O Lo’u Auala mo le Ola Tutoatasi

O Le Amataina

Tagata e Faatautaia:

1. Amata i se tatalo (ma se pese, pe a manaomia ).

2. E tuuina atu e se sui o le au peresitene o le siteki se folasaga ma se molimau e 3- i le 5-minute.

3. E valaaulia e se sui o le komiti a le siteki mo le ola tutoatasi le vaega atoa e susue a latou tamaitusi i le itulau e 2, ona mulimuli lea a o faitau e le sui o le komiti ia parakalafa e tolu o loo i lalo.

Susu mai i le faigalotu lenei O Lo’u Auala mo le Ola Tutoatasi. O le faamoemoega o lenei fonotaga o le fesoasoani lea ina ia e malamalama i le pogai ma le auala e mafai ai ona e atili ola tutoatasi. Nai lo o se tagata se toatasi e tautala e fai ma sui i le vaega, o le a tatou talanoaina mataupu i vaega toalaiti, faitau faatasi, mafaufau loloto ma tusitusi o tatou manatu.

O le itu aupito taua o lenei aafiaga o uunaiga ia e te maua e ala mai i le Agaga a o faaali mai e le Alii ia te oe mea e mafai ona e faia e avea atili ai e pei o Ia. Matou te uunaia outou e tusi nei uunaiga a o e mauaina ona e galue ai lea i na uunaiga.

I le faaiuga o lenei fonotaga, o le a valaaulia ai oe e filifili se vaega o le ola tutoatasi e mafai ona fesoasoani ia te oe ia ausia se tasi o mea nei:

• Saili se galuega pe faaleleia lau galuega o loo i ai nei

• Pulea lelei ai au lava mea tautupe po o mea tautupe a le aiga

• Filifili ai se ala faaleaoaoga ma faamanuiaina ai i le aoga

• Faatupulaia lau pisinisi laitiiti

Ae mo le taimi nei, sei o tatou faamasani teisi i le tasi ma le isi.

Tagata e Faatautaia: Fai atu i tagata auai taitoatasi i laulau taitasi e faaalu sina taimi ma faailoa puupuu atu i latou lava i isi o loo i a latou laulau. E le tatau ona sili atu ma le 30 po o le 40 sekone le umi.

O Le A Le Ola-Tutoatasi?

Faitau:O le faamoemoega o le polokalama taimua mo le ola-tutoatasi, o le fesoasoani lea i tagata taitoatasi ia fesoasoani ia i latou lava ia ola-tutoatasi. O le ola-tutoatasi e sili atu nai lo o le i ai o se galuega lelei, meaai e teu, po o tupe i le faletupe. O le ola-tutoatasi “o le tomai, tautinoga, ma le taumafaiga e saunia mea faaleagaga ma faaletino e manaomia o le olaga mo le tagata lava ia ma le aiga. A ola faalagolago tagata o le Ekalesia ia i latou lava, o le a sili atu ona latou auauna atu ma tausia isi,” ma o le galue e faapaleina o se mataupu faavae e pulea ai o latou olaga (Tusitaulima 2: Taitaiina o le Ekalesia [2010], 6.1.1).

Talanoa: O a ni uiga o se tagata e ola-tutoatasi? Mata e faalagolago tagata e ola-tutoatasi i fesoasoani mai le malo po o le Ekalesia pe afai e mafai ona latou galulue mo mea latou te manaomia?

O le Ola-Tutoatasi E Taua mo le Faaolataga

Faitau:Na aoao mai Peresitene Thomas S. Monson: “Ia tatou ola faalagolago ia i tatou lava ma ia ola-tutoatasi. E leai lava se isi mataupu faavae e mafai ona maua ai le faaolataga” (“Guiding Principles of Personal and Family Welfare,” Ensign, Sete. 1986, 3; sii mai ia Marion G. Romney, i le Conference Report, Oct. 1976, 167).

Talanoa: A o faateleina lou ola-tutoatasi, o faapefea ona avea oe e pei o le Tama Faalelagi?

