Ko Hoku Uiuiʻi ko ha Palesiteni ʻo e Kōlomu ʻo e Kaumātuʻá
Ngaahi Fatongiá
ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ʻi ho uiuiʻí.
Taumuʻa ʻo e Kōlomu ʻo e Kaumātuʻá
ʻOku tokoni ʻa e Lakanga Taulaʻeiki Faka-Melekisētekí ke teuteuʻi ʻa e fānau ʻa e ʻOtuá ke nau foki ki Hono ʻaó. ʻE ngāue fakataha ʻa e kau mēmipa ʻo e kōlomu ʻo e kaumātuʻá ke tokoni ki hono fakahoko ʻa e ngāue ʻa e ʻOtuá ki he fakamoʻuí mo e hakeakiʻí. Te nau tokoniʻi ʻa e niʻihi kehé, fakahoko ʻa e ngaahi fatongia ʻo e lakanga fakataulaʻeikí, langaki ʻa e uouangatahá, mo ako mo moʻui ʻaki ʻa e tokāteliné (vakai, Tohi Tuʻutuʻuni Fakakātoá: Ko e Ngāue ʻi Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 8.1).
Palesiteni ʻo e Kōlomu ʻo e Kaumātuʻá
ʻE akoʻi ʻe he palesiteni ʻo e kōlomu ʻo e kaumātuʻá ʻa e kau mēmipa ʻo e kōlomú ʻi honau ngaahi fatongia lakanga fakataulaʻeikí. ʻOku kau foki ʻi hono ngaahi fatongiá ʻa e tokoni ʻi he fakataha alēlea fakauōtí; fokotuʻutuʻu ʻa e ngaahi ngāue mo e kau palesitenisī ʻo e Fineʻofá; mo hono tokangaʻi ʻo e ngāue fakaetauhí, ngaahi ʻekitivitií, lipōtí, lekōtí, mo e ngaahi meʻa fakapaʻangá. ʻE tokoni kiate ia hono ongo tokoní mo e sekelitalí (vakai, 8.3.3.2).
Kau Palesitenisií
ʻE fakataha maʻu pē ʻa e kau palesitenisī ʻo e kōlomu ʻo e kaumātuʻá mo e sekelitalí. Ko hono tokoniʻi ʻo e kau teuteu kaumātuʻá ke nau teuteu ke maʻu ʻa e Lakanga Taulaʻeiki Faka-Melekisētekí ko e taha ia ʻo e ngaahi meʻa mahuʻinga taha ʻoku fakamuʻomuʻa ʻe he kau palesitenisī ʻo e kōlomú (vakai, 8.4).
Kōlomu ʻo e Kaumātuʻá mo e Fineʻofá
ʻOku fakafekauʻaki ʻe he kau palesitenisī ʻo e Kaumātuʻá mo e Fineʻofá ʻa hono vahe ʻo e ngāue fakaetauhí mo tokoni ke tataki ʻa e ngāue fakatemipalé mo e hisitōlia fakafāmilí pea mo e ngaahi ngāue ke fakaafeʻi ʻa e taha kotoa ke maʻu ʻa e ngaahi tāpuaki ʻo e ongoongoleleí. ʻOku ʻi ai foki honau fatongia mahuʻinga ʻi hono akoʻi ki he kāingalotu ʻo e uōtí ʻa e ngaahi tefitoʻi moʻoni ʻo e ngāue fakaetauhí, ʻinitaviu ngāue fakaetauhí, moʻui ʻaki ʻa e fono ʻo e ʻaukaí, langaki ʻa e moʻui fakafalala pē kiate kitá, mo hono fakatupulaki ʻo e mateuteu fakataautaha mo fakafāmilí (vakai, 22.6.2).
Ngaahi Fakataha ʻi he Sāpaté
ʻOku fakataha ʻa e ngaahi kōlomu ʻo e kaumātuʻá ʻi he Sāpate hono ua mo e fā ʻo e māhiná ke fakatupulaki ʻa e tuí, langaki ʻa e uouangatahá, mo fakamālohia ʻa e ngaahi fāmilí mo e ʻapí. ʻE fili ʻi he faʻa lotu ʻe he kau palesitenisī ʻo e kōlomu ʻo e kaumātuʻá ʻa e ngaahi pōpoaki mei he konifelenisi lahi fakamuimuitahá ke aleaʻi ʻo makatuʻunga ʻi he ngaahi fiemaʻu ʻa e kāingalotú (vakai, 8.2.1.2).
Ngāue Tokoní mo e Ngaahi ʻEkitivitií
ʻE lava ke palani ʻe he kau palesitenisī ʻo e kōlomu ʻo e kaumātuʻá ha ngaahi ʻekitivitī ke fakamālohia ai ʻa e kau mēmipa ʻo e kōlomú mo ʻoange ha ngaahi faingamālie ke nau ngāue fakataha (vakai, 8.2.1.3).
Ngaahi Uiuiʻi Kehé
ʻE aleaʻi ʻe he pīsopé mo e palesiteni ʻo e kōlomu ʻo e kaumātuʻá ʻa e fiemaʻu ha toe ngaahi uiuiʻi lahi ange ʻo ka fiemaʻu (vakai, 8.3.5).