Mauaina o le Malamalama Faaleagaga, Vaega 1

Faatino i le Faatuatua

alii talavou o loo mafaufau loloto i tusitusiga paia

O se tasi o faamoemoega o le atamai i aoaoga faavae o le fesoasoani lea e te aoao ma faaaoga mataupu faavae mo le mauaina o le malamalama faaleagaga ina ia avea atili ai e pei o Iesu Keriso. O lenei lesona ua faamoemoe e fesoasoani ia te oe ia malamalama ma faatatau le mataupu faavae patino o le faatino o le faatuatua ia Iesu Keriso pe a tula’i mai lu’itau ma fesili faigata.

Pe a tulai mai luitau ma fesili faigata

I le taimi o le olaga faaletino, tatou te fetaiai uma lava ma luitau faigata ma fesili atonu e le faigofie ona foia. Faitau tulaga nei a o mafaufau e uiga i ni aafiaga talitutusa faapea na e oo i ai pe oo i ai se tasi e te iloa.

E tele ni fesili a se alii talavou e uiga i aiaiga faavae a le Ekalesia ma ua amata ona taumanatunatu pe moni le Ekalesia.

Ua vaai se tamaitai talavou i se faamatalaga i luga o ala o faasalalauga faaagafesootai lea e fesiligia ai se aoaoga faavae o le Ekalesia. Ua amata nei ona ia taumanatunatu e uiga i lena lava aoaoga faavae.

Ua taumanatunatu se tamaitai talavou pe na tali moni mai lava ni tatalo ina ua uma ona mafatia lona tuagane ma maliu ai mai se gasegase sa i ai, e ui lava i tatalo ma faamanuiaga na ofoina atu mo ia.

O a nisi o auala eseese e mafai ona filifili tagata e tali atu ai pe a latou feagai ma luitau faigata po o fesili e pei o nei?

Faaalu sina taimi e manatunatu ai i ou aafiaga a o feagai ma luitau ma fesili faigata. Atonu e ono fesoasoani le mafaufau e uiga i fesili nei: Pe na faamanuiaina oe i le sailia o tali? O le a se mea na fesoasoani ia te oe e maua ai le filemu? O le a le mea sa le’i fesoasoani?

O a nisi o fesili po o luitau o ia te oe (pe o i ai i isi tagata e te iloa) e le faigofie ona foia?
Aisea e te manatu ai e faatagaina i tatou e le Tama Faalelagi ia i ai ni fesili e lei foiaina nai lo le tuuina mai pea ia i tatou o tali?

Pe a tulai mai ni fesili, e taua le manatua e uunaia i tatou e le Alii e fai atu fesili ma saili tali (tagai Mataio 7:7–8; Iakopo 1:5–6; Mataupu Faavae ma Feagaiga 42:61). O le faia o fesili ma le sailia o tali o se vaega taua o la tatou taumafaiga e aoao le upumoni, sosoo ai ma le faaaogaina ma le ola ai i mea ua tatou aoaoina i la tatou sailiga ia avea atili e faapei o le Faaola ma lo tatou Tama Faalelagi.

O mataupu faavae e tolu e mafai ona taialaina ai i tatou a o tatou saili e foia fesili po o faafitauli ma tuputupu ae i lo tatou malamalama i upumoni e faavavau e aofia ai:

Faatino i le faatuatua.
Iloilo manatu faavae ma fesili faatasi ma se vaaiga e faavavau.
Saili le malamalama atili e ala i punavai faalelagi ua atofaina.

O nei mataupu faavae uma e tolu e mafai ona taua e faaaoga pe a e feagai ma fesili ma atugaluga ia e le faigofie ona foia po o le taimi e te oo ai i tofotofoga.

Faatino i le faatuatua

O lenei lesona ua faamoemoe e fesoasoani ia te oe e malamalama ai i le mataupu faavae lenei: a o tatou faatino le faatuatua, e tuuina mai e le Alii ia i tatou le filemu ma le malosi a o tatou sailia tali i a tatou fesili ma atugaluga.

Faaloloto lou malamalama i le uiga o le faatino i le faatuatua e ala i le faamaeaina o le gaoioiga e aoao ai o loo i lalo. Atonu e aoga le suesue faatasi ma se isi tagata ina ia mafai ai ona e faataitai ona faamalamalama atu lou malamalamaaga ma aoao mai i isi.

O le a le uiga o le faatino i le faatuatua?

Faitau le Pepa Autu o le Atamai i Aoaoga Faavae (2022) “Mauaina o le Malamalama Faaleagaga,” parakalafa 1–2 ma le 5–7 ma le saunoaga lenei a Elder Neil L. Andersen o le Korama a Aposetolo e Toasefululua. A o e suesue, vaavaai mo le uiga o le faatino i le faatuatua ma mea e mafai ona fesoasoani ia te oe e faaaoga ai lenei mataupu faavae pe a i ai ni au fesili.

