Kūr eo Aō āinwōt juon Rijeje an Jabōt Jikuuļ
Eddo ko
Irooj ej m̧ōņōņō kōn wujlepļo̧k eo am̧ n̄an jerbal ilo Kabun̄ in An. Ijin ilaļ ej juon kōmeļeļe kōn eddo ko n̄an kūr eo am̧.
Jibadbad eo an Jabōt Jikuuļ
Jabōt Jikuuļ ej jipan̄ kōtōprak jerbal in lo̧mo̧o̧r eo an Anij im mour ijo eutiej tata. Ej kōm̧m̧ane menin ilo an jipan̄ ajri ro nejin Anij ekkatak im mour kōn gospel eo an Jisōs Kraist (lale Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 13.1).
Būreejtōnji im Rijeje eo
Būreejtōnji eo an Jabōt Jikuuļ ej lale kijejeto ko n̄an kōkm̧anm̧anļo̧k wāween katakin im ekkatak kōn gospel eo ilo m̧weeo im ilo kabun̄ in. Rikapilōklōk ro an rej jipan̄ e. Rijeje eo emaron̄ jipan̄ būreejtōnji eo ļo̧oki ijjitōn̄ ko im je etan ro rej pād ilo kūlaaj (lale 13.2.2.2).
Kūlaaj ko an Jabōt
Kūlaaj ko an Jabōt Jikuuļ rej kōm̧m̧an ilo Jabōt juon im jilu ilo kajjojo allōn̄. Oran kūlaaj ko renaaj pedped ioon aikuj ko an kajjojo ward (lale 13.3). Rūkaki ro an Jabōt Jikuuļ rej kōjerbal jeje ko rekwojarjar, jikejuul in katak ko ilo Itok Ļoor Eō, im naan ko an rikanaan ro raan kein āinwōt bar jet aer kein jipan̄ n̄an katakin.
M̧weeo En Jikin Ekkatak
Jinen im jemān ajri ro rej eddoik wāween ekkatak im katakin kōn gospel eo n̄an ajri ro nejier (lale 13.5). Rūkaki ro an Jabōt Jikuuļ im ritōl ro rej rōjan̄ membōr ro n̄an pukot im̧we ko aer make kōn wāween ekkatak im katakin gospel eo ilo m̧oko im̧weer (lale 17.2).
Kweilo̧k ko an Ko̧o̧njeļ eo an Rūkaki
Rijeje eo emaron̄ jipan̄ būreejtōn eo an Jabōt Jikuuļ n̄an ejaake im kōm̧m̧ani kweilo̧k ko an ko̧o̧njeļ eo an rūkaki im kweilo̧k ko an ko̧o̧njeļ eo an rūkaki n̄an ro jinen im jemān ajri ro ilo kajjojo jilu allōn̄.
Unin Tōl im Kakien ko jet
Aolep rūtto ro rej jerbal ippān jodikdik ro rej aikuj kadedeikļo̧k elmakot eo n̄an kōjparok ajri ro im jodikdik ro ilowaan juon allōn̄ jān iien eo kar rejtake er (ProtectingChildren.ChurchofJesusChrist.org). Kakkobaba n̄an unin tōl ko n̄an Jabōt Jikuuļ loi ilo jekjōn 13.7 in Bok in Bōk Meļeļe Eļap.