Sopun 3

Kaeo me Osukuna ewe Kapas Allimen Jises Kraist

Ekkewe nesen non ei sopun ra masoweni ekkewe auchean annuk, nongonong, me annukun ewe kapas allimen Jises Kraist. Ekkei nesen ir met ekkewe soufos mi manau me aposel ra fen aiiti ngenikich ach sipwe kaeo me osukuna. Ra kawor ikei pwe oupwe tongeni weweochuti ewe afanafanen Kraist.

Ewe ewin kinikin non ei sopun ina ewe tungorun papatais. Unusen ewe sopun a masoweni ekkewe ruanu nesen:

• Ewe Porousen ewe Niwinsefaniton ewe Kapas Allimen Jises Kraist

• An Samach non Nang Kokkoten Manau Esemuch

• Ewe Kapas Allimen Jises Kraist

• Winiti Chon Kuno Fochofoch Noun Jises Kraist

Kaeo ekkewe pukefel me aucheanapei ewe osukunen Jesus Kraist non ew me ew nesen. Nupwen ka fori, ewe Ngun epwe awora pwarata ren ekkewe ennet ka kaeo. I epwe anisuk om kopwe sinei met kopwe apasa me fori ne anisi ekkoch ar repwe angei ew pwarata ussun ewe ennet. (Nengeni Doctrine and Covenants 84:85.)

Epwe fein ngeni an epwe napeno an aramas repwe sinei ewe Chon Amanau ren unusan nupwen ra fori met I a fen tingor ngenir ar repwe fori. Achouano tungorun kokkoto non ew me ew nesen, me anisi aramas ar repwe aponueta ar nikitu. Nupwen aramas ra achocho nikitu, ra poputa ne manaueni ewe kapas allimen Jises Kraist me amonata ar repwe fori ekkewe pwon ngeni Kot.

Osukuna meinisin ekkewe nesen mwen me mwirin papatais. Full-time misineri repwe emweni osukunen ekkewe nesen non ir me ruu fansoun. Misinerin ward ika ekkoch memper repwe fiti nupwen mi tufich. Nengeni sopun 10 me 13 ren porous ussun pachenongen ekkewe memper non osukun.

Amonota Kopwe Osukun

Nupwen ka amonata om kopwe osukun, nenengen sefani ekkewe porous ren emon me emon non ewe Preach My Gospel app. Fori ew kokkotun nesen anongonong won met a auchea ngeni ewe aramas. Ekieki met neminewe ika atewe epwe sinei me mefi non fansoun anamwa om osukun. Ewe Ngun epwe anapano om achocho nupwen ka angei ewe fansoun ne amonata me ota.

Ikkei ekkoch kapas eis fan itom me chiechiom ewe ne ekieki non iotek nupwen ouwa amonata ne osukun.

• Met tungor sipwe atoura an epwe anisi ewe aramas ne awora nuku non Kraist me fefeita? Ekkewe tingor won ifa ussun om kopwe anisi aramas repwe aier me sinei “ewe manamanen ewe Chon Angasano” (Ilaman 5:11). Ekieki an ewe aramas fefeita, nonomun, me an osupwang. Mwirin apachanong emon ika chommong tingor non om kokkoten nesen.

• Met afanafan me nongonong epwe anisi ewe aramas ne aponueta ewe pochokunen mochen sia fen tingor ngeni neminewe ika atewe an epwe fori? Iotek fiti pochokunen ekiek won met afanafan me nongonong epwe anisi aramas ar repwe weweiti pwata angangen ar nikitu a auchea ngenir me ngeni ewe Samon.

• Ifa ussun sipwe anisi ewe aramas an epwe kaeo ekkewe afanafan? Om kopwe amonata ne osukuna ewe afanafan, forata me menapei met kopwe osukuna aea nesen 1–4. Esina ekkewe kapas eis, okisin, awewe, me pekin media mi wenengeni ewe epwe anisi ewe aramas an epwe weweiti met ka osukuna. Nengeni sopun 10 ren aporous won ifa ussun an epwe ochuono om osukun.

• Met ekkewe feioch Kot a fen pwonei ren ach etiwa me aponueta ach pwon? Nupwen ka kaeo ekkewe afanafan, esinna an Kot kewe feioch mi pwonei. Nupwen ka osukun, pwonei niffang me apasa kapasen pwarata usur.

• Menni memper ra tongeni fiti? Non ewe ototen mwich iteiten wik, ekieki menni memper ra tongeni anisuk ne osukun me anisi ewe aramas. Me mwen ewe nesen, porous won ar pachenong. Nengeni sopun 10.

• Met sia tongeni fori ach sipwe anisi aramas ar repwe aponueta ar pwon mwirin sia nikitireno? Kutta porousan ren fori ew mochomochen chufengen om kopwe anisi aramas repwe aponueta ar pwon. Nenengeni anen om kopwe apachanong ekkewe memper ne anisi ekkana ka osukuner repwe aponueta ar pwon. Ei chufengen a tongeni pachonong anneani ew sopun seni ewe Puken Mormon ika ekkoch pukefel. Ika emon ese aponueta ew pwon me mwan, meni epwe murinno ne anisi ren ena me mwen kopwe pwan atoura pwan ew. Nengeni sopun 11.