O Le Faaleagaga ma le Faaletino e Tasi Lava

Gaoioiga a Vaega _{(3-4 minute)}

Ia talanoa o se vaega, i nisi o mea faaletino ma faaleagaga e manaomia o le olaga. Lisi i lalo nisi o mea.

Mea Faaletino e Manaomia o le Olaga	Mea Faaleagaga e Manaomia o le Olaga

Faitau:Ua aoao mai Peresitene Dieter F. Uchtdorf, “E pei o itu e lua o se tupe, o le faaletino ma le faaleagaga e le mafai ona tuueseeseina” (“O Le Faia i le Ala a le Alii,” Ensign po o le Liahona, Nov. 2011, 53). I tusitusiga paia, na folafola mai ai le Alii, “Ua faaleagaga mea uma lava ia te a’u, ma Ou te le’i tuuina atu lava ia te outou i soo se taimi se tulafono sa faaletino” (MF&F 29:34).

Talanoa: E mafai faapefea ona avea ma ni tulaga faaletino ma faaleagaga le sueina o se galuega ma le mauaina o se tupe e ola ai?

O Faapefea Mai Lou Ola Tutoatasi Faaletino ma Faaleagaga?

Gaoioiga Taitoatasi _{(5 minute)}

O le ola tutoatasi e manaomia ai le tomai, tautinoga, ma le taumafaiga. Ia fai e oe lava ia, tuu se faailoga faasao i atigipusa taitasi e sili ona faatatau ia te oe. Ia faamaoni ia te oe lava ia. Afai e te le toafimalie i le faailogaina faalauaitele o nei mea, ia ufi au tali.

	Le’i faia lava	Seāseā	O nisi taimi	Tele o taimi	Taimi uma
Ua ia te au ni tomai e saunia ai mo mea ou te manaomia.
E i ai sa’u paketi ma o loo mulimuli i ai.
Ou te sefeina le tupe.
Ua leai sa’u aitalafu (sei vagana ai se aitalafu mo le a’oga po o le fale).
O lo’u olaga o loo faatotonugalemu i mea e sili ona taua.
Ou te tatalo ma suesue i tusitusiga paia i aso uma.
Ou te lagonaina uunaiga i aso taitasi mai le Agaga i lo’u olaga.
Ou te totogiina le sefuluai ma taulaga anapogi.
Ou te ai ma inu i le faamanatuga i vaiaso uma.
Ou te agavaa mo se pepa faataga o le malumalu.
Ua i ai sau galuega e tuuina mai ai mea ou te manaomia.
Ou te taulimaina ou manaoga e aunoa ma le faalagolago i polokalama a le malo.
Ou te totogiina lau lisi po o le mokesi faalemasina.
E lava lau tausiga faafomai o loo maua.
O loo mafai ona aooga lau fanau.
E mafai ona ou auauna atu i isi i o latou taimi o mafatiaga.

Mafaufau Loloto:O i ai ni mea e manaomia ona e suia ina ia e ola tutoatasi ai? O le a le tulaga o le a i ai lou olaga pe a e faaleleia aitema o loo taua i luga?

E Faapefea Ona Faateleina Lo’u Ola-Tutoatasi?

1. E Mafai Ona Fesoasoani le Alii Ia te Oe Ia E Ola Tutoatasi

Maimoa:“I Will Provide for My Saints,” o loo maua i le srs.lds.org/videos. (Leai se vitio? Faaauau le faitau.)

Gaoioiga a Vaega _{(5 minute)}

O loo i lalo le tusi na faasoa mai e Peresitene Dieter F. Uchtdorf i le vitio.

O se vaega:

1. Ia feauauai i le faitauina o parakalafa taitasi.

2. Mo parakalafa taitasi, ia fai mea nei:

   • Vase lalo o faamanuiaga faapitoa na folafola mai e le Au Peresitene Sili.

   • Li’o mea e ao ona e faia ia maua ai na faamanuiaga.

   • Ia talanoa puupuu i mea o e aoaoina.

