iTavi eso

E vakavinavinakataka na Turaga na nomu lomasoli mo veiqaravi ena Nona Lotu. Oqo na ivakamacala ni nomu itavi ena nomu veikacivi.

iNaki ni Sere ena Lotu

Na sereivakatagi tabu e vakalevutaka na vakabauti Jisu Karisito. Ena sureta na Yalo ka vakavulica na ivunau. E bulia talega na yalo ni vakarokoroko, vakaduavatataki ira na lewenilotu, ka vakarautaka e dua na sala ni sokalou ki vua na Tamada Vakalomalagi kei Jisu Karisito. E vakaraitaka na Turaga, “Raica sa rekitaka na yaloqu na sere sa lagati ena yalodina” (Vunau kei na Veiyalayalati 25:12). (Raica na iVoladusidusi Raraba: Veiqaravi e Na Lotu i Jisu Karisito ni Yalododonu Edaidai, 19.1.)

Kenadau ni Piano ke na Oqani ni Sereivakatagi ni Tabanalevu

Na dauveiqaravi ni tabanalevu ena vukei ira na lewe ni tabanalevu me ra vakalevutaka na nodra vakabauti Jisu Karisito ena ivakatagi tabu. Ena vakarautaka o dau ni piano kei na oqani na sere ni curu kei na sere ni suka ka vakakina na serenilotu ena soqoni ni sakaramede kei na soqoni ni tabanalevu tale eso ni sa kerei vakakina. Ni sa gadrevi, sa rawa talega vei dau ni piano kei na oqani me salavata kei na matasere se me veiqaravi vakadautabapiano ena Lalai. (Raica na 19.4.3.2).

Sereivakatagi ni Soqoni ni Lotu

“Na ivakatagi veivakauqeti sa tiki bibi ni noda soqoni ni lotu” (Sere ni Lotu, iVakamacala Taumada ni Mataveiliutaki Taumada). Na ivakatagi e dodonu me vakavulica na kosipeli ena kaukauwa kei na matata (raica na 19.3.1).

Sereivakatagi ena Soqoni ni Sakaramede

Na sereivakatagi ena soqoni ni sakaramede e oka kina na lagati ni sere me dolavi ka sogoti kina na soqoni ni bera ni qai qaravi na sakaramede. Na soqoni ni sakaramede e rawa talega ni oka kina e dua se sivia na ikuri ni serenilotu se ivakatagi. Sa rawa me vakayagataki na serenilotu se sereivakatagi tabu digitaki tale eso me sere ni curu ka sere ni suka, sere ni matasere, kei na domodua se matasere ni ilawalawa lalai. (Raica na 19.3.2.)

Vuli kei na iVurevure

Me baleta na kena matailalai na veituberi ni ivakatagi, raica na wase 19.6 ni iVoladusidusi Raraba. Kevaka e sega ni tiko e dua na daunivakatagi me baleta na soqoni ni tabanalevu, raica na wase 19.4.3.2 me rawa ni raici na veivakatagi sa katoni tu me rawa ni vakayagataki.

iDusidusi kei na Lawatu

Me baleta na ikuri ni lawatu kei na idusidusi, me vaka na kena rawati na ivakatagi, vakayagataki ni iyaya ni cakacaka ni valenilotu ena vakatovotovo, se matasere ni itikotiko raraba, raica na wase 19.7 ni iVoladusidusi Raraba.