Ko Hoku Uiuiʻi ko ha Kouʻotineita Mūsika ʻo e Siteikí

Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki ho uiuiʻí.

Taumuʻa ʻo e Hivá ʻi he Siasí

ʻOku fakatupulekina ʻe he ngaahi hiva toputapú ʻa e tui kia Sīsū Kalaisí. ʻOkú ne fakaafeʻi ʻa e Laumālié mo akoʻi ʻa e tokāteliné. ʻOkú ne toe fakatupu foki ha ongoʻi ʻapasia, fakauouangatahaʻi ʻa e kāingalotú mo ʻomi ha founga ke moihū ai ki he Tamai Hēvaní mo Sīsū Kalaisi. Naʻe fakahā ʻe he ʻEikí, “‘Oku fiefia ʻa hoku laumālié ‘i he hiva ʻo e lotó” (Tokāteline mo e Ngaahi Fuakava 25:12). (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 19.1.)

Kouʻotineita Mūsika ʻo e Siteikí

ʻE tokoni ʻa e kouʻōtineita mūsika ʻo e siteikí ki he kāingalotu ʻo e uōtí ke fakatupulaki ʻenau tui mo e moihū ki he Tamai Hēvaní mo Sīsū Kalaisi ʻo fakafou ʻi he ngaahi hiva toputapú. Te nau feongoongoi mo e kau palesitenisī fakasiteikí ʻi hono palani ʻo e hiva ki he konifelenisi fakasiteikí mo ha ngaahi polokalama kehe. ʻOku totonu ke fakatupulaki ʻe he ngaahi hiva kuo filí ʻa e laumālie ʻo e lotú mo akoʻi ʻa e ongoongoleleí ʻi he mālohi mo e mahino. (Vakai, 19.3.1.) ʻE hoko ʻa e kau kouʻotineita mūsiká ko ha maʻuʻanga tokoni ki he kau taki ʻo e siteikí ʻi he ngaahi meʻa fakahivá (vakai, 19.5.2).

Hiva ki he Ngaahi Fakataha Fakasiteikí

“ʻOku hoko ʻa e ngaahi hiva fakalaumālié ko ha konga mahuʻinga ia ʻo e ngaahi fakatahaʻanga hotau Siasí” (Ngaahi Himí, Talamuʻaki ʻa e Kau Palesitenisī ʻUluakí). ʻOku kau ʻi he ngaahi konifelenisi fakasiteikí ha ngaahi himi mo ha ngaahi hiva kehe kuo filifili mei ha kuaea, kau hiva solo, pe fanga kiʻi kulupu iiki (vakai, 19.3.4). ʻE lava ke fakaʻaongaʻi ʻa e ngaahi himí pe ngaahi hiva toputapu kehé ki he fasi talitali mo e fasi mātukū, hiva ʻa e kuaeá, pea mo e hiva tokotahá pe fanga kiʻi polokalama fakakulupu īkí. ʻE lava ke fokotuʻu ʻe he kau kouʻotineita mūsika ʻo e siteikí ha ngaahi kuaea fakasiteiki pe fakavahaʻa siteiki ki ha ngaahi konifelenisi pe ha toe ngaahi meʻa kehe, hangē ko e ngaahi meʻa fakakoló (vakai, 19.3.7.2).

Akó mo e Ngaahi Maʻuʻanga Tokoní

ʻE fokotuʻu mo tokangaʻi ʻe he kau kouʻotineita mūsika ʻo e siteikí ʻa e fakataukei ki he hivá ʻi he siteikí, ʻo ka fiemaʻu. Te nau fakahoko ha ako mo ha poupou ki he kau kouʻotineita mūsika ʻo e uōtí. (Vakai, 19.6.) Kapau ʻoku ʻikai maʻu ha taha tā piano pe ʻōkani ki he ngaahi fakataha fakasiteikí, vakai ki he konga 19.4.3.2 ʻo e Tohi Tuʻutuʻuni Fakakātoá ke lava ʻo maʻu ʻa e meʻalea kuo lekōtí.

Ngaahi Fakahinohinó mo e Ngaahi Tuʻutuʻuní

Ke maʻu ha ngaahi tuʻutuʻuni mo ha ngaahi fakahinohino lahi ange, hangē ko hono maʻu ʻo e hivá, fakaʻaongaʻi ʻo e ngaahi meʻalea ki he falelotú ki he ako hivá, pe ngaahi kuaea ʻa e koló, vakai ki he konga 19.7 ʻo e Tohi Tuʻutuʻuni Fakakātoá.