Ko Hoku Uiuiʻi ko ha Palesiteni ʻo e Fineʻofá

Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ʻi ho uiuiʻí.

Taumuʻa ʻo e Fineʻofá

Ko e Fineʻofá ko ha faʻunga fakalangi ia kuo fokotuʻu maʻá e houʻeiki fafine lalahi kotoa ʻi he Siasí. ʻOku tokoni ʻa e Fineʻofá ke teuteu ʻa e fānau ʻa e ʻOtuá ke nau foki ki Hono ʻaó. Naʻe akoʻi ʻe he Palōfita ko Siosefa Sāmitá, ko e taumuʻa ʻo e Fineʻofá ke “fakahaofi e ngaahi laumālié pea mo fakafiemālieʻi ʻa e faingataʻaʻiá”—ʻi hono fakahoko ʻa e tokoni ʻa e Fakamoʻuí (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 9.1).

Palesiteni Fineʻofá

ʻOku tataki ʻe he palesiteni ʻo e Fineʻofá ʻa e ngaahi ngāue ke kau ʻi he ngāue ʻa e ʻOtuá ki he fakamoʻuí mo e hākeakiʻí. ʻOkú ne hoko ko ha mēmipa ʻo e fakataha alēlea ʻo e uōtí, pea ʻe fealeaʻaki mo e kāingalotu lalahi ʻo e uōtí, ʻo fakatatau mo e fakahinohino ʻa e pīsopé. Te ne tokangaʻi foki mo e ngaahi lekōtí, lipōtí, mo e ngaahi meʻa fakapaʻangá (vakai, 9.3.2.2).

Kau Palesitenisií

ʻOku tokangaʻi ʻe he palesitení mo hono ongo tokoní ʻa e kau fafine ngāue fakaetauhí, fakahinohino ʻi he Sāpaté, pea mo e ngaahi ʻekitivitií. ʻOku nau akoʻi ʻa e houʻeiki fafiné ʻi honau ngaahi fatongia ʻo e fuakavá, teuteuʻi ʻa e kau finemuí ke kau ʻi he Fineʻofá, mo fakafekauʻaki ʻa e ngaahi ngāue ki hono fakamālohia ʻo e kau fafine lalahi kei talavoú (vakai, 9.4). ʻE fakataha maʻu pē ʻa e kau palesitenisī ʻo e Fineʻofá pea mo e sekelitalí (vakai 9.3.2.3).

Tuʻunga Fakatakimuʻá mo e Ngaahi Fakataha Alēleá

ʻE palani ʻe he kau taki ʻo e Fineʻofá ʻa e ngaahi fakataha ʻo e Sāpaté, ngaahi ʻekitivitií, ngāue fakaetauhí, ngāue tokoní, pea mo ha toe ngaahi fengāueʻaki kehe pē ke tokoniʻi ʻa e houʻeiki fafiné ʻi heʻenau ngaahi aʻusia ʻi he ngāue ʻa e ʻOtuá ki he fakamoʻuí mo e hākeakiʻí. ʻE ngāue ʻa e kau mēmipa ʻo e Fineʻofá mo e kōlomu ʻo e kaumātuʻá ʻi he uouangataha (vakai, 9.2).

Fineʻofá mo e Kōlomu Kaumātuʻá

ʻOku fakafekauʻaki ʻe he kau palesitenisī ʻo e Fineʻofá mo e kōlomu ʻo e kaumātuʻá ʻa e ngaahi ngāue fakaetauhí mo tokoni ke tataki ʻa e ngāue fakatemipalé mo e hisitōlia fakafāmilí pea mo e ngaahi ngāue ke fakaafeʻi ʻa e taha kotoa ke maʻu ʻa e ngaahi tāpuaki ʻo e ongoongoleleí. ʻOku ʻi ai foki honau fatongia mahuʻinga ʻi hono akoʻi ʻo e kāingalotu ʻo e uōtí ki he ngaahi tefitoʻi moʻoni ʻo e ngāue fakaetauhi kiate kinautolu ʻoku faingataʻaʻiá, moʻui ʻaki ʻa e fono ʻo e ʻaukaí, langaki ʻa e moʻui fakafalala pē kiate kitá, mo hono fakatupulaki ʻo e mateuteu fakataautaha mo fakafāmilí (vakai, 22.6.2).

Ngaahi Fakataha ʻi he Sāpaté

ʻOku fakataha ʻa e Kau Fineʻofá ʻi he Sāpate uá mo e faá mo ha taumuʻa ke fakatupulaki ʻa e tui kia Sīsū Kalaisí, langaki ʻa e uouangatahá, mo fakamālohia e fāmilí mo e ʻapí. ʻOku kamata e ngaahi fakatahá ʻaki ha lotu pea fakakau ai ha taimi ki he fealēleaʻaki fakatahá mo hono akoʻi mo aleaʻi ʻo e ongoongoleleí ʻo fakatefito ʻi he ngaahi lea ʻo e konifelenisi fakamuimuitahá (vakai, 9.2.1.2).

Ngāue Tokoní mo e Ngaahi ʻEkitivitií

ʻE lava ke palani ʻe he kau palesitenisī ʻo e Fineʻofá ha ngaahi ʻekitivitī ke fakamālohia ai ʻa e tui ʻa e houʻeiki fafiné kia Sīsū Kalaisí, fakatupulaki ʻenau holi ke fakahoko mo tauhi ʻa e ngaahi fuakavá, mo ʻoange ha ngaahi faingamālie ke nau ngāue fakataha ai. ʻOku tokangaʻi ʻe he palesitení ʻa e ngaahi ʻekitivitī ko ʻení pea malava ke ne kole ki ha tokoni pe ko ha fefine ʻe taha ke ne tataki hono palaniʻí mo hono fakahokó (vakai, 9.2.1.3).

Ngaahi Uiuiʻi Kehe

ʻE aleaʻi ʻe he pīsopé mo e palesiteni ʻo e Fineʻofá ʻa e fiemaʻu ko ia ha ngaahi toe uiuiʻi makehé. ʻOku kau heni ʻa e kau faiakó, kau kouʻotineita ngāue tokoní, kau kouʻotineita ʻo e ngaahi ʻekitivitií, kau ʻasisiteni mo e kau mēmipa ʻo e kōmití, kau tokoni sekelitalí, mo e kau sekelitali ngāue fakaetauhí. ʻO ka fiemaʻu, ʻe lava pē ke vahe ʻe he kau palesitenisií ha kau fefine ke tokoni ʻi ha ngaahi founga kehe ki he ngaahi ngāue ʻa e Fineʻofá (vakai, 9.3.4).

Ngaahi Fakahinohinó mo e Ngaahi Tuʻutuʻuní

ʻOku maʻu ha toe ngaahi fakahinohino mo ha ngaahi tuʻutuʻuni ʻi he konga 9.6 ʻo e Tohi Tuʻutuʻuni Fakakātoá.