Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki hoʻo uiuiʻí.

Taumuʻa ʻo e Kau Finemuí

ʻOku tokoni e houalotu ʻa e Kau Finemuí ki he ngaahi ʻofefine ʻofeina ʻa e ʻOtuá ke nau teuteu ke foki ki Hono ʻaó. ʻOku tokoni ia ke fakahoko mo tauhi ʻe he kau finemuí ʻa e ngaahi fuakava toputapú mo fakaloloto ʻenau ului kia Sīsū Kalaisí mo ʻEne ongoongoleleí. ʻI he ngaahi kalasi ʻa e kau finemuí, ʻoku nau tokoniʻi e niʻihi kehé ke fakahoko honau ngaahi fatongia he fuakavá, langaki ʻa e uouangatahá, pea ako mo moʻui ʻaki e tokāteliné. (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 11.1.1.)

Sekelitalí

ʻE tokoni ʻa e sekelitali ʻo e Kau Finemuí ki he palesitení ʻi hono teuteu ʻo e ngaahi ʻasenitá, hiki ʻa e fakamatalá, mo muimuiʻi ʻa e ngaahi ngāue ki he ngaahi fakataha fakapalesitenisií. Te ne fakahinohinoʻi foki ʻa e kau sekelitali fakakalasí, tokoni kiate kinautolu ke tauhi ʻa e ngaahi lekooti ʻo e maʻulotú, mo tokoni ki he kau palesitenisī ʻo e Kau Finemuí ʻi hono teuteu ha patiseti mo ha fakamatala ki he ngaahi fakamolé (vakai, 11.3.3).

Ngaahi Kalasi ʻi he Sāpaté

ʻE fakakaukauʻi ʻi he faʻa lotu ʻe he kau pīsopelikí mo e kau taki kakai lalahi ʻo e Kau Finemuí ha founga ke fokotuʻutuʻu ai e ngaahi kalasí ʻo fakatatau mo e taʻu motuʻá. Te nau fakakaukauʻi ha ngaahi faingamālie fakatakimuʻa maʻá e kau finemuí. Ko e kalasi kotoa pē, tatau ai pē pe ko e hā honau tokolahí, ʻoku totonu ke ʻi ai ha palesiteni, ko ha tokoni ʻe toko taha pe toko ua mo ha sekelitali (vakai, 11.1.3).

Ngāue Tokoní mo e Ngaahi ʻEkitivitií

ʻI hono poupouʻi e kau palesitenisī fakakalasí ʻe he kau taki kakai lalahí, ʻoku nau palani ha ngāue tokoni mo ha ngaahi ʻekitivitī te ne langaki e fakamoʻoní, fakamālohia e ngaahi fāmilí, tanumaki e uouangataha ʻa e kalasí, mo ʻoange ha ngaahi faingamālie ke tāpuekina ai e niʻihi kehé (vakai, 11.2.1.3). Ko e ngāue tokoní mo e ngaahi ʻekitivitií ko ha faingamālie ia ke tānaki ai ʻa e toʻu tupú pea vahevahe ʻa e fiefia ʻi hono moʻui ʻaki ʻo e ongoongoleleí mo kau ʻi he ngāue maʻongoʻonga ʻa e ʻEikí.

Ngaahi Fakahinohinó mo e Ngaahi Tuʻutuʻuní

Kuo pau ke fakakakato ʻe he kakai lalahi kotoa pē ʻoku ngāue mo e fānaú mo e toʻu tupú ʻa e ako ki hono Maluʻi ʻo e Fānaú mo e Toʻu Tupú ʻi loto he māhina ʻe taha hono hikinimaʻi kinautolú (ProtectingChildren.ChurchofJesusChrist.org). ʻOku maʻu ʻa e ngaahi fakahinohino mo e ngaahi tuʻutuʻuni fekauʻaki mo e kau finemui ʻoku faingataʻaʻia fakaesinó, ngaahi fakaʻilonga ʻo e toʻu tupú, mo ha meʻa lahi ange ʻi he vahe 11.6 ʻo e Tohi Tuʻutuʻuni Fakakātoá.