• Ifa ussun ach sipwe emwirinono ach anisir pwan fan ew? Mwirin nonnomun osukun meinisin, cheki nonomun ekkewe aramas ka osukuner. Ar nuku non Kraist a marino? Ra mefi ewe Ngun? Ra aier me fori me aponueta ar pwon? Ra iotek, kaeo ewe Puken Mormon me fiti fan? Fori kokkot an epwe anisir.

Osukun seni Netipom usun mi Emwen me ren ewe Ngun.

Kapas ngeni meinisin elter me sister, ewe Aewin Presetensi me ewe Mwichen ekkewe Engon me Ruemon Aposel a apasa:

“Ach popun pwe sipwe osukuna ewe porousen ewe kapas allim mi niwinsefan non ew sokkun an ach sipwe mut ngeni ewe Ngun an epwe emweni me ruu ekkewe misineri me ekkana ra osukuner. Mi auchea ach sipwe kaeo napanapen ekkewe [nesen], nge ekkei resap osukun seni ach chok enniwini foun kapas sia chechemeni. Ewe misineri epwe mefi ngaseno ne aea pusin an kapas nupwen epwe emwen meren ewe Ngun. Esap otoura och porous a chok pin eniwin ne chemenono non mokuran, nge epwe porous seni netipan non pusin an kapas. Meni epwe tokoseni tetenin ewe nesen, awora ena minne i a mefi meren ewe Ngun an epwe fori, anongonong won met ewe [aramas] a pwapwaiti me mochen. Kapas seni pusin an ekiek me pusin an kapas, i epwe awora kapasen pwarata usun ennetin an kewe osukun.”

Ewe Wisen Popun Chechemeni non mokurach

Opungono om kopwe chechemeni non mokurom ewe tetenin ekkewe osukun non ew me ew nesen. Kosap chemenano chok ekkewe nesen ren efou me efou kapas.

Ika ka kaeo pwan ew kapasen fonu me nukun om pusin, anonga om kaeo ewe kapasen fonu ren om amonnata om kopwe osukuna ewe nesen. Chemenono chok kewe foufoun kapas, sengen kapas,me tettenin kapas, me mochomochen porousen nongonong usun ra pwa non ekkewe nesen. Chemenono chok ekkewe kokkot mi makketiw non nesen 1–3 a pwan tongeni namot. Met ka chemenono epwe winiti an epwe pusin weweoch ngonuk.

Ekieki kien chemenono chok ekkewe afanafanen pukefel ar repwe aea non om osukun me pusin non manauom. Pochokunen manaman a tongeni feitto seni chemenono chok ekkewe pukefel. Ekkei pukefel ra tongeni apochokunok me ngonuk mwasangasangen memef me kinamwe. Ra tongeni amef ngonuk om kopwe siwin. Nupwen ka chemenono chok ekkewe pukefel, ewe Ngun a tongeni uweireto ngeni om ekiek nupwen ka mochen ir.

Osukun me Tingor ussun mi affat ren an Emon me Emon Mochen

A wor om tufichin ekesiwini fetanei ne osukuna ekkewe nesen non met chok anen an epwe anisi aramas repwe unusen moneta ren papatais me kapunguno. Menni nesen ke osukuna, nupwen ka osukuna, me fite ukukun fansoun ka awora ngeni ra pwa pwe ra murinno ren ekkewe mochen an ewe aramas ka osukuna me ewe emwen an ewe Ngun. Awewe chok, nupwen osukuna aramas ekkewe ese wor ar sine non pekin Namanam, meni kopwe poputa ne anisir ne forata ew watten akoko ngeni Samach non Nang me ew weweiti An kokkot (nengeni “Teaching People Who Do Not Have a Christian Background” non sopun 10).

Mut ngeni ewe Ngun epwe emwenuk non met tingor kopwe otoura me inet kopwe otourer. Ewe tingor mi pung non ewe fansoun mi pung a tongeni emwirinouno aramas ar repwe fori ekkewe mettoch repwe forata ar nuku. Ekkei mokutukut ra tongeni emwen ngeni ew pochokunen ekkesiwinin netip (nengeni Mosaia 5:2; Alma 5:12–14).

Osukuna ekkewe nesen ir mi mecheres, fatafatoch, me mochomoch. Napengeni, ew fansoun chuto ne iamwir esap tameseni 30 minich, me ka tongeni osukuna emon aramas non ekis fansoun ren 5 minich.

A murinno kopwe achomongano ekkewe mwich om kopwe osukuna ekkewe nongonong non ewe nesen. Napengeni epwe murino an aramas repwe weweiti om porous ika ka osukuna ekkewe nesen mi mochomoch, osukun iteitan, me osukuna ekis kinikinin ewe pisek.

Kaeo Pukefel

Met ka emwen ngeni om kopwe osukuna?

• Mosaia 18:18–20

• Doctrine and Covenants 43:15–16; 52:9

Pwata a ouchea sipwe kaeo kewe afanafanen Kraist non ewe nesen?

• 1 Nifai 15:14

• Alma 12:32; 17:2–3; 31:5

• Doctrine and Covenants 84:85