2 Tesalonia 2

O Le Liliuese Tele

Mata o le a faape’i lou olaga pe ana e le maua le atoatoaga o le talalelei a Iesu Keriso? Sa aoao atu e Paulo le Au Paia i Tesalonia e faapea, e iu lava ina taunuu le amioleaga o tagata i se tetea ese mai le talalelei (tagai i le 2 Tesalonia 2:1–7). E mafai ona fesoasoani lenei lesona e te malamalama ai i le ala na mafua ai le Liliuese o le Ekalesia i le Feagaiga Fou ma le mafuaaga na manaomia ai ona toefuatai mai le Ekalesia a le Faaola i aso e gata ai.

O Le Liliuese Tele

Vaai faalemafaufau e faapea, o oe o se faifeautalai i le aso muamua o lau misiona. E manaomia ona e aoaoina se isi e uiga i le Liliuese Tele.

• E faapefea ona e faamatalaina lenei mea ia i latou?

• Aisea e ono faigata ai lenei mea?

• Aisea e te manatu ai e taua le malamalama i le Liliuese Tele?

I lau api talaaga mo suesuega, tusi i lalo ni au fesili e uiga i le Liliuese Tele po o fesili e ono fesili ai se tagata sailiili. A o e suesue, saili le fesoasoani a le Tama Faalelagi e sue ai tali i nei fesili.

Ua valoia e Paulo le liliu ese o le Ekalesia

Sa tele popolega o le Au Paia i Tesalonia e uiga i le Afio Mai Faalua o Iesu Keriso ma sa manatu na le o toe mamao ona tupu lea. Sa talanoaina e Paulo o latou popolega i lana tusi ma faamalamalama atu o le a i ai se isi mea o le a tupu a o lei toe afio mai Keriso.

O le 2 Tesalonia 2:1–3 o se fuaitau o le atamai i aoaoga faavae. Mafaufau e maka fuaitau o le atamai i aoaoga faavae i se ala iloga ina ia mafai ai ona e mauaina gofie.

Faitau le 2 Tesalonia 2:1–3 ma vaavaai mo le mea na fai mai Paulo o le a tupu a o lei oo mai le Afio Mai Faalua o Keriso. Faaaoga vaefaamatalaga e fesoasoani ia e malamalama lelei ai i upu a Paulo.

• O le a le mea na aoao mai e Paulo o le a tupu a o lei oo i le Afio Mai Faalua o Keriso?

O lenei “tetea ese” na faamatalaina e Paulo o le Liliuese Tele, lea na tupu ina ua mavae le maliliu o Aposetolo a Iesu Keriso. O lenei Liliuese Tele e ese mai le liliuese o le tagata lava ia, o le tetee po o le pauu ese o tagata mai le upumoni (tagai i le Taiala i Tusitusiga Paia, “ Liliuese,” scriptures.ChurchofJesusChrist.org).

• E faapefea ona faaalia i upu a Paulo le alofa ma le popole o le Atua mo le Au Paia i Tesalonia?

O se tasi o upumoni e mafai ona tatou aoao mai nei fuaiupu e faapea, sa valoia anamua a o lei oo i le Afio Mai Faalua o Iesu Keriso, o le a tupu se liliuese mai Lana Ekalesia.

• Aisea e te manatu e taua ai le malamalama i lenei upumoni?

Na faamalamalama mai e Peresitene M. Russell Ballard o le Korama a Aposetolo e Toasefululua le mafuaaga e tutupu ai vaitau o le liliuese.

E alofa lo tatou Tama Faalelagi i Ana fanau uma lava, ma e finagalo o Ia ia i latou uma ia maua faamanuiaga o le talalelei i o latou olaga. E le o aveesea le malamalama faaleagaga ona ua fulitua le Atua i Lana fanau. Ae, e oo mai le pogisa faaleagaga pe a fulitua uma Lana fanau ia te Ia. O se taunuuga masani o filifiliga leaga na faia e tagata taitoatasi, nuu, atunuu, ma malo uma lava.

(M. Russell Ballard, “Learning the Lessons of the Past,” Liahona, Me 2009, 32)

• O le a se mea o tumatila mai ia te oe i lenei faamatalaga? Aisea?

