Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki ho uiuiʻí.

Taumuʻa ʻo e Hivá ʻi he Siasí

ʻOku fakatupulekina ʻe he ngaahi hiva toputapú ʻa e tui kia Sīsū Kalaisí. ʻOkú ne fakaafeʻi ʻa e Laumālié mo akoʻi ʻa e tokāteliné. ʻOkú ne toe fakatupu foki ha ongoʻi ʻapasia, fakauouangatahaʻi ʻa e kāingalotú, mo ʻomi ha founga ke moihū ai ki he Tamai Hēvaní mo Sīsū Kalaisi. Naʻe fakahā ʻe he ʻEikí, “He ‘oku fiefia ʻa hoku laumālié ‘i he hiva ʻo e lotó” (Tokāteline mo e Ngaahi Fuakava 25:12). (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 19.1.)

Talēkita ʻo e Kuaea ʻa e Uōtí

ʻE tokoni ʻa e talēkita ʻo e kuaea ʻa e uōtí ki he kāingalotu ʻo e uōtí ke fakatupulaki ʻenau tui mo e lotu ki he Tamai Hēvaní mo Sīsū Kalaisi ʻo fakafou ʻi he hiva toputapú. Te nau fokotuʻu ʻa e hiva ki he kuaea ʻa e uōtí, tataki ʻa e ngaahi ako hiva ʻa e kuaeá, mo tataki ʻa e kuaeá ʻi he ngaahi fakatahaʻanga ʻa e Siasí (vakai, 19.4.3.3).

Ngaahi Kuaea ʻa e Uōtí

ʻOku ʻomi ʻe he ngaahi kuaea ʻo e Siasí ʻa e lāngilangi ki he ʻOtuá, fakatahaʻi mo langaki hake ʻa e kāingalotu ʻo e Siasí, pea mo ʻomi ha fiefia kiate kinautolu ʻoku kau ki aí pea mo e ngaahi haʻofangá. ʻOku poupouʻi ʻa e ngaahi kuaeá ke nau fakaʻaongaʻi ʻa e ngaahi himi ʻa e Siasí, ʻa ia ʻokú ne fakaafeʻi ʻa e Laumālié mo tokoniʻi ʻa kinautolu ʻoku kau mai ki he kuaeá mo e ngaahi haʻofangá ke nau ako ʻa e ongoongoleleí (vakai, Ngaahi Himí, 260–62). ʻE toe lava foki ke hivaʻi ʻe he ngaahi kuaea ʻa e Siasí ha ngaahi hiva toputapu kehe. Ko e ngaahi hiva kotoa pē ʻoku filí, ʻoku totonu ke nau akoʻi ʻa e ongoongoleleí ʻi he mālohi mo e mahino. (Vakai, 19.3.)

Ngaahi Fakahinohinó mo e Ngaahi Tuʻutuʻuní

Ko e ngaahi ako hiva ʻa e kuaeá ʻoku ʻikai faʻa lōloa ange ʻi he houa ʻe tahá. Ke maʻu ha ngaahi tuʻutuʻuni mo ha ngaahi fakahinohino lahi ange, hangē ko hono maʻu ʻo e hivá, fakaʻaongaʻi ʻo e ngaahi meʻalea ʻi he falelotú ki he ako hivá, pe ngaahi kuaea ʻa e koló, vakai ki he konga 19.7 ʻo e Tohi Tuʻutuʻuni Fakakātoá.