Li k’a’ru teneb’anb’il

Nasaho’ xch’ool li Qaawa’ naq wan aach’ool chi k’anjelak sa’ lix Iglees a’an. Rub’el a’in wan jun xtusulal li k’a’ru teneb’anb’il sa’ laa b’oqb’al.

Li rajom li Komonil re Tenq’ank

Li Komonil re Tenq’ank a’an jun ch’uut k’uub’anb’il sa’ choxahilal choq’ reheb’ chixjunileb’ li ixq sa’ li Iglees. Li Komonil re Tenq’ank naxtenq’aheb’ li ralal xk’ajol li Dios chixkawresinkil rib’ re sutq’iik rik’in a’an. Li profeet aj Jose Smith kixk’ut naq li rajom li Komonil re Tenq’ank a’an re “xkolb’aleb’ li aamej ut xk’osb’al li rahilal”—xk’eeb’al li tenq’ li naxk’e li Kolonel (chi’ilmanq K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 9.1).

Laj tz’iib’anel

Li awa’b’ejil re li Komonil re Tenq’ank ut laj tz’iib’anel neke’xch’utub’ rib’ chi kok’ aj xsa’ (chi’ilmanq 9.3.2.3). Teneb’anb’il sa’ xb’een laj tz’iib’anel xkawresinkil xtusulaleb’ li ch’utam ut xtz’iib’ankil resil li nayeeman, xk’eeb’al reetal ani k’eeb’il xtaqlankil, xxaqab’ankil xhoorileb’ li xq’axtesinkil li esil chirix rilb’aleb’ li komon, rajlankileb’ li neke’wulak sa’eb’ li ch’utam, xtaqlankileb’ li tz’iib’anb’il esil, tenq’ank sa’ xk’uub’ankil chan ru taa’oksimanq li tumin chiru li chihab’, ut xk’eeb’al reetal chan ru na’oksiman li tumin (chi’ilmanq 9.3.3). Naru neke’b’oqman aj tenq’ choq’ re laj tz’iib’anel ut jun aj tenq’ choq’ re li k’anjel re ilok komon re xtenq’ankil laj tz’iib’anel (chi’ilmanq 9.3.4).

Li b’eresink ut eb’ li jolomil ch’uut

Eb’ laj jolominel sa’ li Komonil re Tenq’ank neke’xk’uub’eb’ li ch’utam re domingo, li kok’ k’anjel, li ilok komon, li k’anjelak chiru as iitz’inb’ej, ut xkomon chik li k’anjel re xtenq’ankileb’ li ixq chi tz’aqonk sa’ lix k’anjel li Dios re li kolb’a-ib’ ut li taqenaqil loq’al. Eb’ li komon sa’ li Komonil re Tenq’ank ut sa’ lix molameb’ li xb’eenil neke’k’anjelak sa’ komonil (chi’ilmanq 9.2).

Eb’ li ch’utam re domingo

Eb’ li Komonil re Tenq’ank neke’xch’utub’ rib’ chiru li xkab’ ut li xkaa domingo re li po, re xnimob’resinkil li paab’aal chirix li Jesukristo, re xkawob’resinkil li junajil, ut re xkawresinkileb’ li junkab’al ut li ochoch. Li ch’utam natikla rik’in tijok ut wan li hoonal re k’uub’ank na’leb’ sa’ komonil ut tzolok ut aatinak chirix li evangelio rik’in li na’leb’ yeeb’il sa’ li jolomil ch’utub’aj-ib’ xnume’ (chi’ilmanq 9.2.1.2).

Li k’anjelak chiru as iitz’inb’ej ut eb’ li kok’ k’anjel

Eb’ li awa’b’ejil re li Komonil re Tenq’ank naru neke’xk’uub’eb’ li kok’ k’anjel re xkawob’resinkil lix paab’aaleb’ li ixq chirix li Jesukristo, re xnimob’resinkil li rajomeb’ chixk’ulb’al ut chixpaab’ankileb’ li sumwank, ut re xtenq’ankileb’ chi k’anjelak sa’ komonil. Li awa’b’ej naxjolomiheb’ li kok’ k’anjel ut naru naxpatz’ re jun aj tenq’ aj k’ehol na’leb’ malaj jalan chik li komon ixq naq tixk’uub’eb’ ut tixb’eresiheb’ li k’anjel (chi’ilmanq 9.2.1.3).

Li b’eresink ut li chaq’rab’ink

Naru natawman xkomon chik li chaq’rab’ink chirix li Dominkil Tzoleb’aal sa’ li tasal 9.6 re li Jolomil K’anjenel Hu.