Tō’u pi’ira’a ’ei peresideni nō te Paraimere o te titi

Te mau hōpoi’a

’Ua māuruuru roa te Fatu nō tō ’oe hina’arora’a e tāvini i roto i tāna ’Ēkālesia. E ’ite mai ’oe i raro nei i te tahi hi’ora’a o te mau hōpoi’a nō tō ’oe pi’ira’a.

Te ’ōpuara’a a te Paraimere

E tauturu te Paraimere i te mau tamari’i ’ia putapū i te here o tō rātou Metua i te ao ra ; ’ia ha’api’i mai nō ni’a i tāna fa’anahora’a nō te ’oa’oa ; ’ia ora i te ’evanelia a Iesu Mesia ; ’e ’ia putapū, ’ia ’ite ’e ’ia rave mai te au i te fa’aurura’a a te Vārua Maita’i. ’Ua riro ato’a te Paraimere ’ei taime nō te fa’aineinera’a, nō te rave ’e nō te ha’apa’o i te mau fafaura’a mo’a, ’a ’āmui mai ai te mau tamari’i i roto i te ’ohipa nō te fa’aorara’a ’e te fa’ateiteira’a a te Atua. (Hi’o Buka Arata’i Rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 12.1).

Te peresideni nō te Paraimere o te titi

E tāvini te peresideni nō te Paraimere o te titi i raro a’e i te fa’aterera’a a te peresidenira’a o te titi. E tāvini ’oia ’ei melo nō te ’āpo’ora’a titi. E arata’i te peresideni i te peresidenira’a nō te Paraimere o te titi. ’Ei peresidenira’a, te mau hōpoi’a ’oia ho’i te arata’ira’a i te mau peresidenira’a nō te Paraimere o te pāroita tei pi’i-’āpī-hia, te pūpūra’a i te pāturura’a ’e te ha’api’ira’a tāmau,’e te hāhaerera’a i roto i te mau piha ha’api’ira’a a te pāroita i roto i te titi. ’Ia ani-ana’e-hia rātou, e nehenehe rātou e haere i te mau rurura’a ’āpo’ora’a fa’aaura’a ’e ’ia paraparau i roto i te mau purera’a ’ōro’a ’e te tahi atu mau fa’anahora’a (hi’o 6.7.1).

Te mau rurura’a ’e te mau ’āpo’ora’a

E ti’a i te peresidenira’a nō te Paraimere o te titi ’ia ruru ’āmui tāmau noa. E haere atu te peresideni i te mau rurura’a tāmatahiti a te feiā fa’atere o te titi (hi’o 29.3.4), e tāvini i roto i te ’āpo’ora’a titi, ’e e haere i te mau rurura’a ’āpo’ora’a fa’aaura’a ’ia ani-ana’e-hia mai e te Hitu ’Ahuru ārea (hi’o 29.4).

Te mau ’ohipa ri’i a te Paraimere

E nehenehe te peresidenira’a nō te Paraimere o te titi e fa’anaho i te tahi taime i te mau ’ohipa ri’i nā te titi, nō te mau tamari’i mai te 8 ē tae atu i te 11 matahiti. E nehenehe teie mau ’ohipa ri’i e riro nā mau tamāhine, nā te mau tamāroa ’aore rā i nā pae e piti (hi’o 6.7.1.3).

Te mau arata’ira’a ’e te mau fa’aturera’a

E mea tītauhia i te feiā pa’ari ato’a e ’ohipa nei ’e te mau tamari’i ’e te feiā ’āpī, ’ia rave i te ha’api’ipi’ira’a nō ni’a i te Pārurura’a i te mau Tamari’i ’e i te Feiā ’Āpī, i roto i te ’āva’e o tō rātou pāturura’ahia (ProtectingChildren.ChurchofJesusChrist.org). E ’itehia te mau arata’ira’a ’e te mau fa’aturera’a nō te mau tamari’i e mau hina’aro ta’a ’ē tō rātou, te mau tītaura’a o te pārurura’a, te fa’anahora’a nō te mau tamari’i ’e te feiā ’āpī ’e tē vai atu ā, i roto i te tuha’a 12.5 o te Buka Arata’i Rahi.