iTavi eso

E vakavinavinakataka na Turaga na nomu lomasoli mo veiqaravi ena Nona Lotu. Na ivakamacala raraba ni itavi ena nomu veikacivi.

iNaki ni Sere ena Lotu

Na sereivakatagi tabu e vakalevutaka na vakabauti Jisu Karisito. Ena sureta na Yalo ka vakavulica na ivunau. E bulia talega na yalo ni vakarokoroko, vakaduavatataki ira na lewenilotu, ka vakarautaka e dua na sala ni sokalou vua na Tamada Vakalomalagi kei Jisu Karisito. “Raica sa rekitaka na yaloqu na sere sa lagati ena yalodina” (Vunau kei na Veiyalayalati 25:12). (Raica na iVoladusidusi Raraba: Veiqaravi e Na Lotu i Jisu Karisito ni Yalododonu Edaidai, 19.1.)

Kodineita ni Sere/iVakatagi ena Tabanalevu

Era na vukei ira na kodineita ni sere ena tabanalevu mera vakalevutaka na nodra vakabauta ka sokaloutaki Tamada Vakalomalagi kei Jisu Karisito ena ivakatagi tabu. Era veiqaravi ena veidusimaki ni bisopi. O ira na kodineita ni sere ena tabanalevu era ivurevure me baleti bisopi kei ira na iliuliu tale eso ni tabanalevu ena veika ni sere. Sa rawa vei ira na kodineita ni sere mera tiko ena bose ni matabose ni tabanalevu me vaka e kerea o bisopi. (Raica na 19.4.2.)

Sereivakatagi ni Soqoni ni Lotu

“Na ivakatagi veivakauqeti sa tiki bibi ni noda soqoni ni lotu” (Sere ni Lotu, iVakamacala Taumada ni Mataveiliutaki Taumada). Na ivakatagi e dodonu me vakavulica na kosipeli ena kaukauwa kei na matata (raica na 19.3.1).

Sereivakatagi ena Soqoni ni Sakaramede

Na sereivakatagi ena soqoni ni sakaramede e oka kina na lagati ni sere me dolavi ka sogoti kina na soqoni ni bera ni qai qaravi na sakaramede. Na soqoni ni sakaramede e rawa talega ni oka kina e dua se sivia na ikuri ni serenilotu se ivakatagi. Sa rawa me vakayagataki na serenilotu se sereivakatagi tabu digitaki tale eso me sere ni curu ka sere ni suka, sere ni matasere, kei na domodua se matasere ni ilawalawa lalai. (Raica na 19.3.2.)

Vuli kei na iVurevure

Era na vakatura ka dusimaki ira na lewenilotu na kodineita ni sere ena tabanalevu mera veiqaravi ena veikacivi ni sere ena tabanalevu. Era na veitokoni ka veidusimaki ka liutaka na veituberi ni sere kevaka e gadrevi vakakina. (Raica na 19.6.) Kevaka e sega ni tiko e dua na daunivakatagi me baleta na soqoni ni tabanalevu, raica na wase 19.4.3.2 ni iVoladusidusi Raraba me rawa ni raici na veivakatagi e rawa ni vakayagataki.

iDusidusi kei na Lawatu

Me baleta na ikuri ni lawatu kei na idusidusi, me vaka na kena tauri na ivakatagi, vakayagataki ni iyaya ni cakacaka ni valenilotu me vakatovotovotaki, se matasere ni itikotiko raraba, raica na wase 19.7 ni iVoladusidusi Raraba.