Uso e ma Tuafafine Pele:

Ua folafola mai e le Alii, “O lo’u faamoemoe o le faia lea o mea mo la’u au paia” (MF&F 104:15). O lenei faaaliga o se folafolaga mai le Alii o le a Ia saunia ni faamanuiaga faaletino ma tatala faitotoa o le ola tutoatasi, o le mafai lea e i tatou ona saunia mea manaomia o le olaga mo i tatou lava ma tagata o o tatou aiga.

Ua saunia lenei tamaitusi e fesoasoani i tagata o le Ekalesia ia aoao ai ma faatino mataupu faavae o le faatuatua, aoga, galue malosi, ma faalagolago i le Alii. O le taliaina ma ola ai i nei mataupu faavae o le a mafai ai ona e maua faamanuiaga faaletino na folafola mai e le Alii.

Matou te valaaulia oe ina ia suesue ma le filiga ma faaaoga nei mataupu faavae ma aoao atu i tagata o lou aiga. Ma o lou faia o lea mea, o le a faamanuiaina ai lou olaga. O le a e aoao pe faapefea ona e faatinoina lou auala e agai atu ai i le ola tutoatasi. O le a faamanuiaina oe ma se faamoemoega sili atu, toafilemu, ma le alualu i luma.

Faamolemole ia e mautinoa o oe o se atalii po o se afafine o lo tatou Tama oi le Lagi. E alofa o Ia ia te oe ma o le a le tuulafoaia lava oe. Na te silafia oe ma ua sauni e tuuina atu ia te oe faamanuiaga faaleagaga ma faaletino o le ola tutoatasi.

Ma le faamaoni lava,

O Le Au Peresitene Sili

Mafaufau Loloto:O a ni mea e mafai ona ou faia e au lava ia e maua ai le “faamoemoega sili atu, toafilemu, ma le alualu i luma” ua folafola mai e le Au Peresitene Sili?

2. E Mafai Ona Fesoasoani Tusitusiga Paia Ia te Oe Ia E Ola Tutoatasi

Faitau:E tele auala e fesoasoani mai ai le Alii ia i tatou pe a tatou faatino le faatuatua ia te Ia. O se tasi o meafaigaluega ua Ia tuuina mai ia i tatou o tusitusiga paia. Na aoao mai le perofeta o Nifae, “Ia taumamafa fiafia i afioga a Keriso; aua faauta, o afioga a Keriso o le a ta’u mai ai ia te outou mea uma e tatau ona outou faia” (2 Nifae 32:3).

Talanoa: O anafea na tuuina atu ai e tusitusiga paia le taitaiga patino i lou olaga?

Gaoioiga a Vaega _{(5-7 minute)}

Ua tuuina mai le Tusi a Mamona o se meafaigaluega mo o tatou aso. Afai tatou te faatatauina fuaiupu o le Tusi a Mamona i o tatou lava olaga, o le a tatou maua taitaiga uma e manaomia. O se vaega, ia faitau ma talanoa i faamatalaga taitasi o loo i lalo mai perofeta ma aposetolo. Vase lalo o faamanuiaga ua folafola mai, mo le suesueina ma le faatatauina o tusitusiga paia.

Henry B. Eyring: “O le alu i tusitusiga paia ia iloa ai le mea e fai, e faia ai se eseesega atoa. … O le a tatou maua tali i tusitusiga paia. E foliga o aloalo mai le Alii i o tatou faafitauli ma manaoga uma, ma Ia tuuina ai fesoasoani i tusitusiga paia mo i tatou—pe afai e na o lo tatou saili lava i ai” (“A Discussion on Scripture Study,” Ensign, Iulai 2005, 24).

Boyd K. Packer: “E leai se faafitauli ogaoga tatou te feagai e le mafai ona puipuia mai ai i tatou pe afai tatou te iloa faaaliga” (“Teach the Scriptures,” Teaching Seminary Preservice Readings Religion 370, 471, ma le 475 [2004], 75).

Richard G. Scott: “O le Tusi a Mamona o loo i ai tali mo faafitauli tatou te fetaiai i aso taitasi o le olaga” (“The Power of the Book of Mormon in My Life,” Ensign, Oke. 1984, 10).

