Li k’a’ru teneb’anb’il

Nasaho’ xch’ool li Qaawa’ naq wan aach’ool chi k’anjelak sa’ lix Iglees a’an. Rub’el a’in wan jun xtusulal li k’a’ru teneb’anb’il sa’ laa b’oqb’al.

K’a’ru xk’anjel li b’ich sa’ li Iglees

Li loq’laj b’ich naxnimob’resi li paab’aal chirix li Jesukristo. Naxb’oq li Musiq’ej ut naxk’ut li tzol’leb’. Naxk’e chiqeek’a li oxloq’ink, chi wank sa’ junajil jo’ komon sa’ li Iglees, ut chixnimankil ru li qaChoxahil Yuwa’ ut li Jesukristo. Li Qaawa’ kixye, “Nasahoʼ li waam rikʼin lix bʼichahom li aamej” (Tzol’leb’ ut Sumwank 25:12). (Chi’ilmanq Jolomil K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 19.1.)

Laj b’eresinel b’ich sa’ li coro re li teep

Laj b’eresinel b’ich sa’ li coro re li teep naxtenq’aheb’ li komon sa’ li teep chixnimob’resinkil lix paab’aaleb’ ut lix loq’onihomeb’ chiru li qaChoxahil Yuwa’ ut li Jesukristo rik’ineb’ li loq’laj b’ich. A’an naxsik’eb’ ru li b’ich choq’ re li coro re li teep, naxkawresiheb’ laj b’ichanel, ut naxb’eresi li coro sa’eb’ li ch’utam re li Iglees (chi’ilmanq 19.4.3.3).

Eb’ li coro re teep

Eb’ li coro re teep neke’xk’e xloq’al li Dios, neke’xjunajiheb’ ut neke’xwaklesi xch’ooleb’ li komon re li Iglees, ut neke’xsahob’resi xch’ooleb’ li te’b’ichanq ut li te’ab’inq. Waklesinb’il xch’ooleb’ li coro chiroksinkileb’ li b’ich re li Iglees, li neke’xb’oq li Musiq’ej ut neke’xtenq’aheb’ laj b’ichanel ut laj ab’inel chixtzolb’al li evangelio (chi’ilmanq Eb’ li B’ich, 257–259). Eb’ li coro sa’ li Iglees naru ajwi’ neke’xb’icha jalaneb’ chik li loq’laj b’ich. Tento naq chixjunileb’ li b’ich te’xk’ut li evangelio rik’in wankilal ut chi ch’olch’o ru. (Chi’ilmanq 19.3.)

Li b’eresink ut li chaq’rab’ink

Li ch’uut re xtzolb’al ut xyalb’aleb’ li b’ich ink’a’ nab’ay numenaq jun hoor. Re xtawb’al xkomon chik li chaq’rab’ink ut li b’eresink, jo’ chirix xtawb’aleb’ li b’ich, li roksinkileb’ li wajb’ re li ch’utleb’aal kab’l, ut li coro re k’aleb’aal, chi’ilmanq li tasal 19.7 sa’ li Jolomil K’anjenel Hu.