“Ongedei el Bliongel: Kot el Losisechakl—Klemechel a Olutel a Ebangkelio er a Jesus Kristo,” Olsisechakl e ra Ebangkelio er Ngak: Otireklel a Dolsisechakl e ra Ebangkelio ra Jesus Kristo (2023)

“Ongedei el Bliongel: Kot el Losisechakl,” Olisechakl e ra Ebangkelio er Ngak

Ongedei el Bliongel: Kot el Losisechakl

Klemechel a Olutel a Ebangkelio er a Jesus Kristo

Rechad a Locha mo Omdasu

Ngarngii a Dios?
Ng mekerang a bok keed ra Dios?
Ng mekerang a bo kudengelii a klemerang er tial chetiteuokl el beluulechad?
Ng mekerang a bol ngesukak a tekoi e ra klechelid?
Ngerang meng kmal betok a klechelid?
Ngerang meng kmal betok longarem ak chelbangel?
Ng mekerang a bo kulchesuar a budech e ra taem el ngarngii a uldikel?
Ng mekerang a di lungil a renguk?
Ng mekera el sebechel a profet el ngosuir a beluulechad er chelechal taem?

Sera uchelel a beluulechad, ea Dios a ulechotii a ebangkelio el mora rengelekel el lokiu e ra re profet. Ngii a kiltmeklii tiang lokiu a Ngelekel, ra Jesus Kristo. A uodel el taem, ea Jesus a ulechotii a ebangkelio el mora re profet el ua Adam, Noah, Abraham, ma Moses. Engdi te betok el chad a uletngeklii.

Erul telael rrak ra memong, ea Jesus Kristo a ulisechakl e ra ebangkelio er Ngii e kiltmeklii a Ikelesia er Ngii. A rechad mete dirrek el uletngeklii a Jesus. Nguriul e ra kodellel, e te betok a re mlo ikrii a klemerang el tekingel a Rubak ma Ikelesia. Sel mui el ebankgkelio me a klisichel a priesthood a mlo diak e ra beluulechad.

Telal rrak ruriul, e a Dios a milkedongii a tara profet, el Joseph Smith. A Dios a ulutii sel mui el cherengelel a ebangkelio lokiu er ngii e milkngerechelii meng lemuut el toketekii a Ikelesia ra Jesus Kristo.

Sel dobang a mui el cherengelel a ebangkelio ra Jesus Kristo ra beluulechad a tara kot el klou el klengeltengat er chelechal temed. A ebangkelio a ngosukid el smiik a nger el kirel a ikel chetiteuokel el tekoi ra klengar. A re ngar el profet a omekrael er kid ra omroled ra ikal chetiteuokel el taem. Sel ngerachel e ra priesthood ra Dios a mla lmuut el mera beluulechad el mei lomekngeltengat e ra rengelekel.

Uldasu el kirel a Olisechakl

Tial bades a meskid a okesiu lomekrael e ngosukau meke keltmokl el molisechakl. Ng dirrek el luldimukl e ra okesiul a ker ma ongit el tang e ke mousbech.

Mesel mongetmokl er kau el molisechakl, e moluluuch el kirir a re bekl el chad ra ikel teletael e le ngarngii ma usbechir ra reng. Mosiik el kmo ngera sel bedochel losisechakl. Mongetmokl el kirel a ikel tekoi el rechad a diak lungil mtab a belkul. Molib el kirel a kmong ua ngerang a klungel taem a mousbech er ngii, e diak ke mobes ra osisechakl el kirel di kedeb.

Msiik a bades el bom mousbech sel molsisechakl. Sel “Doctrinal Foundation” el bliongel el ngar er sel losisechakl a uldimukl ra betok el lusbechall el bades.

Momes el kmong ngera el ker a bom moker sel molsisechakl. Molib a ikel ongit el bo moldars mel sebechel lomeksemeriar ra re dertal chad me bol loltirakl.

Bo mungil smaod a ikel klengeltengat el yaksok a Dios, e mouchais e ra klaumerang er kau el kirel a suobel el molisechakl er ngii.

Ngera Sebechem el Olsisechakl el mo er a Rechad er a chelsel a Teruich me a Eim el Bung el mora Lluich me a Eim el bung

Mngiltii a imong malechub eng bebil e ra ikal llach el bom molisechakl. Sel luchetemel a suobel el kirel a ikel llach a ngarngii loeak kuriul er tial blechebechel a omesuub.

