Talateu ki he Tohi Lēsoni ʻo e Fuakava Foʻoú maʻá e Tokotaha Ako Seminelí

Ko e Kaveinga ʻo e Seminelí mo e ʻInisititiuti Fakalotú ke “tokoni ke mahino mo falala ʻa e toʻutupú mo e kakai lalahi kei talavoú ki he ngaahi akonaki mo e Fakalelei ʻa Sīsū Kalaisí, fakafeʻungaʻi kinautolu ke maʻu ʻa e ngaahi tāpuaki ʻo e temipalé, pea teuteuʻi kinautolu, honau fāmilí, mo e niʻihi kehé ki he moʻui taʻengata mo ʻenau Tamai Hēvaní” (Ko Hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiako mo e Kau Taki ʻi he Seminelí mo e ʻInisititiuti Fakalotú [2012], x, ChurchofJesusChrist.org).

ʻOku fakataumuʻa e ngaahi lēsoni ʻi he tohi lēsoni ko ʻení ke tokoniʻi koe ke ke aʻusia e taumuʻa ko ʻení ʻi hoʻo ako ʻa e Fuakava Foʻoú. ʻOku ʻi he tohi lēsoni ko ʻení ha ngaahi lēsoni ʻe 255. (He ʻikai fiemaʻu ke ke fakakakato kotoa e ngaahi lēsoni ko ʻení.) Ko e lahi taha ʻo e ngaahi lēsoni ko ʻení ʻoku fenāpasi ia mo e konga folofola ʻi he Haʻu, ʻo Muimui ʻIate Aú ʻa ia ʻe ako ʻe he fakafoʻituituí mo e ngaahi fāmilí. ʻOku fekauʻaki e ngaahi lēsoni kehé mo e fakataukei fakatokāteliné. ʻE tokoni atu hoʻo faiakó ke ke ʻiloʻi ʻa e ngaahi lēsoni ke fakakakato ʻi ʻapí pea mo e ngaahi lēsoni te mou fakahoko fakataha mo e kalasí.

ʻOku kau he ngāue ʻo e lēsoni takitaha ha ngaahi laukonga mo ha ngaahi ngāue tohi. ʻOku fakaʻilongaʻi ʻa e ngaahi ngāue faitohí ʻaki ʻa e fakaʻilonga ko ʻení:

Fakakaukauʻi fakalelei hoʻo ngaahi talí kimuʻa peá ke toki tohi iá. ʻE tokoni ʻeni ke ʻuhingamālie ange ai hoʻo ngaahi aʻusiá ʻi hoʻo ako mo fakaʻaongaʻi e ngaahi moʻoni mei he folofolá. Lotu kimuʻa pea kamata hoʻo lēsoní, pea fekumi ki he tataki mo e fakahinohino mei he Laumālie Māʻoniʻoní ke tokoniʻi koe ʻi hoʻo akó. Kumi ha ngaahi faingamālie ke vahevahe ai e meʻa ʻokú ke akó mo e niʻihi kehé, ʻo kau ai ho fāmilí.