Tiutetauave

E faafetai le Alii mo lou naunauta’i e auauna atu i Lana Ekalesia. O loo i lalo se vaaiga aoao o tiutetauave mo lou valaauga.

Faamoemoega o Musika i le Ekalesia

O musika paia e faateleina ai le faatuatua ia Iesu Keriso. E valaaulia ai le Agaga ma aoao atu ai aoaoga faavae. E fatuina ai foi se lagona o le migao, soofaatasia tagata o le ekalesia, ma saunia se ala e tapuai ai i le Tama Faalelagi ma Iesu Keriso. Na folafola mai Alii, “Aua e fiafia lou agaga i le pese a le loto” (Mataupu Faavae ma Feagaiga 25:12). (Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 19.1.)

Taitai Faamaopoopo o Musika a le Uarota

E fesoasoani taitai faamaopoopo o musika a le uarota i tagata o le uarota e faateleina le faatuatua ma le tapuai i le Tama Faalelagi ma Iesu Keriso e ala i musika paia. Latou te galulue i lalo o le taitaiga a le epikopo. O taitai faamaopoopo o musika a le uarota o se punaoa mo le epikopo ma isi taitai o le uarota i mataupu tau musika. E mafai e taitai faamaopoopo o musika ona auai i fonotaga a aufono a uarota e pei ona talosagaina ai e le epikopo. (Tagai i le 19.4.2.)

Musika mo Sauniga a le Ekalesia

“O musika musuia o se vaega taua o a tatou sauniga faalelotu” (Viiga, Faatomuaga a le Au Peresitene Sili). O musika filifilia e tatau ona aoao atu le talalelei i le mana ma le manino (tagai i le 19.3.1).

Musika mo le Sauniga Faamanatuga

O musika i sauniga faamanatuga e aofia ai le lagiina o viiga e amata ma faaiuina ai le sauniga ma a o le’i faatautaia le faamanatuga. E mafai foi ona aofia ai i le sauniga faamanatuga se viiga faaopoopo se tasi pe sili atu po o aoaoga faamusika. O viiga po o isi musika paia filifilia e mafai ona faaaoga mo musika e muai tataina ma musika e muliai tataina, musika a le aufaipese, ma le solo po o ni polokalama a vaega toalaiti. (Tagai i le 19.3.2.)

Aoaoga ma Punaoa

E fautuaina ma aoao e taitai faamaopoopo o musika a le uarota ia tagata mo le auaunaga i valaauga o musika a le uarota. Latou te ofoina atu le lagolago ma aoaoga ma vaavaaia aoaoga faamasani faamusika pe a manaomia. (Tagai i le 19.6.) Afai e leai se tagata e taina le musika mo sauniga a le uarota, tagai i le vaega 19.4.3.2 o le Tusitaulima Aoao e faaaoga ai le musika ua pueina.

Taiala ma Aiaiga Faavae

Mo aiaiga ma taiala faaopoopo, e pei o le mauaina o musika, faaaogaina o mea faimusika o falelotu mo faataitaiga, po o aufaipese a le alalafaga, tagai i le vaega 19.7 o le Tusitaulima Aoao.