ការហៅរបស់ខ្ញុំជាអ្នកលេងភ្លេងឲ្យក្រុមចម្រៀងវួដ
ការទទួលខុសត្រូវទាំងឡាយ
ព្រះអម្ចាស់មានអំណរគុណចំពោះឆន្ទៈរបស់អ្នកក្នុងការបម្រើនៅក្នុងសាសនាចក្ររបស់ទ្រង់ ។ ខាងក្រោមនេះជាទិដ្ឋភាពទូទៅមួយនៃការទទួលខុសត្រូវក្នុងការហៅរបស់អ្នក ។
គោលបំណងរបស់តន្រ្តីនៅក្នុងសាសនាចក្រ
តន្ត្រីពិសិដ្ឋបង្កើនសេចក្ដីជំនឿលើព្រះយេស៊ូវគ្រីស្ទ ។ តន្ដ្រីអញ្ជើញយាងព្រះវិញ្ញាណ និងបង្រៀនគោលលទ្ធិ ។ តន្ត្រីក៏បង្កើតឲ្យមានអារម្មណ៍គារវភាព បង្រួបបង្រួមសមាជិក និងផ្ដល់នូវរបៀបមួយដើម្បីថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទផងដែរ ។ ព្រះអម្ចាស់បានប្រកាសថា « ព្រលឹងរបស់យើងត្រេកអរចំពោះបទចម្រៀងពីចិត្ត » ( គោលលទ្ធិ និងសេចក្ដីសញ្ញា ២៥:១២ ) ។ ( សូមមើល ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ១៩.១ ) ។
អ្នកលេងភ្លេងឲ្យក្រុមចម្រៀងវួដ
អ្នកលេងភ្លេងឲ្យក្រុមចម្រៀងវួដជួយសមាជិកបង្កើនសេចក្តីជំនឿ និងថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទតាមរយៈតន្ត្រីដ៏ពិសិដ្ឋ ។ ពួកគេលេងសម្រាប់ការហាត់សមរបស់ក្រុមចម្រៀង និងនៅពេលក្រុមចម្រៀងច្រៀងនៅក្នុងការប្រជុំរបស់សាសនាចក្រ( សូមមើល ១៩.៤.៣.៣ ) ។
ក្រុមចម្រៀងវួដ
ក្រុមចម្រៀងក្នុងសាសនាចក្រនាំសិរីល្អថ្វាយដល់ព្រះ បង្រួបបង្រួម និងស្អាងសមាជិកសាសនាចក្រ ហើយនាំសេចក្ដីអំណរដល់អ្នកចូលរួម និងក្រុមជំនុំ ។ ក្រុមចម្រៀងទាំងឡាយត្រូវបានលើកទឹកចិត្តឲ្យប្រើទំនុកតម្កើងរបស់សាសនាចក្រដែលយាងព្រះវិញ្ញាណបរិសុទ្ធ និងជួយអ្នកចូលរួមក្នុងក្រុមចម្រៀង និងក្រុមជំនុំរៀនអំពីដំណឹងល្អ ( សូមមើល ទំនុកតម្កើង ៣៨១–៣៨៣ ) ។ ក្រុមចម្រៀងរបស់សាសនាចក្រក៏អាចច្រៀងតន្ត្រីពិសិដ្ឋដែលបានជ្រើសរើសដទៃទៀតផងដែរ ។ ការជ្រើសរើសតន្ត្រីគួរតែបង្រៀនដំណឹងល្អដោយព្រះចេស្តា និងភាពច្បាស់លាស់ ។ ( សូមមើល ១៩.៣ ) ។
គោលការណ៍ណែនាំ និងគោលនយោបាយទាំងឡាយ
ជាធម្មតា ការហាត់សមរបស់ក្រុមចម្រៀងមិនលើសពីមួយម៉ោងនោះទេ ។ សម្រាប់គោលនយោបាយ និងគោលការណ៍ណែនាំបន្ថែមដូចជា ការទទួលបានតន្ត្រី ការប្រើប្រាស់ឧបករណ៍តន្ត្រីរបស់សាលាប្រជុំសម្រាប់ការហាត់ ឬសម្រាប់ក្រុមចម្រៀងសហគមន៍ សូមមើលផ្នែក ១៩.៧ នៃ ក្បួនខ្នាតទូទៅ ។