Dagiti Pagrebbengan

Agyamyaman ti Apo iti kinatallugodmo nga agserbi iti Simbaanna. Adda iti baba ti pakabuklan dagiti pagrebbengan para iti calling-mo.

Panggep ti Sunday School

Tumulong ti Sunday School a mangipatungpal iti aramid ti Dios iti pannakaisalakan ken pannakaitan-ok. Aramidenna daytoy babaen ti panangtulongna kadagiti annak ti Dios nga agsursuro ken agbiag iti ebanghelio ni Jesucristo (kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 13.1).

Panguluen ti Sunday School

Responsable ti presidente nga agserbi iti konseho iti ward, mangimatmaton kadagiti panagkagumaan iti panagsursuro ken panangisuro iti ebanghelio iti pagtaengan ken iti simbaan, ken panangbuangay kadagiti klase. Suportaran, paregtaen, ken bilinen pay ti presidente dagiti mannursuro nga agbalin nga ad-adda nga epektibo babaen ti panangsurotda kadagiti pagbatayan kadagiti nasantuan a kasuratan ken ti Panangisuro iti Wagas ti Mangisalakan (kitaen iti 13.2.2.2). Tumulong kenkuana dagiti mamagbagana.

Dagiti Klase ti Domingo

Maangay dagiti klase ti Sunday School iti umuna ken maikatlo a Domingo ti bulan. Agduduma ti kadakkel ti klase maibatay iti kasapulan ti tunggal ward (kitaen iti 13.3). Usaren dagiti mannursuro iti Sunday School dagiti nasantuan a kasuratan, naikeddeng nga adalen iti Umaykayo, Sumurot Kaniak, ken dagiti balikas dagiti propeta iti agdama nga aldaw kas kangrunaan a resources para iti panangisuro.

Panagsursuro iti Ebanghelio a Naisentro iti Pagtaengan

Pagrebbengan dagiti nagannak a mangisuro iti ebanghelio kadagiti annakda (kitaen iti 13.5). Allukoyen dagiti mannursuro ken lider dagiti miembro nga agkalikagum a maaddaan iti bukodda nga inspirasion maipapan iti no kasano nga adalen ken isuro ti ebanghelio kadagiti pagtaenganda (kitaen iti 17.2).

Dagiti Miting ti Konseho ti Mannursuro

Kadagiti miting ti konseho ti mannursuro, agiinnuman dagiti mannursuro maipapan kadagiti pagbatayan ti panangisuro a kas ken ni Cristo. Agiinnumanda pay maipapan no kasano a mapasayaat ti panagsursuro ken panangisuro iti ebanghelio. TiPanangisuro iti Wagas ti Mangisalakan ket mausar a kas maysa a resource (kitaen iti 17.4). Maangay dagitoy a miting iti tunggal tallo a bulan kabayatan ti oras ti klase iti Domingo ket gagangay nga idauluan ti presidente ti Sunday School (kitaen iti 13.4).

Dagiti Miting ti Konseho ti Mannursuro para kadagiti Nagannak

Iti babaen ti panangiturong ti bishop ken ti konseho iti ward, tumultulong ti presidente ti Sunday School a mangbuangay kadagiti miting ti konseho ti mannursuro para kadagiti nagannak. Suroten dagitoy a miting ti isu met laeng a pormat ken kasansan a kas kadagiti regular a miting ti konseho dagiti mannursuro, ngem iti daytoy a kaso maawis dagiti nagannak a dumar-ay. Ti panggep ket tapno matulongan dagiti nagannak nga agbalin a nasaysayaat a mannursuro kadagiti pagtaenganda. TiPanangisuro iti Wagas ti Mangisalakan ken dagiti pakauna a material iti Umaykayo, Sumurot Kaniak ket nasken a mausar a kas resources (kitaen iti 17.4).

Dagiti Pangiwanwan ken Annuroten

Amin a nataengan a makipagtrabaho kadagiti agtutubo ket nasken a leppasenda ti training iti panangsaluad kadagiti ubbing ken agtutubo iti uneg ti makabulan a pannakakanunongda (ProtectingChildren.ChurchofJesusChrist.org). Masarakan dagiti mainayon a pangiwanwan iti Sunday School iti benneg 13.7 ti Sapasap a Handbook.