iTavi eso

E vakavinavinakataka na Turaga na nomu lomasoli mo veiqaravi ena Nona Lotu. Oqo na ivakamacala ni nomu itavi ena nomu veikacivi.

iNaki ni Sere ena Lotu

Na sereivakatagi tabu e vakalevutaka na vakabauti Jisu Karisito. Ena sureta na Yalo ka vakavulica na ivunau. E bulia talega na yalo ni vakarokoroko, vakaduavatataki ira na lewenilotu, ka vakarautaka e dua na sala ni sokalou ki vua na Tamada Vakalomalagi kei Jisu Karisito. E kaya na Turaga, “Raica sa rekitaka na yaloqu na sere sa lagati ena yalodina” (Vunau kei na Veiyalayalati 25:12). (Raica na iVoladusidusi Raraba: Veiqaravi e Na Lotu i Jisu Karisito ni Yalododonu Edaidai, 19.1.)

Dairekita ni Sere ni Tabanalevu

Ena vukei ira na lewe ni tabanalevu na dairekita ni sere ena iteki me ra vakalevutaka na nodra vakabauta ka sokalou vua na Tamada Vakalomalagi kei Jisu Karisito ena ivakatagi tabu. Era na vakatura na sere me baleta na matasere ni tabanalevu, dusimaka na vakatasuasua ni matasere, ka liutaka na matasere ena soqoni ni Lotu (raica na 19.4.3.3).

Vei Matasere ni Tabanalevu

Na matasere ni Lotu e kauta mai na lagilagi ki vua na Kalou, me vakaduavatataki ka vakaqaqacotaki ira na lewe ni Lotu, ka kauta mai na reki vei ira era vakaitavi kei na ivavakoso. Era sa vakauqeti na matasere me ra vakayagataka na sere ni Lotu, ka sureta na Yalotabu ka vukei ira na vakaitavi ena matasere kei ira na ivavakoso mera vulica na kosipeli (raica na Sere ni Lotu,381–83). Sa rawa talega vei ira na matasere ni Lotu me ra lagata eso tale na ivakatagi tabu. Na sereivakatagi taucoko e dodonu me ra vakavulica na kosipeli ena kaukauwa kei na matata. (Raica na 30.8.)

iDusidusi kei na Lawatu

Na vakatovotovo ni matasere e sega ni dau sivita e dua na auwa. Me baleta na ikuri ni lawatu kei na idusidusi, me vaka na kena rawati na ivakatagi, vakayagataki ni iyaya ni cakacaka ni valenilotu ena vakatovotovo, se matasere ni itikotiko raraba, raica na wase 19.7 ni iVoladusidusi Raraba