Mga Responsibilidad

Ang Ginoo mapasalamaton alang sa imong kaandam nga moserbisyo sa Iyang Simbahan. Sa ubos mao ang kinatibuk-ang pagpasabot sa mga responsibilidad sa imong calling.

Katuyoan sa Relief Society

Ang Relief Society usa ka balaang gitukod nga organisasyon alang sa tanang hamtong nga mga babaye diha sa Simbahan. Ang Relief Society motabang sa mga anak sa Dios nga mangandam aron makabalik ngadto sa Iyang presensya. Si Propeta Joseph Smith mitudlo nga ang katuyoan sa Relief Society mao ang “pagluwas sa mga kalag ug paghupay sa nag-antos”—naghatag og kahupayan sa Manluluwas (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 9.1).

Secretary

Ang kapangulohan sa Relief Society ug ang secretary magmiting kanunay (tan-awa sa 9.3.2.3). Ang mga responsibilidad sa secretary mahimong maglakip sa pag-andam og mga agenda ug pagsulat sa mga gihisgotan diha sa mga miting, pagsubay sa mga buluhaton, pag-eskedyul og mga interbiyo sa pagpangalagad, pagtipig og lista sa nanambong [attendance], pagsumiter og mga report, pagtabang sa pag-andam og tinuig nga badyet, ug pagsubay sa mga gasto (tan-awa sa 9.3.3). Mahimong motawag og kaabag nga mga secretary ug usa ka tigpangalagad nga secretary aron motabang sa secretary (tan-awa sa 9.3.4).

Pagpangulo ug mga Konseho

Ang mga lider sa Relief Society magplano og mga miting sa Dominggo, mga kalihokan, pagpangalagad, pagserbisyo, ug ubang mga inter-aksiyon aron mahatagan ang mga babaye og mga kasinatian sa buhat sa Dios sa kaluwasan ug kahimayaan. Ang mga sakop sa Relief Society ug korum sa mga elder molihok nga magkahiusa (tan-awa sa 9.2).

Mga Miting sa Dominggo

Ang mga Relief Society magmiting sa ikaduha ug ikaupat nga mga Dominggo uban ang katuyoan sa pagpalambo sa hugot nga pagtuo diha ni Jesukristo, pag-ugmad og panaghiusa, ug paglig-on og mga pamilya ug mga panimalay. Ang mga miting sugdan sa pag-ampo ug maglakip og panahon alang sa pagtinambagay ug panudlo ug panaghisgotan sa ebanghelyo base sa bag-ohay nga mga pakigpulong sa kinatibuk-ang komperensiya (tan-awa sa 9.2.1.2).

Serbisyo ug mga Kalihokan

Ang mga kapangulohan sa Relief Society mahimong magplano og mga kalihokan nga makapalig-on sa hugot nga pagtuo sa mga sister diha kang Jesukristo, magpalambo sa ilang tinguha sa paghimo ug pagsunod sa mga pakigsaad, ug maghatag kanila og mga oportunidad sa pagserbisyo og dungan. Ang presidente modumala niini nga mga kalihokan ug mahimong mohangyo og magtatambag o laing sister nga maoy mangulo sa pagplano ug sa pagpahigayon niini (tan-awa sa 9.2.1.3).

Mga Lagda ug mga Palisiya

Dugang nga mga lagda ug mga palisiya makit-an diha sa seksiyon 9.6 sa Kinatibuk-ang Tamdanan nga Basahon.