Te mau hōpoi’a

’Ua māuruuru roa te Fatu nō tō ’oe hina’arora’a e tāvini i roto i tāna ’Ēkālēsia. E ’ite mai ’oe i raro nei i te hō’ē hi’ora’a rere ā manu o te mau hōpoi’a nō tō ’oe pi’ira’a.

Fā o te Feiā ’Āpī Tamāhine

E tauturu te ’āvirira’a o te Feiā ’Āpī Tamāhine i te mau tamāhine herehia a te Atua, ’ia fa’aineine nō te ho’i atu i mua i tōna aro. E tauturu te reira i te feiā ’āpī tamāhine ’ia rave ’e ’ia ha’apa’o i te mau fafaura’a mo’a ’e ’ia fa’ahōhonu i tō rātou fa’afāriura’a ia Iesu Mesia ’e i tāna ’evanelia. I roto i tā rātou piha tamâhine, e tāvini te feiā ’āpī tamāhine ia vetahi ’ē, e rave fa’aoti i te mau hōpoi’a i fafauhia, e patu i te tāhō’ēra’a, ’e e ha’api’i mai ’e e ora i te ha’api’ira’a tumu. (Hi’o Buka arata’i rahi : Te tāvinira’a i roto i Te ’Ēkālēsia a Iesu Mesia i te Feiā Mo’a i te mau Mahana Hope’a nei, 11.1.1.)

Te peresideni ’e te peresidenira’a

E tāvini te peresideni i roto i te ’āpo’ora’a pāroita ’e te ’āpo’ora’a feiā ’āpī pāroita (hi’o 11.3.4.4). E fa’atupu pinepine ’oia i te mau rurura’a a te peresidenira’a ’e e fārerei ato’a i te ’episekōpo. E aupuru te peresidenira’a i te feiā ’āpī tamāhine ’a riro ai rātou ’ei pipi nā Iesu Mesia nō te orara’a tā’āto’a. E ha’api’i rātou i te mau peresidenira’a piha tamāhine i tā rātou mau hōpoi’a ma te tauturu ia rātou i te fa’aterera’a. (Hi’o 11.3.2.) E hi’opo’a te peresideni i te mau pu’e parau, te mau parau fa’a’ite ’e te ’ohipa moni. E tauturu mai hōro’a tōna nā tauturu. E a’o ato’a te peresideni i te feiā ’āpī tamāhine nō ni’a i te mau fifi ’o tē ’ore e tītauhia te ’episekōpo ’aore rā, ’aita e vai ra te hāmani-’ino-ra’a.

Te fa’aterera’a feiā ’āpī

E tauturu te peresidenira’a o te Feiā ’Āpī Tamāhine i te feiā fa’atere feiā ’āpī. E tāvini te mau peresideni piha tamāhine i roto i te ’āpo’ora’a feiā ’āpī pāroita. E arata’i ’e e aupuru te mau peresidenira’a o te piha i te feiā ’āpī tamāhine, ’a ha’afātata atu ai rātou i te Fa’aora ’e ’a ’āmui mai ai i roto i te ohipa nō te fa’aorara’a ’e te fa’ateiteira’a a te Atua. Ma te tauturu a te feiā fa’atere pa’ari, e fa’anaho rātou i te mau ’ohipa tāvinira’a, te mau ’ātivite ’e te mau rurura’a i te sābati. (Hi’o 11.3.4.2.)

Te mau piha ha’api’ira’a i te sābati

Nā roto i te pure, e fa’aoti te ’episekōpora’a ’e te feiā fa’atere pa’ari o te Feiā ’Āpī Tamāhine, nāhea i te fa’anaho i te mau piha tamāhine ’ia au i te fāito matahiti. E feruri rātou i te mau rāve’a nō te feiā ’āpī tamāhine ’ia ’amo i te tahi hōpoi’a fa’aterera’a. I roto i te piha tamāhine tāta’itahi, noa atu ā te fāito, ’ei peresideni, ’e mai te mea e nehenehe, e hō’ē ’aore rā e piti tauturu ’e te hō’ē pāpa’i parau (hi’o 11.1.3).

Te ’ohipa tāvinira’a ’e te mau ’ātivite

E fa’anaho te mau peresidenira’a piha tamāhine, tauturuhia e te feiā fa’atere ta’ata pa’ari, i te ’ohipa tāvinira’a ’e te mau ’ātivite ’o tē patu i te ’itera’a pāpū, ’o tē ha’apūai i te ’utuāfare, ’o tē fa’atupu i te hō’ēra’a o te piha tamāhine, ’e ’o tē fa’afāna’o i te mau rāve’a nō te ha’amaita’i ia vetahi ’ē (hi’o 11.2.1.3). E rāve’a te ’ohipa tāvinira’a ’e te mau ’ātivite nō te ha’aputuputu i te feiā ’āpī ’e nō te ora ’āmui i te ’oa’oa nō te orara’a i te ’evanelia ’e te ’āmuira’a i roto i te ’ohipa pūai a te Fatu.

Te mau arata’ira’a ’e te mau fa’aturera’a

E ti’a i te mau ta’ata pa’ari ato’a e ’ohipa ’e te mau tamari’i ’e te feiā ’āpī, ’ia rave i te ha’api’ipi’ira’a nō ni’a i te pārurura’a i te mau tamari’i ’e te feiā ’āpī, i roto i te ’āva’e o tō rātou pāturura’ahia (ProtectingChildren.ChurchofJesusChrist.org). Te mau arata’ira’a ’e te mau fa’aturera’a nō ni’a i te feiā ’āpī tamāhine huma, te mau pīhi o te feiā ’āpī ’e tē vai atu ra, e ’itehia i roto i te tuha’a 11.6 o te Buka arata’i rahi.