Lin b’oqb’al jo’ awa’b’ej re li Komonil re Tenq’ank

Li k’a’ru teneb’anb’il

Nasaho’ xch’ool li Qaawa’ naq wan aach’ool chi k’anjelak sa’ lix Iglees a’an. Rub’el a’in wan jun xtusulal li k’a’ru teneb’anb’il sa’ laa b’oqb’al.

Li rajom li Komonil re Tenq’ank

Li Komonil re Tenq’ank a’an jun ch’uut xaqab’anb’il xb’aan li choxa choq’ reheb’ chixjunileb’ li ixq sa’ li Iglees. Li Komonil re Tenq’ank naxtenq’aheb’ li ralal xk’ajol li Dios chixkawresinkil rib’ re sutq’iik rik’in a’an. Li profeet aj Jose Smith kixk’ut naq li rajom li Komonil re Tenq’ank a’an re “xkolb’aleb’ li aamej ut xk’osb’al li rahilal”—xk’eeb’al li tenq’ li naxk’e li Kolonel (chi’ilmanq K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 9.1).

Awa’b’ej re li Komonil re Tenq’ank

Li awa’b’ej re li Komonil re Tenq’ank naxjolomiheb’ li k’anjel re tz’aqonk sa’ lix k’anjel li Dios re li kolb’a-ib’ ut li taqenaqil loq’al. A’an nak’anjelak jo’ komon sa’ li ch’uut re teep ut, chi b’eresinb’il xb’aan li obiisp, naxk’e xna’leb’eb’ li komon ninq re li teep. A’an naxb’eresi ajwi’ li tz’iib’anb’il esil, ut chan ru na’oksiman li tumin (chi’ilmanq 9.3.2.2).

Li awa’b’ejil

Li awa’b’ej ut eb’ laj tenq’ aj k’ehol na’leb’ neke’xb’eresiheb’ laj ilol komon ixq, li k’utuk sa’ domingo, ut eb’ li kok’ k’anjel. Neke’xk’ut chiruheb’ li komon ixq k’a’ru lix teneb’ankileb’ sa’eb’ lix sumwank, neke’xkawresiheb’ li saaj ixq chi tz’aqonk sa’ li Komonil re Tenq’ank, ut neke’xb’eresi li k’anjel re xkawob’resinkileb’ li ixq toj saajeb’ (chi’ilmanq 9.4). Li awa’b’ejil re li Komonil re Tenq’ank ut laj tz’iib’anel neke’xch’utub’ rib’ chi kok’ aj xsa’ (chi’ilmanq 9.3.2.3).

Li b’eresink ut eb’ li jolomil ch’uut

Eb’ laj jolominel sa’ li Komonil re Tenq’ank neke’xk’uub’eb’ li ch’utam re domingo, li kok’ k’anjel, li ilok komon, li k’anjelak chiru as iitz’inb’ej, ut xkomon chik li k’anjel re xtenq’ankileb’ li ixq chi tz’aqonk sa’ lix k’anjel li Dios re li kolb’a-ib’ ut li taqenaqil loq’al. Eb’ li komon sa’ li Komonil re Tenq’ank ut sa’ lix molameb’ li xb’eenil neke’k’anjelak sa’ komonil (chi’ilmanq 9.2).

Li Komonil re Tenq’ank ut lix molameb’ li xb’eenil

Eb’ li awa’b’ejil re li Komonil re Tenq’ank ut lix molameb’ li xb’eenil neke’xb’eresiheb’ sa’ komonil li k’anjel re ilok komon ut neke’tenq’an chixjolominkil li k’anjel re li santil ochoch ut li resilal li junkab’al, ut li k’anjel re xb’oqb’aleb’ chixjunileb’ chixk’ulb’aleb’ li rosob’tesihom li evangelio. Jo’kan ajwi’, aajel ru xk’anjeleb’ re xtzolb’aleb’ li komon re li teep chirix xtenq’ankileb’ li wankeb’ rajom ru, xyu’aminkil li chaq’rab’ re li kuyuk sa’, rilb’al rib’ chi us, ut xkawresinkileb’ li komon ut li junkab’al (chi’ilmanq 22.6.2).

Eb’ li ch’utam re domingo

Eb’ li Komonil re Tenq’ank neke’xch’utub’ rib’ chiru li xkab’ ut li xkaa domingo re li po, re xnimob’resinkil li paab’aal chirix li Jesukristo, re xkawob’resinkil li junajil, ut re xkawresinkileb’ li junkab’al ut li ochoch. Li ch’utam natikla rik’in tijok ut wan li hoonal re k’uub’ank na’leb’ sa’ komonil ut tzolok ut aatinak chirix li evangelio rik’in li na’leb’ yeeb’il sa’ li jolomil ch’utub’aj-ib’ xnume’ (chi’ilmanq 9.2.1.2).

Li k’anjelak chiru as iitz’inb’ej ut eb’ li kok’ k’anjel

Eb’ li awa’b’ejil re li Komonil re Tenq’ank naru neke’xk’uub’eb’ li kok’ k’anjel re xkawob’resinkil lix paab’aaleb’ li ixq chirix li Jesukristo, re xnimob’resinkil li rajomeb’ chixk’ulb’al ut chixpaab’ankileb’ li sumwank, ut re xtenq’ankileb’ chi k’anjelak sa’ komonil. Li awa’b’ej naxjolomiheb’ li kok’ k’anjel ut naru naxpatz’ re jun aj tenq’ aj k’ehol na’leb’ malaj jalan chik li komon ixq naq tixk’uub’eb’ ut tixb’eresiheb’ li k’anjel (chi’ilmanq 9.2.1.3).

Xkomoneb’ chik li b’oqok

Li obiisp ut li awa’b’ej re li Komonil re Tenq’ank neke’aatinak chirix xkomoneb’ chik li b’oqok li neke’ajman ru. Naru naq a’anaqeb’ laj k’utunel, laj b’eresinel re li k’anjelak chiru as iitz’inb’ej, laj b’eresinel reheb’ li kok’ k’anjel, eb’ laj tenq’ ut komon sa’eb’ li ch’uut, laj tenq’ re laj tz’iib’anel, ut laj tz’iib’anel re li k’anjel re ilok komon. Wi na’ajman ru, li awa’b’ejil naru naxk’e xtaqlankileb’ li komon ixq chi tenq’ank sa’ k’iila paay ru rik’in xk’anjel li Komonil re Tenq’ank (chi’ilmanq 9.3.4).

Li b’eresink ut li chaq’rab’ink

Naru natawman xkomon chik li chaq’rab’ink chirix li Dominkil Tzoleb’aal sa’ li tasal 9.6 re li Jolomil K’anjenel Hu.