Lin b’oqb’al jo’ aj b’eresinel b’ich sa’ li teep

Li k’a’ru teneb’anb’il

Nasaho’ xch’ool li Qaawa’ naq wan aach’ool chi k’anjelak sa’ lix Iglees a’an. Rub’el a’in wan jun xtusulal li k’a’ru teneb’anb’il sa’ laa b’oqb’al.

K’a’ru xk’anjel li b’ich sa’ li Iglees

Li loq’laj b’ich naxnimob’resi li paab’aal chirix li Jesukristo. Naxb’oq li Musiq’ej ut naxk’ut li tzol’leb’. Naxk’e chiqeek’a li oxloq’ink, chi wank sa’ junajil jo’ komon sa’ li Iglees, ut chixnimankil ru li qaChoxahil Yuwa’ ut li Jesukristo. Li Qaawa’ kixye, “Nasahoʼ li waam rikʼin lix bʼichahom li aamej” (Tzol’leb’ ut Sumwank 25:12). (Chi’ilmanq Jolomil K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 19.1.)

Laj b’eresinel b’ich sa’ li teep

Laj b’eresinel b’ich sa’ li teep naxtenq’aheb’ li komon sa’ li teep chixnimob’resinkil lix paab’aaleb’ ut lix loq’onihomeb’ chiru li qaChoxahil Yuwa’ ut li Jesukristo rik’ineb’ li loq’laj b’ich. Neke’xb’eresiheb’ li b’ich sa li ch’utam re li loq’laj wa’ak ut jalaneb’ chik li ch’utam wi tz’aamanb’il reheb’ (chi’ilmanq 19.4.3.1).

Eb’ li b’ich choq’ reheb’ li ch’utam re li Iglees

“Li bʼich li nawaklesin musiqʼej aʼan jwal aajel ru saʼebʼ li qachʼutam re li Iglees” (Ebʼ li Bʼich, Xtikibʼankil xbʼaan li Xbʼeenil Awaʼbʼejil). Tento naq eb’ li b’ich neke’xk’ut li evangelio rik’in wankilal ut chi ch’olch’o ru (chi’ilmanq 19.3.1).

Eb’ li b’ich choq’ re li ch’utam re li loq’laj wa’ak

Sa’ li ch’utam re li loq’laj wa’ak neke’b’ichaman sa’ komonil li b’ich sa’ xtiklajik ut sa’ xraqik li ch’utam ut rub’elaj naq nak’anjelaman li loq’laj wa’ak. Naru na’oksiman jun li b’ich li b’ichanb’il sa’ komonil malaj sa’ junesal sa’ xyi li ch’utam. Eb’ li b’ich malaj jalaneb’ chik li loq’laj b’ich naru neke’oksiman rub’elaj ut chirix li ch’utam, sa’eb’ li coro ut kok’ ch’uut. (Chi’ilmanq 19.3.2.)

Li tzolok ut eb’ li k’anjeleb’aal

Re xtawb’al li na’leb’ chirix li tzolok chirix li b’ichank, chi’ilmanq li tasal 19.6 sa’ li Jolomil K’anjenel Hu. Wi maak’a’ junaq aj toch’ol re li b’ich sa’ junaq ch’utam re oqech, chi’ilmanq li tasal 19.4.3.2 re xtawb’aleb’ li b’ich ak chapb’ileb’.

Li b’eresink ut li chaq’rab’ink

Re xtawb’al xkomon chik li chaq’rab’ink ut li b’eresink, jo’ chirix xtawb’aleb’ li b’ich, li roksinkileb’ li wajb’ re li ch’utleb’aal kab’l, ut li coro re k’aleb’aal, chi’ilmanq li tasal 19.7 sa’ li Jolomil K’anjenel Hu.