Ko Hoku Uiuiʻi ko ha Mataotao ki he Faingataʻaʻia Fakatuʻasinó

Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki ho uiuiʻí.

Kāingalotu ʻoku Faingataʻaʻia Fakatuʻasinó

“ʻOku poupouʻi ʻa e kāingalotu ʻo e Siasí ke nau muimui ʻi he sīpinga ʻa e Fakamoʻuí ʻo foaki ha ʻamanaki lelei, mahino, mo ha ʻofa kiate kinautolu ʻoku faingataʻaʻia fakatuʻasinó” (Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 38.8.27). Ko e meʻa te ke tokanga taha ki ai ʻi hoʻo hoko ko ha mataotao fakauooti ki he faingataʻaʻia fakatuʻasinó ke tokoniʻi ʻa e fakafoʻituituí ke nau teuteu ke fakahoko mo tauhi ʻa e ngaahi fuakava toputapú.

Mataotao ki he Faingataʻaʻia Fakatuʻasinó

ʻOku tokoni ʻa e mataotao ki he faingataʻaʻia fakatuʻasinó ki he kāingalotú mo e kau takí ʻi haʻane feinga ke maheni mo e niʻihi fakafoʻituitui ʻoku faingataʻaʻia fakatuʻasinó pea mo honau ngaahi fāmilí; tali ki he ngaahi fehuʻi mo e ngaahi hohaʻa fekauʻaki mo e faingataʻaʻia fakatuʻasinó mei he kau tauhí, kau takí, mo e niʻihi kehé; mo tokoniʻi ʻa e fakafoʻituituí ke nau maʻu ʻa e ngaahi naunau, ngaahi fakataha, mo e ngaahi ʻekitivitī ʻa e Siasí. ʻE lava foki ke tokoni ʻa e mataotaó ke ʻiloʻi ha ngaahi faingamālie mahuʻingamālie maʻá e kāingalotu ʻoku faingataʻaʻia fakatuʻasinó ke ngāué. (Vakai, 38.8.27.9.)

Ngaahi Fatongia Kehé

Feinga ke ʻiloʻi mo ako fekauʻaki mo e kāingalotu ʻi ho uōtí ʻoku faingataʻaʻia fakatuʻasinó. Fekumi ʻi he faʻa lotu ki ha tataki fakalaumālie fekauʻaki mo e founga ʻe lava ke fakakau mo poupouʻi ai ʻa e kāingalotu ko ʻení mo honau ngaahi fāmilí pe kau tauhí. Kole ke ke kau atu ki he ngaahi fakataha alēlea fakauōtí ke tokoni ke mahino ki he kau takí ʻa e founga te nau lava ai ʻo poupouʻi ʻa e kāingalotu ʻoku faingataʻaʻia fakatuʻasinó. Ke maʻu ha ngaahi maʻuʻanga tokoni lahi ange, vakai ki he disability.ChurchofJesusChrist.org.

Ngaahi Fakahinohinó mo e Ngaahi Tuʻutuʻuní

Ki ha ngaahi fakahinohino ki hono poupouʻi ʻo e kāingalotu ʻi he ngaahi falemahakí pe ngaahi senitā tauhí, vakai ki he konga 38.8.43 ʻi he Tohi Tuʻutuʻuni Fakakātoá. Ki ha ngaahi fakahinohino ki he ngaahi ouau maʻá e niʻihi fakafoʻituitui ʻoku faingataʻaʻia fakaeʻatamaí pe faingataʻaʻia fakatuʻasinó, vakai ki he konga 38.2.4 mo e 38.2.5.