Ngaahi Fatongiá

ʻOku houngaʻia ʻa e ʻEikí ʻi hoʻo loto fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki hoʻo uiuiʻí.

Taumuʻa ʻo e Fineʻofá

Ko e Fineʻofá ko ha faʻunga fakalangi kuo fokotuʻu maʻá e kakai fefine lalahi kotoa ʻi he Siasí. ʻOku tokoni ʻa e Fineʻofá ke teuteuʻi ʻa e fānau ʻa e ʻOtuá ke nau foki ki Hono ʻaó. Naʻe akoʻi ʻe he Palōfita ko Siosefa Sāmitá ko e taumuʻa ʻo e Fineʻofá ke “fakahaofi ʻa e ngaahi laumālié mo fakafiemālieʻi ʻa e faingataʻaʻiá”—ʻo ʻomi ʻa e tokoni ʻa e Fakamoʻuí (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 9.1).

Sekelitali

ʻE fakataha maʻu pē ʻa e kau palesitenisī ʻo e Fineʻofá pea mo e sekelitalí (vakai, 9.3.2.3). ʻE lava ke kau ʻi he ngaahi fatongia ʻo e sekelitalí ʻa hono teuteu ʻo e ngaahi ʻasenitá mo hono hiki ʻo e ngaahi fakamatala ʻi he ngaahi fakatahá, muimuiʻi ʻo e ngaahi ngāue naʻe vahé, fakataimi-tēpileʻi ʻo e ngaahi ʻinitaviu ngāue fakaetauhí, tauhi ʻo e maʻulotú, fakahū ʻo e ngaahi lipōtí, tokoni ʻi hono teuteu ha patiseti fakataʻu, mo muimuiʻi ʻa e ngaahi fakamolé (vakai, 9.3.3). ʻE lava ke uiuiʻi ha kau tokoni sekelitali mo ha sekelitali ngāue fakaetauhi ke tokoni ki he sekelitalí (vakai, 9.3.4).

Tuʻunga Fakatakimuʻá mo e Ngaahi Fakataha Alēlea

ʻE palani ʻe he kau taki ʻo e Fineʻofá ʻa e ngaahi fakataha ʻo e Sāpaté, ngaahi ʻekitivitií, ngāue fakaetauhí, ngāue tokoní, pea mo ha toe ngaahi fengāueʻaki pē ke tokoniʻi ʻa e houʻeiki fafiné ke nau kau ʻi he ngāue ʻa e ʻOtuá ki he fakamoʻuí mo e hakeakiʻí. ʻE ngaue ʻa e kau mēmipa ʻo e Fineʻofá mo e kōlomu ʻo e kaumātuʻá ʻi he uouangataha ke fakahoko ʻa e ngāue ko ʻení (vakai, 9.2).

Ngaahi Fakataha ʻi he Sāpaté

ʻOku fakataha e Fineʻofá he Sāpate uá mo e faá mo ha taumuʻa ke fakatupulaki e tui kia Sīsū Kalaisí, langaki e uouangatahá, mo fakamālohia e fāmilí mo e ʻapí. ʻOku kamata e ngaahi fakatahá ʻaki ha lotu pea fakakau ai ha taimi ki he fealēleaʻaki fakatahá mo hono akoʻi mo aleaʻi ʻo e ongoongoleleí ʻo makatuʻunga ʻi he ngaahi lea konifelenisi lahi fakamuimuitahá (vakai, 9.2.1.2).

Ngāue Tokoní mo e Ngaahi ʻEkitivitií

ʻE lava ke palani ʻe he kau palesitenisī ʻo e Fineʻofá ha ngaahi ʻekitivitī ke fakamālohia ai e tui ʻa e houʻeiki fafiné kia Sīsū Kalaisí, fakatupulaki ʻenau holi ke fakahoko mo tauhi e ngaahi fuakavá, mo ʻoange ha ngaahi faingamālie ke nau ngāue fakataha ai. Te ne lava ke kole ki ha tokoni pe ki ha fefine kehe ke ne taki ʻi hono palaniʻi mo fakahoko kinautolú (vakai, 9.2.1.3).

Ngaahi Fakahinohinó mo e Ngaahi Tuʻutuʻuní

ʻOku maʻu ha ngaahi fakahinohino mo ha ngaahi tuʻutuʻuni lahi ange ʻi he konga 9.6 ʻo e Tohi Tuʻutuʻuni Fakakātoá.