Ol Responsabiliti

Lod i tangkyu from tingting blong yu blong wantem givim seves insaed long Jos blong Hem. Andanit ia i wan sot lukluk blong ol responsabiliti blong koling blong yu.

Stamba Tingting blong Kworom blong Ol Elda

Melkesedek Prishud i helpem ol pikinini blong God blong oli rere blong gobak stap wetem Hem, long ples blong Hem. Ol memba blong kworom blong ol elda, oli wok tugeta blong help blong mekem wok blong God blong fasin blong sevem man mo fasin blong kam olsem wan god, i hapen. Oli givim seves long ol narawan, mekem ol prishud wok blong olgeta, bildim yuniti, mo lanem mo laef folem doktrin (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 8.1).

Sekretari blong Kworom blong Ol Elda

Presidensi blong kworom blong ol elda mo sekretari oli gat miting evri taem. Ol responsabiliti blong sekretari i tekem tu ol wok ia blong stap redi long ol ajenda, tekem ol not, lukluk long ol asaenmen, stap putum taem blong ol givhan intaviu, stap rere mo givim ol atendens ripot, mo help blong redi long wan bajet (luk long 8.3.4).

Ol Sandei Miting

Presidensi blong kworom blong ol elda oli stap mit long nambatu mo namba fo Sandei blong manis blong leftemap fet, bildimap fasin blong stap wok wan, mo mekem ol famli mo ol hom oli kam moa strong. Presidensi blong kworom blong ol elda oli prea mo jusum ol mesej blong jeneral konfrens we i jes pas blong oli toktok raon long hem folem ol nid blong ol memba (luk long 8.2.1.2).

Seves mo Ol Aktiviti

Ol presidensi blong kworom blong ol elda oli save mekem plan blong ol aktiviti blong mekem ol memba blong kworom oli kam strong moa mo i givim olgeta ol janis blong oli givim seves tugeta (luk long 8.2.1.3).