Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki hoʻo uiuiʻí.

Taumuʻa ʻo e Kau Finemuí

ʻOku tokoni e houalotu ʻa e Kau Finemuí ki he ngaahi ʻofefine ʻofeina ʻa e ʻOtuá ke nau teuteu ke foki ki Hono ʻaó. ʻOku tokoni ia ke fakahoko mo tauhi ʻe he kau finemuí ʻa e ngaahi fuakava toputapú mo fakaloloto ʻenau ului kia Sīsū Kalaisí mo ʻEne ongoongoleleí. ʻI he ngaahi kalasi ʻa e kau finemuí, ʻoku nau tokoniʻi e niʻihi kehé ke fakahoko honau ngaahi fatongia he fuakavá, langaki ʻa e uouangatahá, pea ako mo moʻui ʻaki e tokāteliné. (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 11.1.1.)

Palesitení mo e Kau Palesitenisií

ʻOku kau ʻa e palesitení ʻi he fakataha alēlea ʻa e uōtí mo e fakataha alēlea ʻa e toʻu tupú ʻi he uōtí (vakai, 11.3.4.4). Te ne fakahoko maʻu pē ʻa e ngaahi fakataha fakapalesitenisií mo fakataha mo e pīsopé. ʻOku ngāue fakaetauhi ʻa e kau palesitenisií ki he kau finemuí ʻi heʻenau hoko ko e kau ākonga ʻa Sīsū Kalaisi ʻi he kotoa ʻo ʻenau moʻuí. Te nau akoʻi ki he kau palesitenisī fakakalasí honau ngaahi fatongiá mo poupouʻi kinautolu ʻi heʻenau takí. (Vakai, 11.3.2.) ʻE tokangaʻi ʻe he palesitení ʻa e ngaahi lekōtí, ngaahi lipōtí, mo e ngaahi meʻa fakapaʻangá. ʻOku poupouʻi ia ʻe hono ongo tokoní. ʻE toe talatalaifale foki ʻa e palesitení mo e kau finemuí fekauʻaki mo e ngaahi faingataʻa ʻoku ʻikai fiemaʻu ki ai ʻa e pīsopé pe kau ki ai ʻa e ngaohikoviá.

Kau Taki ʻo e Toʻu Tupú

ʻE poupouʻi ʻe he kau palesitenisī ʻo e Kau Finemuí ʻa e kau taki ʻo e toʻu tupú. ʻOku kau e kau palesiteni fakakalasí ʻi he fakataha alēlea fakauooti ʻa e toʻu tupú. ʻOku tataki mo ngāue fakaetauhi ʻa e kau palesitenisī fakakalasí ki he kau finemuí ʻi heʻenau ʻunu ke ofi ange ki he Fakamoʻuí mo kau ʻi he ngāue ʻa e ʻOtuá ki he fakamoʻuí mo e hakeakiʻí. ʻI he tokoni ʻa e kau taki kakai lalahí, te nau palani ha ngaahi ngāue tokoni, ngaahi ʻekitivitī, mo e ngaahi fakataha ʻi he Sāpaté. (Vakai, 11.3.4.2.)

Ngaahi Kalasi ʻi he Sāpaté

ʻE fakakaukauʻi ʻi he faʻa lotu ʻe he kau pīsopelikí mo e kau taki kakai lalahi ʻo e Kau Finemuí ha founga ke fokotuʻutuʻu ai e ngaahi kalasí ʻo fakatatau mo e taʻu motuʻá. Te nau fakakaukauʻi ha ngaahi faingamālie fakatakimuʻa maʻá e kau finemuí. Ko e kalasi kotoa pē, tatau ai pē pe ko e hā honau tokolahí, ʻoku totonu ke ʻi ai ha palesiteni, ko ha tokoni ʻe toko taha pe toko ua mo ha sekelitali (vakai, 11.1.3).

Ngāue Tokoní mo e Ngaahi ʻEkitivitií

ʻI hono poupouʻi e kau palesitenisī fakakalasí ʻe he kau taki kakai lalahí, ʻoku nau palani ha ngāue tokoni mo ha ngaahi ʻekitivitī te ne langaki e fakamoʻoní, fakamālohia e ngaahi fāmilí, tanumaki e uouangataha ʻa e kalasí, mo ʻoange ha ngaahi faingamālie ke tāpuekina ai e niʻihi kehé (vakai, 11.2.1.3). Ko e ngāue tokoní mo e ngaahi ʻekitivitií ko ha faingamālie ia ke tānaki ai ʻa e toʻu tupú pea vahevahe ʻa e fiefia ʻi hono moʻui ʻaki ʻo e ongoongoleleí mo kau ʻi he ngāue maʻongoʻonga ʻa e ʻEikí.

Ngaahi Fakahinohinó mo e Ngaahi Tuʻutuʻuní

Kuo pau ke fakakakato ʻe he kakai lalahi kotoa pē ʻoku ngāue mo e fānaú mo e toʻu tupú ʻa e ako ki hono Maluʻi ʻo e Fānaú mo e Toʻu Tupú ʻi loto he māhina ʻe taha hono hikinimaʻi kinautolú (ProtectingChildren.ChurchofJesusChrist.org). ʻOku maʻu ʻa e ngaahi fakahinohino mo e ngaahi tuʻutuʻuni fekauʻaki mo e kau finemui ʻoku faingataʻaʻia fakaesinó, ngaahi fakaʻilonga ʻo e toʻu tupú, mo ha meʻa lahi ange ʻi he vahe 11.6 ʻo e Tohi Tuʻutuʻuni Fakakātoá.