Dagiti Pagrebbengan

Agyamyaman ti Apo iti kinatallugodmo nga agserbi iti Simbaanna. Adda iti baba ti pakagupgopan dagiti pagrebbengan para iti calling-mo.

Panggep ti Korum dagiti Elder

Tumulong ti Melchizedek Priesthood kadagiti annak ti Dios nga agsagana nga agsubli iti imatangna. Agtitinnulong dagiti miembro ti korum dagiti elder tapno maipatungpal ti aramid ti Dios iti pannakaisalakan ken pannakaitan-ok. Agserbida iti dadduma, ipatungpalda dagiti pagrebbenganda iti priesthood, mangbangonda iti panagkaykaysa, ken agsursuro ken agbiagda iti doktrina (kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 8.1).

Presidente ti Korum dagiti Elder

Isuro ti presidente ti korum dagiti elder dagiti miembro ti korum kadagiti pagrebbenganda iti priesthood. Maibilang kadagiti pagrebbengnna ti panagserbi iti konseho ti ward; panangbukel kadagiti panagkagumaan a kadua ti panguluen ti Relief Society; ken panangimaton iti ministering, dagiti aktibidad, report, rekord, ken pakaseknan iti kuarta. Tumulong kenkuana dagiti mamagbagaken secretary-na (kitaen iti 8.3.3.2).

Panguluen

Regular nga agmiting ti panguluen ti korum dagiti elder ken secretary. Ti panangtulong kadagiti inanamaen nga elder nga agsagana nga umawat iti Melchizedek Priesthood ket maysa kadagiti kangatuan a prioridad ti panguluen (kitaen iti 8.4).

Korum dagiti Elder ken Relief Society

Dagiti panguluen ti korum dagiti elder ken Relief Society ti mangitunos kadagiti naituding nga aramiden iti ministering ken tumulong a mangidaulo iti aramid iti templo ken family history ken panagkagumaan a mangawis iti amin nga umawat kadagiti bendision ti ebanghelio. Addaanda pay iti kangrunaan nga akem iti panangisuro kadagiti miembro ti ward kadagiti pagbatayan iti ministering, interbyu iti ministering, panagbiag iti linteg ti panagayuno, panangbukel iti panagpannuray iti bukod a kabaelan, ken panangpadur-as iti bukod ken sangapamiliaan a kinamanagsagana (kitaen iti 22.6.2).

Dagiti Miting iti Domingo

Agmimiting dagiti korum dagiti elder iti maikadua ken maikapat a Domingo ti bulan tapno mangpatibker iti pammati, mangbangon iti panagkaykaysa, ken mangpapigsa kadagiti pamilia ken pagtaengan. Nainkararagan a pilien ti panguluen ti korum dagiti elder dagiti mensahe manipud iti kaudian a sapasap a komperensia tapno aglilinnawag batay kadagiti kasapulan dagiti miembro (kitaen iti 8.2.1.2).

Serbisio ken dagiti Aktibidad

Mabalin a mangplano dagiti panguluen dagiti korum dagiti elder kadagiti aktibidad a mangpatibker kadagiti miembro ti korum ken mangted kadakuada kadagiti gundaway nga agserbi nga agkakadua (kitaen iti 8.2.1.3).

Dagiti Mainayon a Calling

Paglinnawagan ti bishop ken ti presidente ti korum dagiti elder ti panagkasapulan kadagiti mainayon a calling no kasapulan (kitaen iti 8.3.5).