M. Russell Ballard: “O le Tusi a Mamona, mai i tusi uma lava ua ou iloa, o le punaoa silisili lea mo tali i faafitauli moni o le olaga” (i le “We Add Our Witness,” Ensign, Mat. 1989, 8).

Russell M. Nelson: “E te manao e lafoai ese se mausa leaga? E te manao e faaleleia atili sootaga i lou aiga? E te manao e faateleina lou gafatia faaleagaga? Faitau i le Tusi a Mamona! O le e latalata atili atu ai i le Alii ma Lona mana alofa” (“A Testimony of the Book of Mormon,” Ensign, Nov. 1999, 71).

Mafaufau loloto:A o ou saili ia atili ola-tutoatasi, o le a se mea e mafai ona ou faia e maua atili ai le taitaiga patino mai tusitusiga paia?

3. O le Auai i se Vaega mo le Ola-Tutoatasi e Mafai Ona Fesoasoani i Lou Amataina

Faitau:Ina ia fesoasoani ia e ola-tutoatasi, e te maua se avanoa e auai ai i se vaega mo le ola-tutoatasi i lau uarota po o le siteki. O se vaega mo le ola-tutoatasi, o se vaega o tagata taitoatasi o e e fono faatasi e aoao ma faaaoga tomai aoga mo galuega, aoga, ma mea tautupe.

O vaega mo le ola-tutoatasi e masani ona fono i vaiaso taitasi mo le lua itula i se periota e tolu masina. O fonotaga e mulimuli i le faiga lava lea e tasi e pei o le faigalotu lenei. O tagata o vaega e faitau ma talanoa faatasi, fai gaoioiga, ma mafaufau loloto taitoatasi ina ia mafai ona musuia i latou e le Agaga Paia i le ala e galulue ai.

O se vaega mo le ola-tutoatasi e ese mai i le tele o vasega a le Ekalesia. E leai se faiaoga! Nai lo o lena, e galulue le vaega o se aufono ae o le Agaga Paia o le faiaoga. E soalaupule faatasi tagata o le vasega a o latou aoao i tomai fou, foia faafitauli, tuuto e fai ni mea i le aluga o le vaiaso, ma lipoti mai a latou taumafaiga.

E atinae foi e tagata o le vaega ni faauoga malolosi ma lagona le alofa o le Atua a o latou galulue faatasi. E ala i le auai i se vaega, e le gata o le a e manuia ai, ae e mafai foi ona avea oe o se auaunaga tele i le fesoasoani atu i isi tagata i lo latou ala i le ola tutoatasi!

Maimoa:“The Power of the Group,” o loo maua i le srs.lds.org/videos. (Leai se vitio? Faaauau le faitau.)

Tagata e Faatautaia: Afai e i ai, ia valaaulia se tasi na auai muamua i se vaega mo le ola-tutoatasi e faasoa puupuu mai (mo le tolu minute) lona aafiaga.

O Fea le Vaega mo le Ola-Tutoatasi e Tatau ona E Auai Ai?

Maimoa:“Choosing a Self-Reliance Group,” o loo maua i le srs.lds.org/videos. (Leai se vitio? Faitau aotelega a le vaega o loo i le itulau 11.)

Gaoioiga Taitoatasi _{(3-4 minute)}

Ia faitau nao oe lava, ia faamatalaga o loo i lalo, ma lio faamatalaga e faatatau ia te oe. O loo i le itulau 11se aotelega o vaega taitasi.

	Saili se Galuega Lelei Atu	Tupe Patino	A’oga mo se Galuega Lelei Atu	Amataina ma le Faaolaina o La’u Pisinisi
Ou te manaomia vave le tupe.	✓
E leai sa’u galuega.	✓
Ou te manaomia se galuega e lelei atu.	✓
Ou te fia sefeina se tupe.		✓
Ou te manao e aveese aitalafu.		✓
Ou te manao ia saunia i tulaga tautupe mo le lumanai.		✓
Ou te manaomia le aotauina po o se aoaoga faamasani ina ia maua ai se galuega lelei atu pe amata ai se matata fou.			✓
Ou te manaomia le fesoasoani i le filifilia o la’u auala faaleaoaoga.			✓
Ou te manao e faamanuiaina i le aoga.			✓
Ou te fia iloa atili e uiga i [avanoa] o loo ofoina mai e aoga a le Ekalesia, e pei o le Pathway (tagai i le itulau 12).			✓
O loo i ai sa’u pisinisi i le taimi nei.				✓
O loo i ai au punaoa e amata ai se pisinisi.				✓
E mafai ona ou lagolagoina au lava a o amataina se pisinisi.				✓
Ou te manao e faateleina lo’u faatuatua ia Iesu Keriso.	✓	✓	✓	✓

