ការហៅរបស់ខ្ញុំក្នុងនាមជាប្រធានសាលាថ្ងៃអាទិត្យ
ការទទួលខុសត្រូវទាំងឡាយ
ព្រះអម្ចាស់សព្វព្រះទ័យនឹងឆន្ទៈរបស់បងប្អូនដើម្បីបម្រើនៅក្នុងសាសនាចក្ររបស់ទ្រង់ ។ ខាងក្រោមនេះគឺជាទិដ្ឋភាពទូទៅនៃការទទួលខុសត្រូវទាំងឡាយសម្រាប់ការហៅរបស់អ្នក ។
គោលបំណងនៃសាលាថ្ងៃអាទិត្យ
សាលាថ្ងៃអាទិត្យជួយសម្រេចកិច្ចការនៃសេចក្តីសង្រ្គោះ និងភាពតម្កើងឡើងរបស់ព្រះ ។ វាធ្វើបែបនេះបាន តាមរយៈការជួយបុត្រាបុត្រីរបស់ព្រះឲ្យរៀន ហើយរស់នៅតាមដំណឹងល្អនៃព្រះយេស៊ូវគ្រីស្ទ ( សូមមើលក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ១៣.១ ) ។
គណៈប្រធានសាលាថ្ងៃអាទិត្យ
ប្រធានមានទំនួលខុសត្រូវសម្រាប់ការបម្រើនៅក្នុងក្រុមប្រឹក្សាវួដ មើលការខុសត្រូវលើការរៀនសូត្រ និងការបង្រៀនដំណឹងល្អនៅគេហដ្ឋាន និងនៅសាសនាចក្រ និងរៀបចំថ្នាក់រៀននានា ។ ប្រធានក៏ជួយគាំទ្រ លើកទឹកចិត្ត និងណែនាំគ្រូបង្រៀនឲ្យកាន់តែមានប្រសិទ្ធិភាពតាមរយៈការធ្វើតាមគោលការណ៍នៅក្នុងបទគម្ពីរ និង ការបង្រៀនតាមរបៀបរបស់ព្រះអង្គសង្គ្រោះ ( សូមមើល ១៣.២.២.២ ) ។ ទីប្រឹក្សារបស់គាត់ជួយដល់គាត់ ។
ថ្នាក់ថ្ងៃអាទិត្យ
ថ្នាក់សាលាថ្ងៃអាទិត្យធ្វើឡើងនៅថ្ងៃអាទិត្យទីមួយ និងទីបីនៃខែនីមួយៗ ។ ទំហំថ្នាក់នឹងប្រែប្រួលអាស្រ័យលើតម្រូវការរបស់វួដនីមួយៗ ( សូមមើល ១៣.៣ ) ។ គ្រូបង្រៀនសាលាថ្ងៃអាទិត្យប្រើបទគម្ពីរ មេរៀនដែលបានដាក់កាលវិភាគនៅក្នុងចូរ មកតាមខ្ញុំ និងប្រសាសន៍របស់ព្យាការីសម័យថ្មីជាធនធានចម្បងរបស់ពួកគេសម្រាប់ការបង្រៀន ។
ការរៀនសូត្រដែលផ្តោតលើគេហដ្ឋាន
ឪពុកម្តាយទទួលខុសត្រូវលើការបង្រៀនដំណឹងល្អដល់កូនៗរបស់ខ្លួន ( សូមមើល ១៣.៥ ) ។ គ្រូបង្រៀនសាលាថ្ងៃអាទិត្យ និងថ្នាក់ដឹកនាំលើកទឹកចិត្តសមាជិក ឲ្យស្វែងរកការបំផុសគំនិតដោយខ្លួនពួកគេផ្ទាល់អំពីរបៀបសិក្សា និងបង្រៀនដំណឹងល្អនៅក្នុងគេហដ្ឋានរបស់ពួកគេ ( សូមមើល ១៧.២ ) ។
ការប្រជុំក្រុមប្រឹក្សាគ្រូបង្រៀន
នៅក្នុងការប្រជុំក្រុមប្រឹក្សាគ្រូបង្រៀន គ្រូបង្រៀនប្រឹក្សាយោបល់រួមគ្នាអំពីគោលការណ៍ទាំងឡាយនៃការបង្រៀនដូចជាព្រះគ្រីស្ទ ។ ពួកគេក៏ប្រឹក្សាគ្នាអំពីរបៀបកែលម្អការរៀនសូត្រ និងការបង្រៀនដំណឹងល្អផងដែរ ។ ការបង្រៀនតាមរបៀបរបស់ព្រះអង្គសង្គ្រោះត្រូវបានប្រើប្រាស់សម្រាប់ជាធនធានមួយ ( សូមមើល ១៧.៤ ) ។ ការប្រជុំនេះត្រូវបានធ្វើឡើងប្រចាំត្រីមាសក្នុងអំឡុងពេលម៉ោងបង្រៀននៅថ្ងៃអាទិត្យ ហើយជាទូទៅការប្រជុំនេះដឹកនាំដោយប្រធានសាលាថ្ងៃអាទិត្យ ( សូមមើល ១៣.៤ ) ។
ការប្រជុំក្រុមប្រឹក្សាគ្រូបង្រៀនសម្រាប់ឪពុកម្តាយ
នៅក្រោមការដឹកនាំរបស់ប៊ីស្សព និងក្រុមប្រឹក្សាវួដ ប្រធានសាលាថ្ងៃអាទិត្យជួយរៀបចំការប្រជុំក្រុមប្រឹក្សាគ្រូបង្រៀនសម្រាប់ឪពុកម្តាយ ។ ការប្រជុំនេះធ្វើតាមទម្រង់ និងភាពញឹកញាប់ដូចគ្នាទៅនឹងការប្រជុំក្រុមប្រឹក្សាគ្រូបង្រៀនធម្មតា ប៉ុន្តែក្នុងករណីនេះឪពុកម្តាយត្រូវបានអញ្ជើញឲ្យចូលរួម ។ គោលបំណងនេះ គឺដើម្បីជួយឪពុកម្តាយក្លាយជាគ្រូបង្រៀនកាន់តែប្រសើរនៅក្នុងគេហដ្ឋានរបស់ពួកគាត់ ។ ការបង្រៀនតាមរបៀបរបស់ព្រះអង្គសង្គ្រោះ និងឯកសារណែនាំនានានៅក្នុងចូរ មកតាមខ្ញុំ គួរតែត្រូវបានប្រើប្រាស់ជាធនធាន ( សូមមើល ១៧.៤ ) ។
គោលការណ៍ណែនាំ និងគោលនយោបាយ
មជ្ឈិមវ័យទាំងអស់ដែលធ្វើការជាមួយយុវវ័យត្រូវតែបំពេញវគ្គបណ្តុះបណ្តាលការការពារកុមារ និងយុវវ័យក្នុងរយៈពេលមួយខែក្រោយពីត្រូវបានគាំទ្រចំពោះការហៅ ( ProtectingChildren.ChurchofJesusChrist.org ). គោលការណ៍ណែនាំ បន្ថែមទៀតសម្រាប់សាលាថ្ងៃអាទិត្យអាចរកបាននៅក្នុង ផ្នែក ១៣.៧ នៃ ក្បួនខ្នាតទូទៅ ។