Akong Calling isip usa ka Tigduyog sa Ward

Mga Responsibilidad

Ang Ginoo mapasalamaton sa imong kaandam nga moserbisyo sa Iyang Simbahan. Sa ubos mao ang kinatibuk-ang pagpasabot sa mga reponsibilidad sa imong calling.

Katuyoan sa Musika diha sa Simbahan

Ang sagrado nga musika mopalambo sa hugot nga pagtuo diha ni Jesukristo. Magdapit kini sa Espiritu ug magtudlo sa doktrina. Magmugna usab kini og usa ka pagbati sa balaang pagtahod, maghiusa sa mga miyembro, ug maghatag og paagi sa pagsimba sa Langitnong Amahan ug ni Jesukristo. Ang Ginoo namahayag, “Kay ang akong kalag mahimuot sa awit sa kasingkasing” (Doktrina ug mga Pakigsaad 25:12). (Tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 19.1.)

Tigduyog sa Ward

Ang tigduyog sa ward motabang sa mga miyembro sa ward nga molambo ang hugot nga pagtuo ug pagsimba sa Langitnong Amahan ug ni Jesukristo pinaagi sa sagrado nga musika. Sila mohatag sa prelude ug postlude nga musika ug moduyog sa mga himno atol sa panagtigom alang sa sakramento ug sa ubang mga miting sa ward kon gihangyo. Kon gikinahanglan, ang tigduyog mahimo usab nga moduyog sa choir o moserbisyo isip piyanista sa Primary. (Tan-awa sa 19.4.3.2).

Musika alang sa mga Miting sa Simbahan

“Ang makadasig nga mga musika maoy usa ka mahinungdanon nga bahin sa atong mga miting sa simbahan” (Mga Himno, Pasiuna sa Unang Kapangulohan). Ang mga seleksiyon sa musika kinahanglan magtudlo sa ebanghelyo uban sa gahom ug kaklaro (tan-awa sa 19.3.1).

Musika sa Panagtigom alang sa Sakramento

Ang musika diha sa panagtigom alang sa sakramento naglakip sa pagpanganta sa mga himno sa pagbukas ug pagtapos sa miting ug sa dili pa ipahigayon ang sakramento. Ang panagtigom alang sa sakramento maglakip usab og usa o dugang pa nga mga himno o mga pasundayag sa musika. Ang mga himno o ubang sagrado nga mga pinili nga musika mahimong gamiton alang sa prelude ug postlude nga musika, sa musika sa choir, ug sa nag-inusara [solo] o gamay nga gupo nga mga pasundayag. (Tan-awa sa 19.3.2.)

Pagbansay ug mga Kapangohaan

Alang sa mga detalye mahitungod sa pagbansay sa musika, tan-awa ang seksiyon 19.6 sa Kinatibuk-ang Tamdanan nga Basahon. Kon walay tigduyog nga makuha alang sa mga miting sa ward, tan-awa sa seksiyon 19.4.3.2 aron sa pag-access sa duyog.

Mga Lagda ug mga Palisiya

Alang sa dugang nga mga palisiya ug mga lagda, sama sa pag-angkon og musika, paggamit sa mga instrumento sa meetinghouse alang sa pagbansay, o mga choir sa komunidad, tan-awa ang seksiyon 19.7 sa Kinatibuk-ang Tamdanan nga Basahon.