Ko Hoku Uiuiʻi ko ha Tokotaha Tā Piano pe ʻŌkani ʻa e Uōtí
Ngaahi Fatongiá
ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki ho uiuiʻí.
Taumuʻa ʻo e Hivá ʻi he Siasí
ʻOku fakatupulekina ʻe he ngaahi hiva toputapú ʻa e tui kia Sīsū Kalaisí. ʻOkú ne fakaafeʻi ʻa e Laumālié mo akoʻi ʻa e tokāteliné. ʻOkú ne toe fakatupu foki ha ongoʻi ʻapasia, fakauouangatahaʻi e kāingalotú, mo ʻomi ha founga ke moihū ai ki he Tamai Hēvaní mo Sīsū Kalaisi. Naʻe fakahā ʻe he ʻEikí, “‘Oku fiefia ʻa hoku laumālié ‘i he hiva ʻo e lotó” (Tokāteline mo e Ngaahi Fuakava 25:12). (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 19.1.)
Tokotaha Tā Piano pe ʻŌkani ʻa e Uōtí
ʻE tokoni ʻa e tokotaha tā piano pe ʻōkani ʻa e uōtí ki he kāingalotu ʻo e uōtí ke fakatupulaki ʻenau tui kia Sīsū Kalaisí ʻo fakafou ʻi he hiva toputapú. Te nau tā ʻa e ngaahi hiva talitalí mo e ngaahi hiva mātukú pea mo tā ʻa e ngaahi himí ʻi he lolotonga ʻo e houalotu sākalamēnití mo ha ngaahi fakataha kehe ʻa e uōtí ʻo ka fiemaʻu. ʻE lava foki ke tokoni ʻa e tokotaha tā pianó pe ʻōkaní ki he kuaeá pe hoko ko ha tokotaha tā piano ʻa e Palaimelí. (Vakai, 19.4.3.2).
Hiva ki he Ngaahi Fakatahaʻanga ʻa e Siasí
“ʻOku hoko ʻa e ngaahi hiva fakalaumālié ko ha konga mahuʻinga ʻo e ngaahi fakatahaʻanga hotau Siasí” (Ngaahi Himí, Talamuʻaki ʻa e Kau Palesitenisī ʻUluakí). ʻOku totonu ke akoʻi ʻe he ngaahi hiva ʻoku filí ʻa e ongoongoleleí ʻi he mālohi mo e mahino (vakai, 19.3.1).
Hiva ki he Houalotu Sākalamēnití
ʻOku kau ʻi he hiva ʻi he houalotu sākalamēnití ʻa hano hivaʻi ʻo e ngaahi himí ke fakaava mo tāpuni ʻa e fakatahá pea ʻi he kimuʻa pea fakahoko ʻa e sākalamēnití. ʻE lava foki ke kau ʻi he houalotu sākalamēnití ha himi ʻe taha pe lahi ange pe ngaahi polokalama hiva kehe. ʻE lava ke fakaʻaongaʻi ʻa e ngaahi himí pe ngaahi hiva toputapu kehé ki he fasi talitali mo e fasi mātukú, hiva ʻa e kuaeá, pea mo e hiva toko tahá pe fanga kiʻi polokalama fakakulupu īkí. (Vakai, 19.3.2.)
Akoʻí mo e Ngaahi Maʻuʻanga Tokoní
Ki he ngaahi fakaikiiki fekauʻaki mo e ako ki he hivá, vakai ki he konga 19.6 ʻo e Tohi Tuʻutuʻuni Fakakātoá. Kapau ʻoku ʻikai maʻu ha tokotaha tā piano pe ʻōkani ki he ngaahi fakataha fakauōtí, vakai ki he konga 19.4.3.2 ke maʻu ha meʻalea kuo ʻosi lekooti.
Ngaahi Fakahinohinó mo e Ngaahi Tuʻutuʻuní
Ke maʻu ha ngaahi tuʻutuʻuni mo ha ngaahi fakahinohino lahi ange, hangē ko hono maʻu ʻo e hivá, fakaʻaongaʻi ʻo e ngaahi meʻalea ki he falelotú ki he ako hivá, pe ngaahi kuaea ʻa e koló, vakai ki he konga 19.7 ʻo e Tohi Tuʻutuʻuni Fakakātoá.