Ona e silafia e le Tama Faalelagi mea uma (tagai i le 2 Nifae 9:20), sa lei avea ai le oo mai o le Liliuese Tele o se mea na faateia ai o Ia. E alofa o Ia i Lana fanau uma (tagai i le Ioane 3:16), o lea na Ia saunia ai se ala e faatoilalo ai lenei Liliuese Tele e ala i le Toefuataiga o le Ekalesia ma le talalelei a Iesu Keriso (tagai i le Galuega 3:19–21; Efeso 1:10).

Faaloloto lou malamalama i le Liliuese Tele

O le gaoioiga lenei e mafai ona fesoasoani e te malamalama atili ai i le ala na tupu ai le Liliuese Tele ma le mafuaaga na manaomia ai ona toefuatai mai le Ekalesia a le Faaola i aso e gata ai.

Suesue fuaitau o mau nei ma le saunoaga a Peresitene Russell M. Nelson, ona tali lea o fesili o loo i lalo.

1. 1 Nifae 13:24–28: Ua vaai Nifae i se faaaliga vaaia i mea o le a tutupu i upumoni taua i le Tusi Paia.

2. Amosa 8:11–12: Ua valoia e Amosa se oge faaleagaga o le a oo mai.

3. Galuega 20:29–30: Ua lapatai mai Paulo o le a taitaieseina tagata o le Ekalesia a le Faaola mai le talalelei.

4. Na aoao mai Peresitene Russell M. Nelson:

   

   “O lo tatou Atua soifua o se Atua alofa! E finagalo o Ia i Lana fanau ia iloa o Ia ma Iesu Keriso, o lē na Ia auina mai! Ma e finagalo foi o Ia ia maua e Ana fanau le tino ola pea ma le ola e faavavau!

   “Ona o lenei faamoemoega mamalu, ua aoao atu ai e a tatou faifeautalai e uiga i le Toefuataiga. Ua latou iloa pe tusa ma le 2,000 tausaga talu ai, sa faatuina ai e le Alii Lana Ekalesia. Ina ua mavae Lona Faasatauroga ma le maliliu ai o Ana Aposetolo, sa suia e tagata le Ekalesia ma ona aoaoga faavae. Ma, ina ua mavae augatupulaga o le pogisa faaleagaga, ma e pei ona valoia ai e perofeta anamua, na toefuatai mai ai e le Tama Faalelagi ma Iesu Keriso le Ekalesia, o ona aoaoga faavae, ma lana pule o le perisitua. Ona o lena Toefuataiga, ua toe avanoa ai i tagata uma le malamalama ma sauniga e tatau ai mo le faaolataga ma le faaeaga. O le faatumutumuga, o lena faaeaga e mafai ai e i tatou taitoatasi ona nonofo faatasi ma o tatou aiga i le afioaga o le Atua ma Iesu Keriso e faavavau!”

   Russell M. Nelson, “Pu’e le Galu; Liahona, Me 2013, 46

Afai o i ai pea ni au fesili e uiga i le liliuese, mafaufau e suesue le vaega “O Le Liliuese Tele” i le “Lesona 1: O Le Savali o le Toefuataiga o le Talalelei a Iesu Keriso” i le Tala’i La’u Talalelei: O Se Taiala mo le Galuega Faafaifeautalai (2019). E mafai foi ona e aoao atili e uiga i nei autu i le matamata i le “What Is the Restoration?” (5:13) po o le “Jesus Christ’s Church” (1:27), lea e mafai ona maua i le ChurchofJesusChrist.org.

O le a le Toefuataiga?Ekalesia a Iesu Keriso

Toefuataiga o le Ekalesia a Keriso

Atonu e te masani i le Toefaaleleia o se vaitau o suiga tele i le faaKerisiano; O le Toefuataiga o se isi mea e ese atoa lava. E faatatau i le toe foi mai atoatoa i aso nei o le Ekalesia anamua a Iesu Keriso.

Jesus Christ's Church

Did you know that Jesus Christ established a church when He was on the earth and called twelve Apostles to lead the Church after His death?

1. Tali fesili nei i totonu o lau api talaaga mo suesuega:

• O le a se mea sa e aoaoina e uiga i le Liliuese Tele?

• O a ni mea na e aoaoina e uiga i le Tama Faalelagi ma Iesu Keriso e ala i nei aoaoga?

• E fua i mea ua e aoaoina, aisea na manaomia ai le Toefuataiga?

