O Lo’u Valaauga o se Ta Laau [Piano/Okeni] a le Uarota
Tiutetauave
E faafetai le Alii mo lou naunauta’i e auauna atu i Lana Ekalesia. O loo i lalo se vaaiga aoao o tiutetauave mo lou valaauga.
Faamoemoega o Musika i le Ekalesia
O musika paia e faateleina ai le faatuatua ia Iesu Keriso. E valaaulia ai le Agaga ma aoao atu ai aoaoga faavae. E fatuina ai foi se lagona o le migao, soofaatasia tagata o le ekalesia, ma saunia se ala e tapuai ai i le Tama Faalelagi ma Iesu Keriso. Na folafola mai e le Alii, “Aua e fiafia lou agaga i le pese a le loto” (Mataupu Faavae ma Feagaiga 25:12). (Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 19.1.)
Ta Laau a le Uarota
E fesoasoani le ta laau a le uarota i tagata o le uarota e faateleina le faatuatua ia Iesu Keriso e ala i musika paia. Latou te saunia musika e muai tataina ma musika e muliai tataina, ma e taina foi le laau mo viiga i le sauniga faamanatuga ma isi sauniga faaleuarota pe a talosagaina ai. Pe a manaomia, e mafai foi e le ta laau ona taina pese a le aufaipese pe avea ma ta piano a le Peraimeri. (Tagai i le 19.4.3.2).
Musika mo Sauniga a le Ekalesia
“O musika musuia o se vaega taua o a tatou sauniga faalelotu” (Viiga, Faatomuaga a le Au Peresitene Sili). O musika filifilia e tatau ona aoao atu le talalelei i le mana ma le manino (tagai i le 19.3.1).
Musika mo le Sauniga Faamanatuga
O musika i sauniga faamanatuga e aofia ai le lagiina o viiga e amata ma faaiuina ai le sauniga ma a o le’i faatautaia le faamanatuga. E mafai foi ona aofia ai i le sauniga faamanatuga se viiga faaopoopo se tasi pe sili atu po o aoaoga faamusika. O viiga po o isi musika paia filifilia e mafai ona faaaoga mo musika e muai tataina ma musika e muliai tataina, musika a le aufaipese, ma le solo po o ni polokalama a vaega toalaiti. (Tagai i le 19.3.2.)
Aoaoga ma Punaoa
Mo faamatalaga auiliili e uiga i le aoaoina o musika, tagai i le vaega 19.6 o le Tusitaulima Aoao. Afai e leai se tagata ta piano e maua mo sauniga a le uarota, tagai i le vaega 19.4.3.2 e faaaoga ai le musika ua pu’eina.
Taiala ma Aiaiga Faavae
Mo aiaiga ma taiala faaopoopo, e pei o le mauaina o musika, faaaogaina o mea faimusika o falelotu mo faataitaiga, po o aufaipese a le alalafaga, tagai i le vaega 19.7 o le Tusitaulima Aoao.