Faatomuaga i le Atamai i Aoaoga Faavae

O Le Faamoemoega o le Atamai i Aoaoga Faavae

O lenei lesona o le a faailoa atu ai oe i le atamai i aoaoga faavae ma pe mafai faapefea ona faamanuiaina ai lou olaga ma fesoasoani ai ia te oe e fausia lou faavae faaleagaga i luga o Iesu Keriso.

Fausia se faavae i luga o Iesu Keriso

Na lapatai mai Elder Neil L. Andersen o le Korama a Aposetolo e Toasefululua e faatatau i asiosio faaleagaga:

O mea e sili atu ona popole i ai nai lo o mafuie ma taua [i aso e gata ai] sa valoia o asiosio faaleagaga e mafai ona liaieseina oe mai lou faavae faaleagaga ma tuuina lou agaga i tulaga e te le i mafaufauina e mafai, ma o nisi taimi e te tau le iloaina ua sii ese oe.

(Neil L. Andersen, “O Asiosio Faaleagaga,” Liahona, Me 2014, 18)

• O a nisi o asiosio faaleagaga o loo taumafai e tafiesea i tatou mai o tatou faavae faaleagaga?

Mafaufau i se asiosio faaleagaga atonu o loo feagai ma oe. Faitau le Helamana 5:12 ma vaavaai mo auala e tetee atu ai i lenei asiosio.

• O le a se mea na e matauina e mafai ona fesoasoani ia te oe e tetee atu ai i asiosio faaleagaga?

• O le a lou manatu i le uiga o le fausia o se faavae i luga o Iesu Keriso?

• O a ni auala o le a faamanuiaina patino ai oe lava mai le fausiaina o se faavae malosi ia Iesu Keriso?

O lo’u faavae faaleagaga

Mafaufau i lou faavae faaleagaga ma faatulaga oe lava i faamatalaga nei i le “Ioe,” “Tau Ioe,” “Tau Le Ioe,” po o le “Le Ioe.”

1. O loo o’u fausia se faavae malosi i luga o Iesu Keriso ma Lana talalelei.

2. O loo o’u faateleina lo’u malamalama ia Iesu Keriso ma Lana aoaoga faavae.

3. Ou te lagona le lagolelei i le faaaogaina o tusitusiga paia e faamatala ai le aoaoga faavae a Iesu Keriso.

4. E mafai ona ou maua tali i a’u fesili po o fesili a isi e uiga i le talalelei.

Atamai i aoaoga faavae

E mafai ona fesoasoani le seminare ia te oe e fausia lou faavae i luga o Iesu Keriso a o e aoao i Ana aoaoga faavae, o mai ia te Ia, ma avea ma Ona soo (tagai i le 3 Nifae 11:39). Faitau parakalafa muamua e lua i le vaega o le “Faatomuaga i le Atamai i Aoaoga Faavae” mataupu o le Pepa Autu o le Atamai i Aoaoga Faavae (2022), ma vaavaai mo auala e mafai ai e le seminare ona fesoasoani ia te oe e fausia lou faavae i luga o Iesu Keriso.

• O le a se mea sa e mauaina?

E lua ni taunuuga autu mo le atamai i aoaoga faavae o le a fesoasoani ia te oe e fausia ai lou faavae i luga o Iesu Keriso. Faitau ia taunuuga e lua mo le atamai i aoaoga faavae i totonu o le “Faatomuaga i le Atamai o Aoaoga Faavae” mataupu i le Pepa Autu o le Atamai o Aoaoga Faavae.

O vaiaso taitasi i le seminare o le a e galue ai i le atamai i aoaoga faavae. I le tele o nei lesona, o le a e suesueina ai se tasi o fuaitau o mau e 24 mai le Feagaiga Fou ua lauiloa o fuaitau o le atamai i aoaoga faavae. O le ata lenei o loo faapupula mai ai mea o le a e faia i lesona o le atamai i aoaoga faavae.

Iloa ma faamatala le aoaoga faavae.

I le amataga o le lesona sa e iloiloina ai oe lava i ou lagona mafanafana i le faaaogaina o tusitusiga paia e faamatala ai le aoaoga faavae a Iesu Keriso. Po o le a lava lou iloiloina o oe lava, o le suesueina o le atamai i aoaoga faavae o le a faateleina ai lou malamalama i le Faaola ma Lana aoaoga faavae. O le a faatupulaia lou gafatia e faamatala ai Lana aoaoga faavae e faaaoga ai tusitusiga paia.

Vaavaai i le lisi o fuaitau o le atamai i aoaoga faavae o le Feagaiga Fou ma a latou fasifuaitau autu o mau. E mafai ona e maua lenei lisi e latalata i le faaiuga o le Pepa Autu o le Atamai i Aoaoga Faavae. Filifili se tasi o fuaitau e te iloa e manaia, e mafai ona fesoasoani i se manaoga patino, pe mafai foi ona fesoasoani i se fesili o ia te oe.

1. Tali fesili nei i totonu o lau api faamaumau mo suesuega:

• O le a le fuaitau o le mau na e filifilia?

