Eddo ko

Irooj ej m̧ōņōņō kōn wūjlepļo̧k eo am̧ n̄an jerbal ilo Kabun̄ in An. Ijin ilaļ ej juon kōmeļeļein eddo ko ilo kūr eo am̧.

Jibadbad eo an Doulul eo an Jiron̄ ro

Doulul eo an Jiron̄ ro ej jipan̄ kōpooj leddik ro rejitōnbōro nejin Anij n̄an jepļaakļo̧k n̄an Im̧aan Mejān. Ej jipan̄ jiron̄ ro kōm̧m̧an im kōjparok bujen ko rekwojarjar im kam̧wūlaļļo̧k oktak tok eo aer n̄an Jisōs Kraist im gospel eo An. Ilo kūlaaj ko aer, jiron̄ ro rej jipan̄ doon, kakūrm̧ool eddo ko an bujen eo, kalōk bōro kuk, im ekkatak im mour kōn katak eo. (Lale Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 11.1.1.)

Būreejtōn im Būreejtōnji

Būreejtōn eo ej jerbal ilo ward ko̧o̧njeļ eo im ko̧o̧njeļ eo an jodikdik ro (lale 11.3.4.4). Ej kōm̧m̧ane kweilo̧k ko an būreejtōnji eo aolep iien im kweilo̧k ippān bisop eo. Būreejtōnji eo ej jerbal in karejar n̄an jiron̄ ro ilo aer erom̧ rikaļoor ro an Jisōs Kraist aolepān aer mour. Rej katakin kūlaaj būreejtōnji ro eddo ko aer im rie er ilo aer tōl. (Lale 11.3.2.) Būreejtōnj eo ej lale reko̧o̧t ko, riboot ko, im jāān ko. Rikakpilōklōk ro an rej leļo̧k jipan̄. Būreejtōn eo ej barāinwōt ko̧o̧njeļ ippān jiron̄ ro kōn apan̄ ko me ejjab aikuj bisop eo ak jab bōk jikin kakkure.

Ritōl ro an Jodikdik ro

Būreejtōnji eo an Doulul eo an Jiron̄ ro rej rie ritōl ro an jodikdik ro. Kūlaaj būreejtōn ro rej jerbal ilo ward ko̧o̧njeļ eo an jodikdik ro. Kūlaaj būreejtōnji ro rej tōl im jerbal in karejar n̄an jiron̄ ro ilo aer kepaakļo̧k er n̄an Rilo̧mo̧o̧r eo im bōk kuņaer ilo jerbal eo an lo̧mo̧o̧r eo an Anij im mour ijo ilōn̄ tata. Kōn jipan̄ an ritōl ro rerūtto, er remaron̄ karōke būroojāāk in jerbal in jipan̄ ko, m̧akūtkūt ko, im kweilo̧k ko an Jabōt. (Lale 11.3.4.2.)

Kūlaaj ko ilo Jabōt

Bisoprik ro im ritōl ro rerūtto ilo Doulul eo an Jiron̄ ro rej lukkuun jar im kāālet wāween n̄an karōk kūlaaj ko ekkar n̄an iiō ko. Rej ļōmņak kōn iien ko rem̧m̧an an ritōl n̄an jiron̄ ro. Kajjojo kūlaaj, mekarta ewi jon̄an, rej aikuji juon būreejtōn im, n̄e emaron̄, juon ak ruo rikakpilōklōk im juon rijeje (lale 11.1.3).

Jerbal in jipan̄ im M̧akūtkūt ko

Kūlaaj būreejtōnji ro, jipan̄ jān ritōl ro rerūtto, karōk jerbal in jipan̄ ko im m̧akūtkūt ko me rej kalōk naan in kam̧ool ko, kōkajoorļo̧k baam̧le ko, dāpij kūlaaj ko ippān doon, im leļo̧k iien ko rem̧m̧an n̄an kōjeraam̧m̧an ro jet (lale 11.2.1.3). Jerbal in Jipan̄ im m̧akūtkūt ko rej iien ko rem̧m̧an n̄an aiintok jodikdik ro im kwaļo̧k lan̄lōn̄ eo an mour kōn gospel eo im bōk kūņaad ilo jerbal in eļap an Irooj.

Unin Tōl im Kakien Ko

Aolep rūtto ro rej jerbal ippān ajri ro im jodikdik ro rej aikuj kadedeikļo̧k kaminene eo n̄an Kōjparok Ajri ro im Jodikdik ro ilowaan juon allōn̄ jān iien eo kar rejtake er (ProtectingChildren.ChurchofJesusChrist.org). Unin tōl ko im kakien ko kōn jiron̄ ro ewōr m̧ōjņo̧ ilo ānbwin, kōkkaļļe ko an jodikdik ro, im ebar lōn̄ maron̄ loi ilo jākjen 11.6 an Bok in Bōk Meļeļe Eļap.