Ko Hoku Uiuiʻi ko ha Mataotao ʻi he Mūsiká ʻi he Siteikí

Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki ho uiuiʻí.

Taumuʻa ʻo e Hivá ʻi he Siasí

ʻOku fakatupulekina ʻe he ngaahi hiva toputapú ʻa e tui kia Sīsū Kalaisí. ʻOkú ne fakaafeʻi ʻa e Laumālié mo akoʻi ʻa e tokāteliné. ʻOkú ne toe fakatupu foki ha ongoʻi ʻapasia, fakauouangatahaʻi ʻa e kāingalotú, mo ʻomi ha founga ke moihū ai ki he Tamai Hēvaní mo Sīsū Kalaisi. Naʻe fakahā ʻe he ʻEikí, “He ‘oku fiefia ʻa hoku laumālié ‘i he hiva ʻo e lotó” (Tokāteline mo e Ngaahi Fuakava 25:12). (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 19.1.)

Mataotao ʻi he Mūsiká ʻi he Siteikí

ʻE tokoni ʻa e kau mataotao ʻi he mūsiká ʻi he siteikí ki he kāingalotu ʻo e siteikí ke fakatupulaki ʻenau tui mo e moihū ki he Tamai Hēvaní mo Sīsū Kalaisí ʻo fakafou ʻi he ngaahi hiva toputapú. ʻE lava ke feau ʻe he kau mataotaó ha ngaahi fiemaʻu pau ki he hivá ʻi he siteikí, hangē ko e talēkita ʻo e kuaeá, faihiva, pe tokotaha tā-piano, ki he ngaahi fakatahaʻanga pe ngaahi polokalama fakasiteikí. ʻE toe lava foki ke kole ange ke nau fai ha ako ki he hivá. (Vakai, 19.5.3.) Ke maʻu ha fakaikiiki lahi ange fekauʻaki mo e ako ki he hivá, vakai ki he konga 19.6 ʻo e Tohi Tuʻutuʻuni Fakakātoá.

Ngaahi Fakahinohinó mo e Ngaahi Tuʻutuʻuní

Ke maʻu ha ngaahi tuʻutuʻuni mo ha ngaahi fakahinohino lahi ange, hangē ko hono maʻu ʻo e hivá, fakaʻaongaʻi ʻo e ngaahi meʻalea ki he falelotú ki he ako hivá, pe ngaahi kuaea ʻa e koló, vakai ki he konga 19.7 ʻo e Tohi Tuʻutuʻuni Fakakātoá.