Faitau:O le faia o suiga i o tatou olaga e manaomia ai le faatuatua ma taumafaiga. Ina ia e alualu i luma, e manaomia ona e tuuto i le faia o mea nei:

• Auai i vaiaso uma lava (e masani lava e 2 itula i vaiaso taitasi mo le 3 masina.

• Faatino tautinoga i le aluga o le vaiaso.

• Uunaia isi i le vaega ia faamanuiaina.

• Fai pe a ma le 4 i le 10 itula o galuega i le vaiaso i fafo atu o fonotaga a le vaega.

Mafaufau loloto:O le fea o vaega e sili ona fetaui ma lo’u tulaga? Pe o ou naunau e faia nei tautinoga ina ia atili ola- tutoatasi ai.

Aotelega a Vaega

I vaega taitasi e fa o le ola-tutoatasi, e suesue ai e tagata ma faataitai mataupu faavae mai le tamaitusi O Lo’u Faavae mo le Ola Tutoatasi. E faia lenei mea i le amataga o fonotaga taitasi a vaega, ona o le aoaoina o nei mataupu faavae autu ma tomai, e fesoasoani ai i tagata o le vaega ia alualu i luma faaletino ma faaleagaga, e tusa lava po o le a le auala ua filifilia. O le a maua e tagata o le vaega le faatuatua faateleina i le mana o Iesu Keriso e tuuina atu ai mea latou te [manaomia]. O le a latou faataitaia foi tomai o le olaga, e aofia ai le pulea o le taimi, fesootaiga, ma le foia o faafitauli.

Saili se Galuega Lelei Atu

Mo i latou o loo saili galuega po o se galuega lelei atu. O le a aoao ai e tagata o le vaega ia iloa avanoa, upega fesootai, faailoa atu i latou lava ma le atamai, ma saunia mo faatalanoaga mo galuega. O le a latou faatutuina foi ni sini mo ni tagata e faafesootai ma faatalanoaga.

Tupe Patino

Mo i latou o e mananao ia pulea lelei atu a latou tupe. O le a aoao ai e tagata o le vaega le auala e aveese ai aitalafu, puipuia ai faasaga i faafitauli tautupe, ma inivesi mo le lumanai. O le a latou fatuina ai se fuafuaga faaletupe ma mulimuli i se paketi. E fautuaina ulugalii ia auai faatasi.

A’oga mo se Galuega Lelei Atu

Mo i latou o e manaomia se aotauina po o se aoaoga faamasani faaopoopo mo le mauaina o se galuega. O le a sailiili, fatu, ma tuuina atu e tagata o le vaega ni fuafuaga mo ni matata ma aoga. O le a latou faaaluina foi le taimi i vaiaso taitasi e faataitai ai tomai ia o le a fesoasoani e avea ai i latou o ni tagata aoao mataalia.

Amataina ma le Faaolaina o La’u Pisinisi

Mo i latou o e ua i ai se pisinisi po o punaoa e amata ai se pisinisi. E aoaoina e tagata o le vaega ia auala ma tomai o ni tagata e anaina ni pisinisi laiti faamanuiaina. Latou te faataitaia le tausiga o faamaumauga, maketi, ma le puleaina o tinoitupe. O le a latou talanoa ma tagata e anaina pisinisi, tagata faatau, ma le au sapalai, ma atinae ni fuafuaga e faaola ai a latou pisinisi.

Filifili se Vaega

O le a fesoasoani atu nei se sui o le komiti mo le ola tutoatasi ia te outou e faatulaga i ni vaega mo le ola tutoatasi. A ua e filifilia loa lau vaega, ia tusi i lalo faamatalaga nei.

