Dagiti Pagrebbengan

Agyamyaman ti Apo iti kinatallugodmo nga agserbi iti Simbaanna. Adda iti baba ti pakabuklan dagiti pagrebbengan para iti calling-mo.

Panggep ti Korum dagiti Elder

Tumulong ti Melchizedek Priesthood kadagiti annak ti Dios nga agsagana nga agsubli iti imatangna. Agtitinnulong dagiti miembro ti korum dagiti elder tapno maipatungpal ti aramid ti Dios iti pannakaisalakan ken pannakaitan-ok. Agserbida iti dadduma, tungpalenda dagiti pagrebbenganda, mangbangonda iti panagkaykaysa, ken agsursuro ken agbiagda iti doktrina (kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 8.1).

Ti Secretary iti Korum dagiti Elder

Regular nga agkita ti panguluen ti korum dagiti elder ken secretary. Dagiti pagrebbengan ti secretary iramanna ti panagsagana kadagiti agenda, panagsurat kadagiti notes, panangsurot kadagiti annongen, panangiskediul kadagiti interbiu iti ministering, panangisagana ken panangipatulod kadagiti report ti itatabuno, ken panangtulong a mangisagana iti badyet (kitaen iti 8.3.4).

Dagiti Miting iti Domingo

Agmimiting dagiti korum dagiti elder iti maikadua ken maikapat a Domingo a mangpatibker iti pammati, mangbangon iti panagkaykaysa, ken mangpapigsa kadagiti pamilia ken pagtaengan. Nainkararagan a pilien ti panguluen ti korum dagiti elder dagiti mensahe manipud iti kaudian a sapasap a komperensia ti pagpapatangan a maibasar kadagiti kasapulan dagiti miembro (kitaen iti 8.2.1.2).

Serbisio ken dagiti Aktibidad

Mabalin a mangplano dagiti panguluen dagiti korum dagiti elder kadagiti aktibidad a mangpatibker kadagiti miembro ti korum ken mangted kadakuada kadagiti gundaway nga agserbi nga agkakadwa (kitaen iti 8.2.1.3).