A Oubeltik el Reng el Dios a Demad er a Babeluades

A Oubeltik el Reng el Dios a Demad er a Babeluades, e kid a Rengelekel. Ngii a milebid el Lokesiul.
A Dios a ungil medengelkid e betik a rengul er kid.
A Dios a klebkall, el cherrungel a bedengel ra tech me a chiuesel.
A Dios a seual elmo omekngeltengat er kid loba budech me a mui el deurreng elmo cherechar el diak a ulebengelel.
Le Dios el betik a rengul er kid, Ngii a uldureklii a Ngelekel, ra Jesus Kristo, elmo ngubetid ra klengit ma kodall.

A Dios a Olecholt ra Ebangkelio lokiu ra re Profet ra Bekl Dauch ra Klengar

A Dios a omekedong ra re profet elmo omtechei er Ngii ra beluulechad.
A uodel el taem, ea Dios a ulemekedong ra re profet el ua Adam, Noah, Abraham, and Moses.
A ngar el profet a melai a ocholt e ra Dios el molisechakl e omekrael er kid er chelechal taem.

A Jesus Kristo me a Urerel ra Beluulechad ma Tngakireng er Ngii

A Jesus Kristo a Ngelekel a Dios.
Sera losiou ra beluulechad, ea Jesus a ulisechakl e ra ebangkelio er Ngii e kiltmeklii a Ikelesia er Ngii.
A Jesus a ulemekedong ra re teruich ma terung el Apostol e milsterir a klisiich el menguteling e ra Ikelesia er Ngii.
Sera uriul e ra klengar er Ngii, ea Jesus a milngakireng el kirel a kengtid el chilarm ra Sers ra Gethsemane me sera le Mekerus. Nguriul ra kodellel a Jesus, e Ngii a milkiis e ra kodall.
Leng tngakireng ra Jesus el milteketek, eng sebeched el bol lousubes er kid e mekikiid e ra kengtid sel douchel. Tiang a meskid a budech e kutmeklii meng sebeched el lmuut el mora medal a Dios e nguu a mui el deurreng.
E le Jesus el Milkiis ra Kodall, e kid el rokui el lmuut el mo chad e ruriul er a demad. Tia belkul a kmo a dertal chad me a reng ma bedengir a lmuut elmo dmak e di ngar elmo cherechar.

A Bosech ra Tekingel a Dios

Nguriul ra kodellir a re Apostol ra Jesus, eng mlo rengii a klou el bosech ra ebangkelio ma Ikelesia ra Jesus Kristo.
Ng mla er tial taem, e a rechad a ngilodech a betok el losisechakl e ra ebangkelio. A rechad mete dirrek el ngilodech a llechul a priesthood, el ua techolb el chelid. A klisichel a priesthood mesel Ikelesia el Jesus a kiltmeklii a mlo diak e ra beluulechad.

Olutel a Ebangkelio er a Jesus Kristo lokiu ra Joseph Smith

A Joseph Smith a mle soual mo medengei el ngera el ikelesia a merang el Ikelesia ra Dios me bol chedal. A Demad ra Babeluades ma Jesus Kristo a mlo chemolt er Ngii sera 1820. Tial teletael a lomekedong er ngii el Kot el Ues.
A Dios a milkidongii a Joseph Smith elmo profet, eldi uai Ngii sera lomekedong ra re profet ra uodel el taem.
A ebangkelio ra Jesus Kristo a mloluut lokiu ra Jospeh Smith.
A re bebil ra re ngara babeluades a mlo durech el mlo olluut e ra priesthood, e a Joseph a ngiluu a klisiich elmo meleketek e ra Ikelesia ra Jesus Kristo.
A Jesus Kristo a milemolm el lomekrael er a Ikelesia er Ngii er chelechal taem lokiu ra re ngar el profet me a re apostol.

A Babier ra Mormon: Tiang a Dirrek el Ouchais el Kirel a Jesus Kristo

A Babier ra Mormon a tara hong ra chedaol llechukl e miluches er sera uodel el taem ra re profet el ngara Merikel. A Joseph Smith a ulemult a tekoi er ngii lokiu ra sengk ma klisichel a Dios.
Ngobengkel a Bibilia, ea Babier ra Mormon a meskid a sioning ra omesiungel a Jesus, osisecheklel, ma urerel el Osebeled.
Ng sebeched elmo kmeed el mora Dios sel donguiu e ra Babier ra Mormon e doltirakl a ikel llechul.
Ng sebeched elmo medengei el kmo a Babier ra Mormon a tekingel a Dios sel donguiu er ngii, ungil lomtab er ngii, e meluluuch el kirel. Tial teletael a sebechel dirrek el ngosukid elmo medengei el kmo a Joseph Smith a mle profet.