• O le a le mea ua aoaoina ai oe e lenei fuaitau e uiga ia Iesu Keriso ma Lana aoaoga faavae?

• O a ni auala e faamanuiaina ai lou olaga i le iloaina o le auala e faamalamalama ai le aoaoga faavae mai lenei fuaitau?

Mauaina o le malamalama faaleagaga

I lesona o le atamai i aoaoga faavae, o le a e maua ai se avanoa e aoao atili ai e uiga ma faataitai e faaaoga mataupu faavae o le mauaina o le malamalama faaleagaga e fesoasoani ia te oe e tali ai fesili faaletagata lava ia ma faaleagafesootai faapea foi ma fesili e uiga i aoaoga faavae, faatinoga, po o le talafaasolopito o le Ekalesia. O le aoao e uiga i ai ma le faaaogaina o nei mataupu faavae o le a fesoasoani ia te oe e fausia ai lou faavae i luga o le Faaola ma liliu atu ia te Ia pe a e feagai ma ni fesili. O mataupu faavae e tolu o le mauaina o le malamalama faaleagaga o le a e faataitaia e faaaoga i le seminare o le:

• Faatino i le faatuatua.

• Iloilo manatu faavae ma fesili faatasi ma se vaaiga e faavavau.

• Saili le malamalama atili e ala i punavai faalelagi ua atofaina.

Afai e te le masani i nei mataupu faavae, atonu e te mana’o e faitau ia parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae.

2. Tali mai se lua pe sili atu o fesili nei i lau api faamaumau mo suesuega:

• O le a se mea e te iloa e uiga i nei mataupu faavae?

• O a ni aafiaga na e maua i nei mataupu faavae?

• O a ni auala e te manatu e mafai ai e nei mataupu faavae ona fesoasoani ia te oe e fausia lou faavae ia Keriso ma tetee atu ai i asiosio faaleagaga?

Fuaitau o mau o le atamai i aoaoga faavae

O tausaga taitasi i le seminare o le a uunaia ai oe e tauloto se fuaitau autu o mau mo fuaitau e 24 o le atamai i aoaoga faavae.

Na aoao mai Elder Richard G. Scott (1928–2015) o le Korama a Aposetolo e Toasefululua e uiga i le taulotoina o mau.

O Le Mana o Tusitusiga Paia

O tusitusiga paia e pei lava o ni tamai sulu e faamalamalama ai o tatou mafaufau ma saunia i tatou mo taitaiga ma musumusuga mai lugā.

E mafai ona oo mai se mana maoae mai le taulotoina o mau. O le taulotoina o se mau o le fatuina lea o se faigauo fou. E faapei lava o le mauaina o se tagata fou e mafai ona fesoasoani mai i se taimi o puapuaga, tuuina mai musumusuga ma faamafanafanaga, ma avea o se punavai o uunaiga mo suiga manaomia.

(Richard G. Scott, “O Le Mana o Tusitusiga Paia,”” Liahona, Nov. 2011, 6)

Mafaufau e uiga i fesili nei:

• Aisea e te manatu ai o le a aoga le taulotoina o fuaitau eseese o mau?

• O le a sou manatu e mafai faapefea e le taulotoina o mau ona fesoasoani ia te oe e fausia ai lou faavae i luga o Iesu Keriso ma tetee atu ai i asiosio faaleagaga?

Faaalu ni nai minute e toe faamanatu ai fuaitau e 24 o le atamai i aoaoga faavae ma fasifuaitau autu o mau mo le kosi o le Feagaiga Fou. E mafai ona e faaaogaina le polokalama o le Atamai i Aoaoga Faavae po o le Pepa Autu o le Atamai i Aoaoga Faavae. Atonu e te manao e amata ona tauloto le mau ma le fuaitau autu o mau mo le fuaitau na e filifilia muamua.

Tuu i le faitalia: O e Manao e Aoao Atili?

Aisea e taua ai le atamai i aoaoga faavae?

Na aoao mai Peresitene M. Russell Ballard o le Korama a Aposetolo e Toasefululua:

[O le Atamai i Aoaoga Faavae] o le a taulai atu i le fausiaina ma le faamalosia o le faatuatua o a tatou tamaiti aoga ia Iesu Keriso ma faamausali i latou i gafatia faateleina e ola ma faaaoga ai le talalelei i o latou olaga. O le utuvai i tusitusiga paia ma upu a perofeta, o le a latou aoao ai auala e faatino ai ma le faatuatua i a Keriso e maua ai le malamalama faaleagaga ma le malamalamaaga e uiga i Lana talalelei. Ma o le a latou maua avanoa e aoao ai le auala e faaaoga ai aoaoga faavae a Keriso ma mataupu faavae o le talalelei i fesili ma luitau latou te faalogo ma vaaia i aso taitasi i a latou tupulaga ma luga o faasalalauga faaagafesootai.

(M. Russell Ballard, “O Avanoa ma Tiutetauave a Faiaoga o le OAE i le Seneturi 21” [o se faasauga ma se Pulega Aoao, Fep. 26, 2016], ChurchofJesusChrist.org