Kūr eo aō āinwōt juon Būrejitōn an Doulul eo an Elder ro

Eddo ko

Irooj ej m̧ōņōņō kōn wujlepļo̧k eo am̧ n̄an jerbal ilo Kabun̄ eo An. Ijin ilaļ ej juon kōmeļeļe ekadu in eddo ko n̄an kūr eo am̧.

Jibadbad eo an Doulul eo an Elder ro

Melkisedek Priesthood eo ej jipan̄ ajri ro nejin Anij kōppopo n̄an jepļaakļo̧k n̄an Ippān. Ro uwaan doulul eo an elder ro rej jerbal ippān doon n̄an jipan̄ kōtōprak jerbal in lo̧mo̧o̧r eo an Anij im mour ijo eutiej tata. Rej jipan̄ ro jet, kakūrm̧ool jerbal in priesthood ko aer, kalōk ippān doon, im ekkatak im mour kōn katak (lale Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 8.1).

Būreejtōn eo an Doulul eo an Elder ro

Būreejtōn eo an doulul eo an elder ro ej katakin ro uwaan doulul eo kōn jerbal in priesthood ko aer. Eddo eo an ej bar koba jerbal ilo ward koonjeļ eo; karōki m̧akūtkūt ko ippān būreejtōnji eo an Doulul eo an Kōrā; im lale jerbal in karejar ko, m̧akūtkūt ko, ripoot ko, rekoot ko, im jrebal in jāān ko. Rikakpilōklōk ro im rijeje eo an rej jipan̄ e (lale 8.3.3.2).

Būreejtōnji

Būreejtōn eo an doulul eo an elder ro im rijeje eo rej kweilo̧k ippān doon ilo emakijkij. Jipan̄ em̧m̧aan ro rejjan̄in ekkapit n̄an elder kōppopo n̄an bōk Melkisedek Priesthood eo ej juon iaan eddo ko ilōn̄tata an būreejtōnji eo an doulul eo (lale 8.4).

Doulul eo an Elder ro im Doulul eo an Kōrā ro

Būreejtōnji ro an doulul eo an Elder ro im doulul eo an Kōrā ro rej loloorjake jerbal in karejar im jipan̄ tōl jerbal in tampeļ im menmenbwij an baam̧le im kijejeto ko n̄an kūr aolep n̄an bōk kōjeraam̧m̧an ko an gospel in. Ebar wōr aer jerbal in eddo ilo katakin ro uwaan ward eo pedped ko an jerbal in karejar, intōrpiu ko an jerbal in karejar, mour kōn kien jitlo̧k, kōļapļo̧k un̄are peid make, im kalōk mennin maanjapopo ko an juon make im an baam̧le (lale 22.6.2).

Kweilo̧k ko an Jabōt

Doulul eo an Elder eo rej ioon doon ilo Jabōt kein karuo im kaemen ilo kajojo allōn̄ n̄an kōļapļo̧k tōmak, kalōk ippān doon, im kōkajoorļo̧k baam̧le ko im m̧ōko. Būreejtōnji eo an doulul eo an elder ro rej jar im kāālet enaan ko jān kweilo̧k eo eļap ekāāl tata n̄an kōnono kake ekkar n̄an aikuj ko an membōr ro (lale 8.2.1.2).

Jerbal in jipan̄ im M̧akūtkūt ko

Būreejtōnji ro an doulul eo an elder ro remaron̄ karōk m̧akūtkūt ko n̄an kōkajoorļo̧k ro uwaan doulul eo im leļo̧k n̄an er iien em̧m̧an n̄an jerbal ippān doon (lale 8.2.1.3).

Kūr ko Jet

Bisop eo im būreejtōn eo an doulul eo an elder ro rej ekōnōnō kōn aikuj ko an kūr ko jet n̄e emennin aikuj (lale 8.3.5).