Moluluuch elmo Medengelii a Klemerang lokiu a Chedaol Reng

A nglunguuch a eru el teletael er a cheldecheduch er a delongelel a Dios me a Rengelekel.
Ngokiu a ngara rengud el nglunguuch, eng sebeched el medengei el kmo sel isel a Mla Moluut el ebangkelio ra Jesus Kristo a klemerang.
Mesel doluluuch, ea Chedaol Reng a olsisechakl e olterkokl e ra klemerang el me rekid.

Ker el Locha Bom Moker er a Rechad

A ikal beldukl el ker a okesiu ra ikel kau a locha moker ra rechad. A ikal ker a sebechel mo ngosukau me bol ngarngii a tmolech el cheldecheduch ma ungil klaudengei ra usbechellel a chad ma osengel ra tekoi.

Ngera kou merang el kirel a Dios?
Ngerang a momelchesiu elmo ngosukau sel mkeed e ra Dios?
Ngera omodengei el kirel a Jesus Kristo? Ng mekerang a klengar er Ngii ma osisecheklel a blal ngedechii a klengar er kau?
Ng mekerang a bo betik a meral nger er chelechal taem el kmal chetiteuokel el beluulechad?
Ngerang ngmo ngosuir er kau elmo medengei el kmong ngarngii a ngar el profet er tial beluulechad er chelechal taem?
Ngarngii a tal blam rengesii el kirel a Babier ra Mormon? Ng sebecham louchais el kmo ngera meng klou a belkul?
Ng sebechem louchais ra klaumera er kau el kirel a nglunguuch? Ng sebecham el louchais ra klaumera er kemam el kirel a nglunguuch?

Ongit el Soam el Moldars

Ng sebechem lolengit ra Dios loeak a nglunguuch mel ngosukau elmo medengei el kmo a ikal bla ki molsisechakl a klemerang? (Mesa “Teaching Insights: Prayer” er sel luriul el bades er tial losisechakl.)
Ng sebechem el mora ikelesia er tial mei el Sandei me mluut elmo medengei el kirel a ikal ki blam molsisechakl?
Ng sebechem elmo menguiu ra Babier ra Mormon e meluluuch elmo medengei el kmo ngii a tekingel a Dios? (Ke locha ngmilt a klebechel el bliongel malechub a bades.)
Ng sebechem loltirakl ra okesiul a Jesus e mo metecholb? (Mesa “The Invitation to Be Baptized and Confirmed,” el ngar medal tial osisechakl.)
Ng sebeched el loterkeklii a temel a kim mluut el mei loldingel?

Uchetermel a Suobel

Tial bades a meskau a suobel ma chedaol llechukl meke mo mesuub el smisichii a klemedengei ma klaumeraer kau ra ebangkelio e mo ngosukau lolsisechakl.

A Oubeltik el Reng el Dios a Demad er a Babeluades

A Oubeltik el Reng el Dios a Demad er a Babeluades, e kid a rengelekel. Ngii a milebid Lokesiul. Ngii a mla mekebkall, el cherungel a “bedengel ra tech me a chiuesel el kmal di ua chad” (Doctrine and Covenants 130:22).

A Dios a ungil medengelkid, e Ngii a betik a renguk er kid el morsel kid a diak kede desang. Ngii a ungil medengei a ongarm el de ngarngii, klengit el reng, ma chelitechetud, e Ngii a soal lolengeseu er kid e ra ikal de chelbangel. Ngii a oldeu ra rengul e ra ungil lomeroled e mo ngosukid sel dungil melilt a tekoi. Ngii a soal el mengedecheduch er rekid, e kid a sebeched el mengedecheduch elmo re Ngii e lokiu a nglunguuch.

A Dios a mla meskid a tial blekeradel ra klengar er tial beluulechad mel sebeched el mesuub, mukeroul, e bode uai Ngii. Ngokiu ra melmalt el beltik el reng, Ngii a seual kid a deluut elmo re Ngii uriul ra demad. Ngdi, ngdiak el sebeched eldi kid a kutmeklii tiang. Le Dios el betik a rengul er kid, Ngii a uldureklii a Ngelekel, ra Jesus Kristo, el mei lolsobel er kid. “Le Dios el betik a rengul er tial beluulechad, meng nguldureklii a di tal Ngelekel, … me tial beluulechad lokiu er ngii bol sobel” (Johanes 3:16–17).

