marama vakavulici ira tiko na gone

Na Noqu Veikacivi vaka Peresitedi ni Lalai

iTavi eso

E vakavinavinakataka na Turaga ena nomu lomasoli mo veiqaravi ena Nona Lotu. E koto e ra na ivakamacala raraba ni itavi eso ni nomu veikacivi.

iNaki ni Lalai

Na Lalai e vukei ira na gone me ra vakila na loloma ni Tamada Vakalomalagi; vulica me baleta na Nona ituvatuva ni marau; bulataka na kosipeli i Jisu Karisito; ka vakila, kila, ka cakacaka ena veivakauqeti ni Yalo Tabu. Na Lalai sa gauna talega ni vakavakarau, cakava, ka maroroya na veiyalayalati tabu ni ra vakaitavi na gone ena cakacaka ni veivakabulai kei na bula vakacerecerei ni Kalou. (Raica na iVoladusidusi Raraba: Veiqaravi e Na Lotu i Jisu Karisito ni Yalododonu Edaidai, 12.1.)

Peresitedi ni Lalai ni iTeki

Na peresitedi ni Cauravou ena iteki e veiqaravi ena ruku ni nodratou veidusimaki na mataveiliutaki ni iteki. E lewena o koya na matabose ni tabanalevu. Ena liutaka na mataveiliutaki ni Lalai ena iteki o peresitedi. Me vaka niu mataveiliutaki, na itavi e oka kina na nodra vakavulici na mataveiliutaki vou ni Lalai ni tabanalevu kacivi, solia na veitokoni kei na ivakasala e veigauna, kei na veisiko ki na kalasi ni tabanalevu ena iteki. Ni ra sureti, sa rawa me ra tiko ena bose ni matabose veivakarautaki ka vosa ena soqoni ni sakaramede kei na veivanua tale eso (raica na 6.7.1).

Bose kei na Matabose

Me ratou dau veivakasalataki wasoma na mataveiliutaki ni Lalai ena iteki. Ena dau tiko o peresitedi ena veiyabaki ni veiliutaki ni iteki (raica na29.3.4), veiqaravi ena matabose ni iteki, ka tiko ena bose ni matabose veivakarautaki ena gauna e sureti kina na Vitusagavulu ni iWasewase (raica na29.4).

iTaviqaravi ni Lalai

Sa rawa vei iratou na mataveiliutaki ni Lalai ena iteki me ratou dau tuvanaka vagauna na itaviqaravi ni iteki me baleti ira na gone yabaki 8 ki na 11. Na itaviqaravi oqo e rawa ni ra vakaitavi kina na goneyalewa, gonetagane, se ruarua (raica na 6.7.1.3).

iDusidusi kei na Lawatu

Na itabaqase kece era cakacaka vata kei ira na gonelalai kei ira na itabagone e dodonu me ra vakacavara na veituberi ni Veitaqomaki vei ira na Gonelalai kei na iTabagone ena loma ni dua na vula mai na gauna era a tokoni kina (ProtectingChildren.ChurchofJesusChrist.org). Na idusidusi kei na lawatu me baleti ira na gonelalai era vakaleqai tu, veika e gadrevi ena veitaqomaki, na parokaramu ni Gonelalai kei na iTabagone, kei na so tale era kune ena wase 12.5 ni iVoladusidusi Raraba.