Tiutetauave

E faafetai le Alii mo lou naunauta’i e auauna atu i Lana Ekalesia. O loo i lalo se vaaiga aoao o tiutetauave mo lou valaauga.

Faamoemoega o Tamaitai Talavou

O le faalapotopotoga a Tamaitai Talavou e fesoasoani i afafine faapelepele a le Atua e sauniuni e toe foi atu i Lona afioaga. E fesoasoani i tamaitai talavou e osia ma tausia feagaiga paia ma faalolotoina lo latou liua ia Iesu Keriso ma Lana talalelei. I a latou vasega, e auauna atu tamaitai talavou i isi, e faataunuuina tiutetauave o feagaiga, fausia le lotogatasi, ma aoao ma ola i aoaoga faavae. (Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 11.1.1.)

Peresitene ma le Au Peresitene

E auauna atu le peresitene i le aufono a le uarota ma le aufono a le autalavou a le uarota (tagai i le 11.3.4.4). Na te faia e le aunoa fonotaga a le au peresitene ma fono ma le epikopo. E auauna atu le au peresitene i tamaitai talavou a o avea i latou ma soo o Iesu Keriso i le olaga atoa. Latou te aoaoina au peresitene o vasega i o latou tiutetauave ma lagolagoina i latou a o latou taitai. (Tagai i le 11.3.2.) O le peresitene e vaavaaia faamaumauga, lipoti, ma mea tau tupe. E tuuina atu e ona fesoasoani le lagolago. E fefautuaai foi le peresitene ma tamaitai talavou e uiga i luitau e le manaomia ai le epikopo pe aofia ai sauaga.

Taitai o le Autalavou

O le au peresitene o Tamaitai Talavou e lagolagoina taitai talavou. O peresitene o vasega e i ai i le aufono a le autalavou o le uarota. O au peresitene o vasega e taitai ma auauna atu i tamaitai talavou a o latou faalatalata atili atu i le Faaola ma auai i le galuega a le Atua o le faaolataga ma le faaeaga. Faatasi ai ma le lagolago a taitai matutua, latou te fuafuaina galuega fesoasoani, gaoioiga, ma sauniga i Aso Sa. (Tagai i le 11.3.4.2.)

Vasega i Aso Sa

O au epikopo ma taitai matutua o Tamaitai Talavou e faia ma le agaga tatalo faai’uga pe faapefea ona faatulaga ia vasega e tusa ai ma tausaga. Latou te iloiloina avanoa faaletaitaiga mo tamaitai talavou. O vasega taitasi tusa po o le a le toatele, e tatau ona i ai se peresitene ma, i nofoaga e mafai ai, e toatasi pe toalua ni fesoasoani ma se failautusi (tamai i le 11.1.3).

Auaunaga ma Gaoioiga

O au peresitene o vasega, e lagolagoina e taitai matutua, e fuafuaina auaunaga ma gaoioiga ia e fausia ai molimau, faamalolosia ai aiga, uunaia ai le lotogatasi o le vasega, ma maua ai avanoa e faamanuia ai isi (tagai i le 11.2.1.3). O auaunaga ma gaoioiga o se avanoa lea e faapotopoto ai le autalavou ma faasoa atu le olioli o le ola ai i le talalelei ma auai i le galuega tele a le Alii.

Taiala ma Aiaiga Faavae

O tagata matutua uma e galulue ma tamaiti ma le autalavou e tatau ona faamae’aina le a’oa’oga o le Puipuiga o Tamaiti ma le Autalavou i totonu o le masina e tasi talu ona lagolagoina (ProtectingChildren.ChurchofJesusChrist.org). O taiala ma aiaiga faavae e faatatau i tamaitai talavou e i ai manaoga faapitoa, faatusa o le autalavou, ma isi o loo maua i le vaega 11.6 o le Tusitaulima Aoao.