Sa faasoa mai e Elder Jeffrey R. Holland o le Korama a Aposetolo e Toasefululua ni fesili atonu na ia te ia ma lona faletua pe ana faapea sa la soifua i le taimi o le Liliuese Tele: “O le a se mea o misi iinei? O le a se mea ma te moomoo ma’imau pe a na ma maua? O le a se mea o ma faamoemoe o le a saunia e le Atua e tali mai ai i o ma moomooga faaleagaga?” (“O Se Malamalama Atoatoa o le Faamoemoe,” Liahona, Me 2020, 81). Mafaufau loloto i ni mafaufauga ma ni lagona faapena atonu na ia te oe pe ana faapea sa e ola i lena taimi.

2. Tali fesili nei i totonu o lau api talaaga mo suesuega:

• Mata o le a faape’i lou olaga pe ana e le maua le atoatoaga o le talalelei a Iesu Keriso?

• O le a se mea e sili ona e faafetai ai e uiga i le Ekalesia toefuataiina a le Faaola? Aisea?

• O le a se mea e te lagona e finagalo le Tama Faalelagi ia e iloa, lagona, pe faia ona o lenei lesona?

Tuu i le Faitalia: O e Manao e Aoao Atili? 

Pe na matauina e tagata Kerisiano sa soifua a o lei oo i le Toefuataiga le Liliuese?

Na aoao mai Matini Luteru o le Tagata Fai Suiga (1483–1546):

E leai se isi mea ua ou sailia i tua atu o le toe faia o suiga i le Ekalesia ia tusa ai ma Tusitusiga Paia. … Ou te faapea atu ua le toe i ai le faa-Kerisiano ia i latou o e sa tatau ona faasaoina.

(I le E. G. Schwiebert, Luther and His Times: The Reformation from a New Perspective [1950], 509)

Na faamalamalama mai e le uluai taitai Kerisiano Amerika o Roger Williams (1603–83):

O le liliuese … ua matua faapiopio lava mea uma ina ia le mafai ona toe maua mai lena liliuese seia auina mai e Keriso ni aposetolo fou e faatu ni ekalesia fou.

(I le Philip Schaff, The Creeds of Christendom, 3 vols. [1877], 1:851)

Na aoao mai le filosofia Siamani o Erasmus (1466–1536):

Ua matua lavelavea mea uma i nei fesili [o aoaoga faavae] ma ua poloai ai ia aua lava nei o tatou faamoemoe e toe liliu atu le lalolagi i le faa-Kerisiano moni.

(The Praise of Folly, trans. Clarence H. Miller, 2nd ed. [2003], 155–56)

Pe na o le tasi ea se liliuese na tupu?

I le taualumaga o taimi, sa tele tisipenisione na faaiuina i le liliuese. Ona toefuatai mai lea e le Alii i Lona alofa mutimutivale Lana talalelei i le lalolagi e ala i le valaauina o perofeta. Ina ia aoao atili e uiga i lenei mamanu, matamata i le “Dispensations: The Pattern of Apostasy and Restoration” (6:52), o loo maua i le ChurchofJesusChrist.org.

Tisipenisione: O Le Mamanu o le Liliuese, ma le Toefuataiga

Na faamalamalama mai e Elder David A. Bednar o le Korama a Aposetolo e Toasefululua ia tisipenisione o le talalelei ma le mafuaaga ua tulaga ese ai lenei tisipenisione mulimuli.

E tatau faapefea ona tatou vaai atu i tagata lelei o isi ekalesia?

Na faamalamalama mai e Peresitene Dallin H. Oaks o le Au Peresitene Sili:

Tatou te talitonu o le toatele o taitai faalelotu ma o latou tagata lotu o ni tagata talitonu faamaoni o e alolofa i le Atua ma malamalama ma auauna atu ia te ia i le mea sili latou te mafaia. Tatou te nofo aitalafu i alii ma tamaitai o e na faamumuina pea le malamalama o le faatuatua ma le aoaoina i le faagasologa o seneturi e oo mai i le aso nei. E ao ona tatou faatusatusaina le malamalama itiiti o loo i ai i tagata e le masani i suafa o le Atua ma Iesu Keriso ia iloa ai le saofaga sili na faia e faiaoga Kerisiano i le faagasologa o tausaga. Tatou te faamamaluina i latou o ni auauna a le Atua.

(Dallin H. Oaks, “Apostasy and Restoration,” Ensign, Me 1995, 85)