Lin b’oqb’al jo’ aj k’uub’anel re li b’ichank sa’ li oqech

Li k’a’ru teneb’anb’il

Nasaho’ xch’ool li Qaawa’ naq wan aach’ool chi k’anjelak sa’ lix Iglees a’an. Rub’el a’in wan jun xtusulal li k’a’ru teneb’anb’il sa’ laa b’oqb’al.

K’a’ru xk’anjel li b’ich sa’ li Iglees

Li loq’laj b’ich naxnimob’resi li paab’aal chirix li Jesukristo. Naxb’oq li Musiq’ej ut naxk’ut li tzol’leb’. Naxk’e chiqeek’a li oxloq’ink, chi wank sa’ junajil jo’ komon sa’ li Iglees, ut chixnimankil ru li qaChoxahil Yuwa’ ut li Jesukristo. Li Qaawa’ kixye, “Nasahoʼ li waam rikʼin lix bʼichahom li aamej” (Tzol’leb’ ut Sumwank 25:12). (Chi’ilmanq Jolomil K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 19.1.)

Laj k’uub’anel re li b’ichank sa’ li oqech

Laj k’uub’anel re li b’ichank sa’ li oqech naxtenq’aheb’ li komon sa’ li teep chixnimob’resinkil lix paab’aaleb’ ut lix loq’onihomeb’ chiru li qaChoxahil Yuwa’ ut li Jesukristo rik’ineb’ li loq’laj b’ich. A’an na’aatinak rik’in li awa’b’ejil re oqech re xkawresinkileb’ li b’ich choq’ re li ch’utub’aj-ib’ re oqech ut xkomoneb’ chik li k’anjel. Us naq eb’ li b’ich neke’xwaklesi li loq’onink ut neke’xk’ut li evangelio rik’in wankilal ut chi ch’olch’o ru. (Chi’ilmanq 19.3.1.) Eb’ laj k’uub’anel re li b’ichank neke’xtenq’aheb’ laj jolominel sa’ li oqech rik’in li b’ichank (chi’ilmanq 19.5.2).

Eb’ li b’ich choq’ reheb’ li ch’utam re oqech

“Li bʼich li nawaklesin musiqʼej aʼan jwal aajel ru saʼebʼ li qachʼutam re li Iglees” (Ebʼ li Bʼich, Xtikibʼankil xbʼaan li Xbʼeenil Awaʼbʼejil). Sa’eb’ li ch’utub’aj-ib’ re oqech, naru neke’b’ichan li coro, laj b’ichanel, malaj kok’ ch’uut (chi’ilmanq 19.3.4). Eb’ li b’ich malaj jalaneb’ chik li loq’laj b’ich naru neke’oksiman rub’elaj ut chirix li ch’utam, sa’eb’ li coro ut kok’ ch’uut. Eb’ laj k’uub’anel re li b’ichank sa’ li oqech naru neke’xk’uub’ li ninqi coro re jun oqech malaj re naab’al oqech choq’ reheb’ li ch’utub’aj-ib’ ut jalaneb’ chik li k’anjel, jo’ junaq k’anjel nab’aanuman sa’ li tenamit (chi’ilmanq 19.3.7.2).

Li tzolok ut eb’ li k’anjeleb’aal

Eb’ laj k’uub’anel re li b’ichank sa’ li oqech neke’xkawresi ut neke’xjolomi li tzolok chirix li b’ichank sa’ li oqech jo’ na’ajman ru. Neke’xtzoleb’ ut neke’xtenq’aheb’ laj k’amol re li b’ich sa’ li teep. (Chi’ilmanq 19.6.) Wi maak’a’ junaq aj toch’ol re li b’ich sa’ junaq ch’utam re oqech, chi’ilmanq li tasal 19.4.3.2 sa’ li Jolomil K’anjenel Hu re xtawb’aleb’ li b’ich ak chapb’ileb’.

Li b’eresink ut li chaq’rab’ink

Re xtawb’al xkomon chik li chaq’rab’ink ut li b’eresink, jo’ chirix xtawb’aleb’ li b’ich, li roksinkileb’ li wajb’ re li ch’utleb’aal kab’l, ut li coro re k’aleb’aal, chi’ilmanq li tasal 19.7 sa’ li Jolomil K’anjenel Hu.