Kūr eo Aō āinwōt juon Stake Būreejtōn n̄an Doulul eo an Kōrā ro

Eddo ko

Irooj ej m̧ōņōņō kōn wujlepļo̧k eo am̧ n̄an jerbal ilo Kabun̄ eo An. Ijin ilaļ ej juon kōmeļeļein eddo ko ilo kūr eo am̧.

Jibadbad eo an Doulul eo an Kōrā ro

Doulul eo an Kōrā ro ej juon doulul eo ekwojarjar kar karōke n̄an kōrā ro rōrūtto ilo Kabun̄ in. Doulul eo an Kōrā ej jipan̄ ajri ro nejin Anij kōppopo n̄an jepļaakļo̧k n̄an Ippān. Rikanaan Josep Smith ekar kwaļo̧k bwe jibadbad eo an Doulul eo an Kōrā ro ej n̄an “lo̧mo̧o̧ren jetōb ko, im kōmeraik en̄taan ko”—leļo̧k unjen mour eo an Rilo̧mo̧o̧r (lale Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 9.1).

Stake Būreejtōn eo n̄an Doulul eo an Kōrā ro

Ro uwaan stake būreejtōnji eo an Doulul eo an Kōrā ro elōn̄ļo̧k jān juon aer eddo ko im ekoba kajineet būreejtōnji ko an Doulul eo an Kōrā ro an ward im rekāāl kar kūr im wōnm̧aanļo̧k wōt im leļo̧k jipan̄ ; katakin būreejtōn ro an Doulul eo an Kōrā ro an ward pedped in katak ko an jerbal in karejar, menmenbwij an baam̧le, im jerbal in mijenede (lale 9.5); kōkajoorļo̧k sister ro rōrūtto ejjeļo̧k rejtaer; kōtōbalbal kūjejeto ko an iien idin̄; kōnono ilo kweilo̧k in kwojkwoj ko; im jekjek ko jet; im loļo̧k kweilo̧k ko an Doulul eo an Kōrā ro an ward (lale 6.7.1).

Kweilo̧k ko im Ko̧o̧njeļ ko

Stake Būreejtōnji eo n̄an Doulul eo Kōrā ro ej kapilōk ippān doon iien otemjej. Juon membōr in būreejtōnji eo ej jerbal ilo kamiti ko an rūm̧m̧an ded ro ejjeļo̧k rejtaer im rūtto ro ejjeļo̧k rejtaer an stake, eļan̄n̄e kar ejake. Būreejtōnji eo en pād ilo kweilo̧k ko an ritōl an stake iiō otemjej im ej kōmeļeļeik būreejtōnji ko an Doulul eo an Kōrā ro an ward ilo kweilo̧k ko (lale 29.3.4), jerbal ilo ko̧o̧ņjeļ eo an ritōl rūtto ro an stake (būreejtōn ro wōt) im kamiti eo, im ej etal n̄an kweilo̧k ko an ko̧o̧njeļ in kōtōbalbal eo n̄e kūri jān Eria Jiljilimjuonn̄oul eo (lale 29.4).

Jerbal in jipan̄ im M̧akūtkūt ko

Stake būreejtōnji eo Doulul eo an Kōrā ro emaron̄ karōk juon ak ruo kweilo̧k ko kajjojo iiō n̄an aolep sister ro ilo Doulul eo an Kōrā ro ilo stake. Kweilo̧k kein remaron̄ koba jerbal in jipan̄ ko, kūlaaj ko, būroojāāk ko, kweilo̧k ko reļļap, ak workshop ko (lale 6.7.1.1). Doulul eo an Kōrā ro an stake, Doulul eo an Jiron̄ ro, im būreejtōnji ko an Būraimere remaron̄ jān iien n̄an iien karōk m̧akūtkūt ko ippen doon n̄an doulul ko aer (lale 6.7.1).

Unin Tōl ko im Kakien ko Jet

Kakkobaba in unin tōl ko im kakien ko loi ilo jekjōn in 9.6 in Bok in Bōk Meļeļe Eļap.