Pasiuna sa Manwal sa Estudyante sa Seminary sa Bag-ong Tugon

Ang Katuyoan sa Seminaries and Institutes of Religion mao “ang pagtabang sa mga batan-on ug mga young adult nga makasabot ug makasalig sa mga pagtulon-an ug Pag-ula ni Jesukristo, mahimong takos alang sa mga panalangin sa templo, ug makaandam sa ilang kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit” (Pagtudlo ug Pagkat-on sa Ebanghelyo: Usa ka Tamdanan nga Basahon sa mga Magtutudlo ug mga Lider sa Seminaries and Institutes of Religion [2012], x, ChurchofJesusChrist.org).

Ang mga leksiyon niini nga manwal gidesinyo aron sa pagtabang nimo nga makab-ot kini nga tumong samtang ikaw magtuon sa Bag-ong Tugon. Kini nga manwal naglangkob og 255 ka leksiyon. (Dili nimo kinahanglan nga kompletohon kining tanang leksiyon.) Kadaghanan niini nga mga leksiyon nagsunod sa Dali, Sunod Kanako nga hut-ong sa kasulatan nga pagatun-an sa mga indibidwal ug mga pamilya. Ang ubang mga leksiyon may kalabotan sa doktrinal nga kahanas. Ang imong magtutudlo motabang nimo kon unsa nga mga leksiyon ang kompletohon sa panimalay ug unsa ang imong himoon pagdungan diha sa klase.

Ang gimbuhaton alang sa matag leksiyon maglakip sa mga buluhaton sa pagbasa ug pagsulat. Ang mga buluhaton sa pagsulat nailhan niini nga icon:

Mokonsiderar pag-ayo sa imong mga tubag sa dili pa mosulat niini. Kini makatabang nimo nga dunay mas makahuluganon nga mga kasinatian samtang ikaw mokat-on ug mogamit sa mga kamatuoran gikan sa mga kasulatan. Mag-ampo sa dili pa ikaw magsugod sa imong mga leksiyon, ug tinguhaa ang giya ug direksyon gikan sa Espiritu Santo aron sa pagtabang nimo sa imong pagtuon. Mangita og mga oportunidad sa pagpaambit unsay imong nakat-onan ngadto sa uban, lakip sa imong pamilya.