O le faatuatua e le faafuasei ona oo mai i o tatou luga pe e tumau foi ia i tatou e ala i se tofi tuufaasolo. … O le faatuatua ia Iesu Keriso o se meaalofa mai le lagi lea e oo mai pe a tatou filifili e talitonu ma pe a tatou sailia ma taofi mau i ai. … O le lumanai o lo outou faatuatua e le o se mea e tupu faafuasei, ae e ala i filifiliga. …

E le faatauanauina lava e le faatuatua se tali i fesili uma ae sailia le fa’amautinoaga ma le lototele e aga’i ai i luma, o nisi o taimi e tautino ai, “Ou te le iloaina mea uma, ae ua lava lo’u iloa e tumau ai pea i luga o le ala o le avea ai ma so’o.”

O le tuu o oe lava i le masalosalo tumau, lea e fafagaina e tali mai le au le faatuatua ma le au le faamaoni, e faavaivaia ai le faatuatua o se tasi ia Iesu Keriso ma le Toefuataiga. “A e le talia e le tagata faaletino o mea a le Agaga o le Atua; aua o mea valea ia ia te ia” [1 Korinito 2:14]. …

E ui o le amataga o lou faatuatua na o sina aloiafi, ae o filifiliga amiotonu e aumaia ai le loto mautinoa sili atu i le Atua, ma faatupulaia ai lou faatuatua.

(Neil L. Andersen, “O Le Faatuatua E Le Tupu Faafuasei, ae e ala i Filifiliga,” Liahona, Nov. 2015, 65 - 67)

Aisea e te manatu ai e taua le faatino o le faatuatua pe a i ai ni a tatou fesili ma atugaluga?
O le a se mea ua e aoaoina mai i nei faitauga e faatatau i le uiga o le faatino o le faatuatua?

Toe mafaufau i fesili ma luitau faigata o loo feagai ma oe, pe toe iloilo tulaga mai le amataga o le lesona. Faatasi ai ma se tasi o nei mea i le mafaufau, faataitai ona faaaoga mea ua e aoaoina e uiga i le faatinoina o le faatuatua e ala i le tali atu i le tele o auiliiliga e te mafaia i fesili nei.

Tuu i le faitalia: O e Manao e Aoao Atili?

Pe sese ea le i ai o ni fesili e uiga i le talalelei?

Na aoao mai Peresitene Dieter F. Uchtdorf o le Au Peresitene Sili e uiga i le taua o fesili faamaoni:

O se mea masani le i ai o fesili—o sina fatu itiiti o le fesili faamaoni ua tele lava ina tupu ae ma ola ma avea ma se laau mafalā o le malamalama. O loo i ai ni nai tagata o le Ekalesia o e, mai i lea taimi i lea taimi, e le’i tauivi lava ma ni fesili matuia pe maaleale. O se tasi o faamoemoega o le Ekalesia o le fafaga ma faafailele le fatu o le faatuatua—e oo lava i nisi o taimi i eleele matutu o le masalosalo ma le le mautonu. O le faatuatua o le faamoemoe lea mo mea e le vaaia ae ua moni.

O le mea lea, ou uso e ma tuafafine pele—au uo pele—faamolemole, ia muai ona e masalosalo i ou masalosaloga ae e te lei masalomia lou faatuatua. Ia le tatau lava ona tatou faatagaina le masalosalo e faapagotaina i tatou ma taofia ai i tatou mai le alofa paia, filemu, ma meaalofa ia e oo mai e ala i le faatuatua i le Alii o Iesu Keriso.

(Dieter F. Uchtdorf, “Sau, Auai Faatasi ma i Matou,” Liahona, Nov. 2013, 23)

E mafai faapefea ona ou faateleina lo’u gafatia e faatino ai le faatuatua?

Na aoao mai Peresitene Russell M. Nelson e uiga i se faagasologa e mafai ona tatou faia e faateleina ai lo tatou faatuatua:

E faateleina lo tatou faatuatua i taimi uma tatou te faatino ai lo tatou faatuatua ia te Ia. O le uiga lena o le aoao e ala i le faatuatua.

Mo se faataitaiga, o taimi taitasi tatou te maua ai le faatuatua ina ia usiusitai ai i tulafono a le Atua—e tusa lava pe faamāina i tatou e manatu lauiloa—po o taimi taitasi tatou te teena ai faafiafiaga po o filosofia ia e faamanatuina le soliga o feagaiga, o loo tatou faatinoina lo tatou faatuatua, lea i lona taunuuga e faateleina ai lo tatou faatuatua.

(Russell M. Nelson, “Fetaiai ma le Lumanai i le Faatuatua,” Liahona, Nov. 2020, 75.)

O tulaga moni o le olaga o tagata taitoatasi o loo faatinoina le faatuatua

Mafaufau e matamata se tasi po o vitio uma nei e lua, ma vaavaai mo mea e mafai ona e aoao mai nei tagata e mafai ona fesoasoani ia te oe e faatino ai le faatuatua pe a i ai ni au fesili faigata po o ni luitau.