Ol Responsabiliti

Lod i tangkyu from tingting blong yu blong wantem givim seves insaed long Jos blong Hem. Andanit ia i gat wan sot lukluk blong ol responsabiliti blong koling blong yu.

Stamba tingting blong Ol Yang Woman

Oganaesesen blong Ol Yang Woman i helpem ol pikinini gel blong God blong rere blong gobak long ples blong Hem. Oganaesesen blong Ol Yang Woman i helpem ol yang woman blong oli mekem mo kipim ol tabu kavenan, mo tu, blong oli mekem ol dip jenis long laef blong olgeta i go long Jisas Kraes mo gospel blong Hem. Insaed long ol klas blong olgeta, ol yang woman oli givim seves long ol narawan, oli mekem ol kavenan responsabiliti blong olgeta, oli bildimap yuniti, mo oli lan mo laef folem doktrin. (Luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 11.1.1.)

Presiden mo Presidensi

Presiden i givim seves long wod kaonsel wod mo wod yut kaonsel (luk long 11.3.4.4). Hem i oganaesem ol presidensi miting evri wik mo mit wetem bisop. Yang woman presidensi i givhan long ol yang woman taem oli stap traehad blong laef olsem ol disaepol blong Jisas Kraes. Oli tijim ol klas presidensi long responsabiliti blong olgeta mo sapotem olgeta taem oli stap lid. (Luk long 11.3.2.) Presiden i lukluk ova long ol rekod, ol ripot mo ol faenens. Ol kaonsela blong hem oli stap givim sapot. Presiden i givim kaonsel tu long ol yang woman abaot ol jalenj we oli no nidim blong luk bisop from, o i no gat abius insaed long hem.

Yut Lidasip

Presidensi blong Ol Yang Woman i sapotem ol lida blong yut. Ol klas presiden oli givim seves insaed long wod yut kaonsel. Ol klas presidensi oli lidim mo givhan long ol yang woman blong kam kolosap long Sevya mo tekpat long wok blong God blong fasin blong sevem man mo fasin blong kam olsem wan god. Wetem sapot blong ol adalt lida, olgeta i mekem ol plan blong seves projek, aktiviti, mo ol Sandei miting. (Luk long 11.3.4.2.)

Ol Sandei Klas

Ol bisoprik mo ol adalt lida blong Ol Yang Woman oli prea mo disaed olsem wanem blong oganaesem ol klas folem yia blong olgeta. Oli tingting blong givim ol janis blong lidasip long ol yang woman. Long wanwan klas, i nomata se klas i smol o i bigwan, i mas gat wan presiden mo, taem i posibol, i gat wan o tu kaonsela mo wan sekretari (luk long 11.1.3).

Seves mo Ol Aktiviti

Ol klas presidensi, we ol adalt lida oli sapotem, oli mekem plan blong seves mo ol aktiviti we i bildimap ol testemoni, mekem ol famli oli kam strong, mekem yuniti insaed long ol klas i kam moa strong, mo i givim ol janis blong blesem ol narawan (luk long 11.2.1.3). Ol seves mo ol aktiviti oli wan janis blong karem ol yut i kam tugeta mo serem glad blong stap laef folem gospel mo stap tekpat long Bigfala wok ia blong Lod.

Sam Moa Gaedlaen mo Polisi

Evri adalt we oli wok wetem ol pikinini mo yut oli mas finisim proteksen trening blong ol pikinini mo ol yut, hemia bifo wan manis i pas afta we oli sastenem olgeta (ProtectingChildren.ChurchofJesusChrist.org). Ol gaedlaen mo ol polisi abaot ol yang woman wetem disabiliti, ol simbol blong ol yut, mo plante moa, yu save faenem long seksen11.6 blong Jeneral Hanbuk.