tamaitai o loo taitaia le aufaipese

O Lo’u Valaauga o se Taitai Faamaopoopo o Musika a le Siteki

Tiutetauave

E faafetai le Alii mo lou naunauta’i e auauna atu i Lana Ekalesia. O loo i lalo se vaaiga aoao o tiutetauave mo lou valaauga.

Faamoemoega o Musika i le Ekalesia

O musika paia e faateleina ai le faatuatua ia Iesu Keriso. E valaaulia ai le Agaga ma aoao atu ai aoaoga faavae. E fatuina ai foi se lagona o le migao, soofaatasia tagata o le ekalesia, ma saunia se ala e tapuai ai i le Tama Faalelagi ma Iesu Keriso. Na folafola mai Alii, “Aua e fiafia lou agaga i le pese a le loto” (Mataupu Faavae ma Feagaiga 25:12). (Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 19.1.)

Taitai Faamaopoopo o Musika a le Siteki

E fesoasoani le taitai musika a le siteki i tagata o le uarota e faateleina le faatuatua ma le tapuai i le Tama Faalelagi ma Iesu Keriso e ala i musika paia. Latou te feutagai ma le au peresitene o le siteki e fuafua musika mo konafesi a siteki ma isi gaoioiga. O musika filifilia e tatau ona faaleleia ai le agaga o le tapuai ma aoao atu le talalelei i le mana ma le manino. (Tagai i le 19.3.1.) O taitai faamaopoopo o musika e auauna atu o se punaoa i taitai o siteki i mataupu tau musika (tagai i le 19.5.2).

Musika mo Sauniga a le Siteki

“O musika musuia o se vaega taua o a tatou sauniga faalelotu” (Viiga, Faatomuaga a le Au Peresitene Sili). O konafesi a siteki e aofia ai viiga ma isi musika filifilia mai se aufaipese, tagata pese toatasi, po o ni vaega toalaiti (tagai i le 19.3.4). O viiga po o isi musika paia filifilia e mafai ona faaaoga mo musika e muai tataina ma musika e muliai tataina, musika a le aufaipese, ma le solo po o ni polokalama a vaega toalaiti. E mafai e taitai faamaopoopo o musika a le siteki ona fautuaina atu aufaipese a siteki po o siteki tuufaatasi mo konafesi po o isi faatasiga, e pei o gaoioiga a nuu (tagai i le 19.3.7.2).

Aoaoga ma Punaoa

E fautuaina ma vaavaaia e taitai faamaopoopo o musika a le siteki ia aoaoga faamasani i musika i le siteki pe a manaomia. Latou te tuuina atu aoaoga faamasani ma le lagolago mo taitai faamaopoopo o musika a le uarota. (Tagai i le 19.6.) Afai e leai se tagata e taina le musika mo sauniga a le uarota, tagai i le vaega 19.4.3.2 o le Tusitaulima Aoao e faaaoga ai le musika ua pueina.

Taiala ma Aiaiga Faavae

Mo aiaiga ma taiala faaopoopo, e pei o le mauaina o musika, faaaogaina o mea faimusika o falelotu mo faataitaiga, po o aufaipese a le alalafaga, tagai i le vaega 19.7 o le Tusitaulima Aoao.