Fonotaga a La’u Vaega mo le Ola-Tutoatasi
Aso:
Taimi:
Nofoaga:
Igoa o le Tagata e Faatautaia:
Numera o le telefoni:

Tagata e Faatautaia: Atonu o le a manao le taitai pulefaamalumalu e faasoa atu se molimau puupuu.

Faaiu i se tatalo.

Avanoa Faaleaoaoga a le OAE

Ua ofoina atu e le Ofisa o Aoga a le Ekalesia (OAE) ni avanoa faaleaoaoga e maualalo le tau lea e mafai ona taitai atu ai i galuega lelei atu. E aofia ai:

• Kosi ma aoaoga pupuu e faia i luga o le Initoneti mai le LDS Business College lea e fesoasoani e te agavaa ai mo se galuega faapitoa, oo i se tulaga maualuga i lau galuega o i ai nei, po o le maua o se tusifaamaonia. O kosi e mai le umi e 15 minute e oo i le 12 vaiaso ma e mafai ona taitai atu ai i se avanoa mautinoa mo se faatalanoaga mo se galuega.

• O le Pathway o se polokalama e tasi le tausaga lea e fesoasoani e te saunia ai mo le, po o le toe foi atu i le iunivesite. E fai e tagata aoga ni kosi i luga o le initoneti ma auai i faapotopotoga i le lotoifale. Pe a faamaeaina, e mafai e tagata aoga ona galulue agai atu i se tusifaamaonia po o se tikeri i aoga i le lotoifale, BYU-Idaho, po o le LDS Business College. O le Pathway e manaomia ai le tulaga feololo o le Igilisi

Ina ia saili po o a mea o avanoa i le tou eria, asiasi i le churcheducation.lds.org

O Le Auala e Faia ai se Faigalotu o Lo’u Auala

Faatonuga mo le Komiti mo le Ola-Tutoatasi a le Siteki

A o Loma le Faigalotu:

• Iloilo ma faatumu e oe lava le tamaitusi lenei.

• Oka ia lava ni tamaitusi O Lo’u Auala mo le Ola Tutoatasi mo tagata auai (store.lds.org).

• Ia lava ni peniutu po o ni penitala mo tagata auai.

• Ia faatulaga ia lava ni laulau lapotopoto i totonu o le falefaafiafia.

• Ia i ai sui taitoatasi o le komiti mo le ola-tutoatasi i faitotoa taitasi e faafeiloai i latou e auai atu, ma ia faatasi atu ma tagata auai i laulau.

• Valaaulia se tagata sa auai i se vaega na muamua atu e faasoa atu ona aafiaga i le faigalotu pe a mafai (tagai i le itulau 9).

• Asiasi i le srs.lds.org/report e sii mai ai le Fomu o le Lipoti o le Faigalotu e faatumu i le taimi o le faigalotu.

I le Taimi o le Faigalotu:

• Ia i ai se sui o le komiti i laulau taitasi e uunaia ai le auai o le vaega ma faatumau le sologa lelei o mea.

• Faamanatu atu i tagata auai e tape a latou telefoni feaveai.

• Mafaufau e amata le faigalotu i se pese, se tatalo, ma se faafeiloaiga puupuu (3–5 minute) mai se taitai perisitua po o se sui o le siteki o le komiti mo le ola tutoatasi.

• Mulimuli i anomea e pei ona tusia i le tamaitusi.

• Tuu atu i tagata e faatautaia vaega taitasi e tusi ia igoa ma numera o telefoni o tagata taitoatasi na auai i lana vaega. I le fonotaga muamua a le vaega, o le a faatumu ai e tagata taitoatasi e faatautaia se pepa lesitala auiliili a le vaega.

• Afai e tele se eria o le siteki, e mafai ona tagai le komiti a le siteki e vaevae vaega e tusa ai ma nofoaga e alaala ai tagata o le vaega.

A Maea le Fonotaga:

• Asiasi i le srs.lds.org/report e ta ai i totonu faamatalaga mai le Fomu o le Lipoti o le Faigalotu.