A Dios a soal lomekngeltengat er kid loba budech ma mui el deurreng el diak a ulebengelel el mo cherechar. Ngii a mla chotii a uldasu el meskid a techall elmo ngmai a ikal klengeltengat. Tial luldasu a lomekedong er ngii el kmo uldasu el lolsobel (mesa osisechakl 2).

Klaumerang el kirel a Dios

Bo modengei el kmo a chad el molisechakl er ngii ngerang ngou merang el kirel a Dios. Ngou mesind ra rechad a ou merang ra kmong ngarngii a Mesisiich el Chelid leng betok a uldasu el kirel a Chelid. Ngdi, te betok el chad a diak el bleketakl e ra uldesuir el kmong techa Dios.

Terung ra Babier ra Mormon el misionari, el Ammon ma Aaron, a ulisechakl e ra rechad el dimlak el Kristiano. Te ulisechakl a bedochel el klemerang e mle olengit ra rechad mel loluluuch. Sei a uchul, ma Lamoni ma demal a ulebult. Mosuub ra Alma 18:24–40 ma 22:4–23. E mo nger a ikal ker el ngariou:

Ngera a lulsisechakl tirkal misionariiis el kirel a teletelel a Dios?
Ke mekerang a bom moltirakl a ikel luruul?

A lmuut el lomsodel, mesa “Teaching People Who Do Not Have a Christian Background” ra bliongel 10.

Omesubel Chedaol Llechukl

Mluut el Mesuub el kirel Tial Losisechakl

Ulekrael mora Chedaol Lechukl: “Father in Heaven,” “God, Godhead”
Gospel Topics: “God the Father”

A Dios a ochotii a Ebangkelio e lokiu ra re Profet e ra Bekl el Temel a Klengar

A re Profet a Mesiungel a Dios er tial Beluulechad

A tara klou a ututelel el rael el Dios a olecholt e ra beltkil a rengul el me rkid a omkedong ra re profet, e mesterir a klisichel a priesthood, e omekrael er tir me te melekoi a tekingel. A re Profet a mesiungel a Dios er tial beluulechad. A profet ra Uodel el Renged ra Amos e dilul kmo “a Dios a diak a ngera el bo loruul, le ng di ocholt a bertelel el mora remesiungel ra re profet”(Amos 3:7). A bebil ra klengeltengat el de ngai ra re ngar el profet a beldukl er riou:

Sioning er a Jesus Kristo. A re profet a tokubets el sioning ra Jesus Kristo, el louchais el kirel el kmo Ngii a Osebeled e Okised ra kodall.

Osisechakl. A re profet a melai a ulekrael el ngara Dios el lolengeseu er kid me kede mes a klemerang ra chelebirukel. Tir ea olsisechakl er kid elmo oltirakl a lechul a Dios e mo ouchel sel bode mechitechut. Tir ea oltngakl a klengit e omeklatk el kirel a belsel.

A osisecheklir a re profet a tikeuid elmo bedul a Dios e ngosukid el ngmai a klengeltengat el Ngii a melatk el kired. A klou losebechekled a ultuil ersel doltirakl a tekingel a Rubak lokiu ra re profet er Ngii.

Klisichel a Priesthood. A profet er chelechang a btelul a priesthood er tial beluulechad. A priesthood sel ngerachel ma klisichel a Dios. A profet a obang a ngerachel el melekoi e omtechei loba ngklel a Dios el kirel osebelir a Rengelekel.

Omrolel a Ikelesia. A Ikelesia ra Jesus Kristo a dechor ra uchetemel a re profet ma re apostol (mesa Ephesians 2:19–20; 4:11–14).

A re Profet ra Uodel taem.

A Adam a mle kot el profet er tial beluulechad. A Dios a ulechotii a ebangkelio ra Jesus Kristo elmo rengii e milsang a ngerachel e ra priesthood. A Adam ma Eve a ulsisechakl ra rengelekir ra ikal klemerang e milisiich er tir elmo omkedubech ra klaumerang e bol loltirakl e ra ebangkelio.

Ngdi lorael a taem el mong ea re ngelekir a ua Adam ma Eve a mlo omtok e obult elmo cheroid ra ebangkelio. Tiang a mlo mechelii a bosech, malechub e nguleberius el remiid. Sel dubech a klou bosech, ea Dios a ngubetii sel ngerchelel a priesthood, el ngii a usbechall el kirel a dolsisechakl ma dongetmokl a ikel chedaol lureor ra ebangkelio.

