Mga Responsibilidad

Ang Ginoo mapasalamaton sa imong kaandam nga moserbisyo sa Iyang Simbahan. Sa ubos mao ang kinatibuk-ang pagpasabot sa mga responsibilidad sa imong calling.

Katuyoan sa Relief Society

Ang Relief Society usa ka balaang gitukod nga organisasyon alang sa tanang hamtong nga mga babaye diha sa Simbahan. Ang Relief Society motabang sa mga anak sa Dios nga mangandam aron makabalik ngadto sa Iyang presensya. Si Propeta Joseph Smith mitudlo nga ang katuyoan sa Relief Society mao ang “pagluwas sa mga kalag ug paghupay sa nag-antos”—naghatag og kahupayan sa Manluluwas (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 9.1).

Presidente sa Relief Society sa Stake

Ang mga sakop sa kapangulohan sa Relief Society sa stake adunay daghang responsibilidad nga naglakip sa pagtudlo sa bag-ong natawag nga mga kapangulohan sa Relief Society sa ward ug paghatag og padayon nga suporta, pagtudlo sa mga presidente sa Relief Society sa ward sa mga baroganan sa pagpangalagad, family history, ug misyonaryo nga buhat (tan-awa sa 9.5); paglig-on sa dili minyo nga hamtong nga mga sister; pagkigsabot sa mga paningkamot atol sa emerhensiya; pagpamulong atol sa mga miting sa sakramento ug ubang mga kahimtang; ug pagbisita sa mga miting sa Relief Society sa ward (tan-awa sa 6.7.1).

Mga Miting ug mga Konseho

Ang kapangulohan sa Relief Society sa stake kinahanglan kanunay nga magtinambagay. Usa ka sakop sa kapangulohan moalagad sa mga komitiba sa young single adult ug single adult, kon naorganisar. Ang kapangulohan motambong sa tinuig nga mga miting sa pagpangulo sa stake ug motudlo sa mga kapangulohan sa Relief Society sa ward diha niana nga mga miting (tan-awa sa 29.3.9), moserbisyo diha sa konseho ug komitiba sa hamtong nga pagpangulo sa stake (mga presidente lamang), ug motambong sa miting sa coordinating council kon dapiton sa Area Seventy (tan-awa sa 29.4).

Serbisyo ug mga Kalihokan

Ang kapangulohan sa Relief Society sa stake mahimong magplano og usa o duha ka mga miting matag tuig alang sa tanang igsoong babaye sa Relief Society diha sa stake. Kini nga mga miting mahimong maglakip sa pagserbisyo, mga klase, mga proyekto, mga komperensiya, ug mga workshop (tan-awa sa 6.7.1.1). Ang mga kapangulohan sa Relief Society, Young Women, ug Primary sa stake mahimong magplano panagsa og hiniusa nga mga kalihokan alang sa ilang mga organisasyon (tan-awa sa 6.7.1).

Mga Lagda ug mga Palisiya

Dugang nga mga lagda ug mga palisiya makit-an diha sa seksiyon 9.6 sa Kinatibuk-ang Tamdanan nga Basahon.