. Tumulong ti Relief Society kadagiti annak ti Dios nga agsagana nga agsubli iti imatangna. Insuro ni Propeta Joseph Smith a ti panggep ti Relief Society ket “mangisalakan kadagiti kararua ken mangpabang-ar iti panagsagaba”—a mangipapaay iti tulong ti Mangisalakan (kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 9.1).
Presidente ti Relief Society
Ti presidente ti Relief Society ti mangidaulo kadagiti panangkagumaan a makiraman iti aramid ti pannakaisalakan ken pannakaitan-ok. Agserbi isuna a kas miembro ti konseho ti ward ken, babaen ti panangiwanwan ti bishop, makiuman kadagiti nataengan a miembro ti ward. Isu pay ti mangimaton kadagiti rekord, report, ken pakaseknan iti kuarta (kitaen iti 9.3.2.2).
Panguluen
Ti presidente ken dagiti mamagbagana ti mangimaton kadagiti ministering sister, panangisuro iti Domingo, ken dagiti aktibidad. Isuroda kadagiti kakabsat a babbai kadagiti pagrebbenganda iti katulagan, mangisagana kadagiti agtutubo a babbai a makiraman iti Relief Society, ken mangitunos kadagiti panagkagumaan a mangpapigsa kadagiti young adult a kakabsat a babbai (kitaen iti 9.4). Regular nga agmiting ti panguluen ti Relief Society ken secretary (kitaen iti 9.3.2.3).
Panangidaulo ken dagiti Konseho
Agplano dagiti lider ti Relief Society kadagiti miting iti Domingo, akitibidad, ministering, serbisio, ken dadduma pay a pannakilangen tapno maipaayan dagiti babbai kadagiti padas iti aramid ti Dios iti pannakaisalakan ken pannakaitan-ok. Agkaykaysa nga agtrabaho dagiti miembro ti Relief Society ken korum dagiti elder (kitaen iti 9.2).
Relief Society ken Korum dagiti Elder
Dagiti panguluen ti Relief Society ken korum dagiti elder ti mangitunos kadagiti ministering assignment ken tumulongda a mangidaulo iti aramid iti templo ken family history ken panagkagumaan a mangawis iti amin nga umawat kadagiti bendision ti ebanghelio. Addaanda pay iti kangrunaan nga akem iti panangisuro kadagiti miembro ti ward kadagiti pagbatayan ti panagminister kadagiti agkasapulan, panagbiag iti linteg ti panagayuno, panangbangon iti panagpannuray iti bagi, ken panangpadur-as iti bukod ken sangapamiliaan a kinamanagsagana (kitaen iti 22.6.2).
Dagiti Miting iti Domingo
Agmimiting dagiti Relief Society iti maikadua ken maikapat a Domingo nga addaan panggep a mangpapigsa iti pammati ken ni Jesucristo, mangbangon iti panagkaykaysa, ken mangpapigsa kadagiti pamilia ken pagtaengan. Mangrugi dagiti miting iti kararag ken mangiraman iti oras para iti panagiinnuman ken panangisuro ken panaglilinnawag iti ebanghelio a maibatay kadagiti kallabes a mensahe iti komperensia (kitaen iti 9.2.1.2).
Serbisio ken dagiti Aktibidad
Mabalin a planuen dagiti presidente ti Relief Society dagiti aktibidad a mangpapigsa iti pammati dagiti kakabsat a babbai ken ni Jesucristo, mangpadakkel iti tarigagayda nga agaramid ken agtungpal kadagiti katulagan, ken mangted kadakuada kadagiti gundaway nga agtitinnulong nga agserbi. Ti presidente ti mangimaton kadagitoy nga aktibidad ken mabalinna nga idawat iti maysa a mamagbaga wenno sabali pay a kabsat a babai tapno mangidaulo iti panagplano ken panangipatungpal kadagitoy (kitaen iti 9.2.1.3).
Dagiti Mainayon a Calling
Paglinnawagan ti bishop ken ti presidente ti Relief Society ti panagkasapulan para kadagiti mainayon a calling. Iraman dagitoy dagiti mannursuro, dagiti service coordinator, dagiti activity coordinator, dagiti assistant ken miembro ti committee, dagiti assistant secretary, ken dagiti ministering secretary. Kas kasapulan, mabalin ti panguluen ti mangdutok kadagiti kakabsat a babbai tapno tumulong kadagiti panangkagumaan ti Relief Society iti dadduma pay a wagas (kitaen iti 9.3.4).
Dagiti Mainayon a Pangiwanwan ken Annuroten
Masarakan dagiti nayon a pangiwanwan ken annuroten iti benneg 9.6 ti Sapasap a Handbook.