Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki ho uiuiʻí.

Taumuʻa ʻo e Hivá ʻi he Siasí

ʻOku fakatupulekina ʻe he ngaahi mūsika toputapú ʻa e tui kia Sīsū Kalaisí. ʻOkú ne fakaafeʻi ʻa e Laumālié mo akoʻi ʻa e tokāteliné. ʻOkú ne toe fakatupu foki ha ongoʻi ʻapasia, fakauouangatahaʻi ʻa e kāingalotú, mo ʻomi ha founga ke moihū ai ki he Tamai Hēvaní mo Sīsū Kalaisi. Naʻe fakahā ʻe he ʻEikí, “He ‘oku fiefia ʻa hoku laumālié ‘i he hiva ʻo e lotó” (Tokāteline mo e Ngaahi Fuakava 25:12). (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 19.1.)

Mataotao ʻi he Mūsiká ʻi he Uōtí

ʻE tokoni ʻa e kau mataotao ʻi he mūsiká ʻi he uōtí ki he kāingalotu ʻo e uōtí ke fakatupulaki ʻenau tuí mo e moihū ki he Tamai Hēvaní mo Sīsū Kalaisí ʻo fakafou ʻi he ngaahi hiva toputapú. ʻE lava ke ui kinautolu ke nau tokoni ʻi hono fakahoko ha akoʻi ʻo e hivá ʻi he uōtí (vakai, 19.4.3.5). Ki he ngaahi fakaikiiki fekauʻaki mo e ako ki he hivá, vakai ki he konga 19.6 ʻo e Tohi Tuʻutuʻuni Fakakātoá.

Ngaahi Fakahinohinó mo e Ngaahi Tuʻutuʻuní

Ke maʻu ha ngaahi tuʻutuʻuni mo ha ngaahi fakahinohino lahi ange, hangē ko hono maʻu ʻo e hivá, fakaʻaongaʻi ʻo e ngaahi meʻalea ki he falelotú ki he ako hivá, pe ngaahi kuaea ʻa e koló, vakai ki he konga 19.7 ʻo e Tohi Tuʻutuʻuni Fakakātoá.