Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki ho uiuiʻí.

Taumuʻa ʻo e Hivá ʻi he Siasí

ʻOku fakatupulekina ʻe he ngaahi hiva toputapú ʻa e tui kia Sīsū Kalaisí. ʻOkú ne fakaafeʻi ʻa e Laumālié mo akoʻi ʻa e tokāteliné. ʻOkú ne toe fakatupu foki ha ongoʻi ʻapasia, fakauouangatahaʻi ʻa e kāingalotú, mo ʻomi ha founga ke moihū ai ki he Tamai Hēvaní mo Sīsū Kalaisi. Naʻe fakahā ʻe he ʻEikí, “He ‘oku fiefia ʻa hoku laumālié ‘i he hiva ʻo e lotó” (Tokāteline mo e Ngaahi Fuakava 25:12). (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 19.1.)

Kouʻotineita Mūsika ʻa e Uōtí

ʻE tokoni ʻa e kau kouʻotineita mūsika ʻa e uōtí ki he kāingalotu ʻo e uōtí ke fakatupulaki ʻenau tuí mo moihū ki he Tamai Hēvaní mo Sīsū Kalaisi ʻo fakafou ʻi he ngaahi hiva toputapú. Te nau ngāue ʻo fakatatau mo e fakahinohino ʻa e pīsopé. Ko e kau kouʻotineita mūsika ʻa e uōtí ko ha maʻuʻanga tokoni ia maʻá e pīsopé mo e kau taki kehe ʻo e uōtí ʻi he ngaahi meʻa fekauʻaki mo e mūsiká. ʻE lava ke kau ʻa e kau kouʻotineita mūsiká ʻi he ngaahi fakataha alēlea fakauōtí ʻo ka kole ʻe he pīsopé. (Vakai, 19.4.2.)

Hiva ki he Ngaahi Fakatahaʻanga ʻa e Siasí

“ʻOku hoko ʻa e ngaahi hiva fakalaumālié ko ha konga mahuʻinga ʻo e ngaahi fakatahaʻanga hotau Siasí” (Ngaahi Himí, Talamuʻaki ʻa e Kau Palesitenisī ʻUluakí). Ko e ngaahi hiva kotoa pē ʻoku filí, ʻoku totonu ke nau akoʻi ʻa e ongoongoleleí ʻi he mālohi mo e mahino (vakai, 19.3.1).

Hiva ki he Houalotu Sākalamēnití

ʻOku kau ʻi he hiva ʻi he houalotu sākalamēnití hano hivaʻi fakataha ʻo e ngaahi himí ke fakaava mo tāpuni ʻa e fakatahá pea mo e kimuʻa pea fakahoko ʻa e sākalamēnití. ʻE lava foki ke kau ʻi he houalotu sākalamēnití ha himi ʻe taha pe lahi ange pe ngaahi polokalama hiva kehe. ʻE lava ke fakaʻaongaʻi ʻa e ngaahi himí pe ngaahi hiva toputapu kehé ki he fasi talitali mo e fasi mātukū, hiva ʻa e kuaeá, pea mo e hiva tokotahá pe fanga kiʻi polokalama fakakulupu īkí. (Vakai, 19.3.2.)

Akó mo e Ngaahi Maʻuʻanga Tokoní

ʻE fokotuʻu ʻe he kau kouʻotineita mūsika ʻa e uōtí mo fakataukeiʻi ʻa e kāingalotú ʻi haʻanau ngāue ʻi he ngaahi fatongia fekauʻaki mo e hiva ʻi he uōtí. Te nau fai ha poupou mo ha fakahinohino pea mo tokangaʻi ʻa e ako ki he hivá ʻo ka fiemaʻu. (Vakai, 19.6.) Kapau ʻoku ʻikai maʻu ha taha tā piano pe ʻōkani ki he ngaahi fakataha fakauōtí, vakai ki he konga 19.4.3.2 ʻo e Tohi Tuʻutuʻuni Fakakātoá ke lava ʻo maʻu ʻa e meʻalea kuo lekōtí.

Ngaahi Fakahinohinó mo e Ngaahi Tuʻutuʻuní

Ke maʻu ha ngaahi tuʻutuʻuni mo ha ngaahi fakahinohino lahi ange, hangē ko hono maʻu ʻo e hivá, fakaʻaongaʻi ʻo e ngaahi meʻalea ki he falelotú ki he ako hivá, pe ngaahi kuaea ʻa e koló, vakai ki he konga 19.7 ʻo e Tohi Tuʻutuʻuni Fakakātoá.