A Uodel Renged a ochotii a betok el taem el ngarngii a klou el bosech. Sera lorekui er tial taem, ea Dios a mlo dersii a chimal el mora rengelekel el lomekedong ra tara profet. Ngii a ulecholt a ikel klemerang ra ebangkelio el mle beches el mor tirkal profet e milsterir a ngerachel ra priesthood. A bebil er tirkal profet a Noah, Abraham, ma Moses. Mo mekngit a rengud, leng ngosisiu el teletael sel lorael a taem el mong, ea rechad a di mirael mocha oltngakl ra re profet e uleberius el remiid.

Dmolech el Losisechakl

Reprofet

Bo modengei el kmo a chad el molisechakl er ngii a ngarngii a klaudengei er ngii ra re profet. A rechad ra ou mesind el beluu ou merang el kmo a chedaol malechub a melai a ulekrael lokiu a klebechel e uldelid el rael el mlara Chelid. Engdi, ngdiak el rokui el melai a ulekrael el chad a re profet ra Dios.

Msodii seikid el tekoi uriul ra taem ra klou el bosech, ea Dios a ulutii a ebangkelio e lokiu ra profet. Ngii a milsang ngkel profet sel ngerachel ra priesthood. Ngkel profet a ulengeseu ra rechad elmo medengelii a delongelir el mora Dios, luldimukl a lokerang a le nguu a diak a ulebengelel klengar lokiu ra ebangkelio ra Jesus Kristo.

Telutk el Temel a Beluu

A telutk el temel a ebangkelio ra Jesus Kristo a klebechel el taem e mla rengii a imong loba ngerachel el mesiungel a Rubak el ngara beluulechad e lolab a kiis e ra priesthood. A telib el luldesuel a Demad ra babeluades el lolsobel a mla mocholt eldi ungil el mora bekl telutk el temel a beluu.

Ng betok a ebangkelio ra ikel telutk el temel a beluu. Adam, Enoch, Noah, Abraham, Moses, Jesus Christ, Joseph Smith, ma rebebil a mla mtebechel ra ikel telutk el temel a beluu el le ngarngii. Sel telutk el temel a beluu el lulmuchel e ra Joseph Smith a dodengelii el “telutk el temel a beluu e ra uriul klebesei” (Efesus 1:10). Mesa Bible Dictionary, “Dispensations,” ma Guide to the Scriptures, “Dispensation.”

Omesubel Chedaol Llechukl

Mluut el Mesuub el kirel a Aika el Olisechakl

Omekrael el mora Chedaol Lechukl, “Profet
Cheldecheduch el kirel a Ebangkelio: “Prophets,” “Restoration of the Church”

A Jesus Kristo me a Urellel ra Beluulechad ma Tngakireng er Ngii

A Jesus Kristo a Ngelekel a Dios. Jesus ma Tngakireng er Ngii a melutk el kirel a uldesuel a Dios el kired. A Tngakireng er Ngii a uldimukl er Ngii el chilarem ersel Sers ra Gethsemane, me Ngii el mlo chouarm ma kodellel ra kerus, ma Okisel ra kodall.

Mesel taem ra Adam ma Eve, ea rechad a ulemes el bedul a luut ra Jesus Kristo el Losebelir e Okisir ra Kodall. A Demad ra Babeluades a uldureklii a Jesus el mera beluulechad e ra eru el telael rrak ra memong.

A Jesus Kristo a kiliei er a cherrungel, e melemalt el klengar. Ngii a ulsisechakl e ra ebangkelio er Ngii e tileketekii a Ikelesia er Ngii. Ngii a ulemekedong ra re teruich ma terung el Apostol e milsterir a ngerachel er a priesthood el mo olisechakl e meruul chedaol ruoll, el uai a techolb el chelid. Ngii a dirrek el milsterir a ngerachel elmo menguteling e ra Ikelesia er Ngii.

Sel luriul ra klengar er Ngii, ea Jesus a mlo melngakireng el kirel a kengtid e lokiu Ngii el mlo chouarem ra Gethsemane me Ngii ra le Mekerus. Le Jesus Kristo el milenget lokiu tngakikreng, eng sebeched el mekikiid ra kengtid se el bo douchel a rengud. Tiang a rulii meng sebeched el lmuut el mora medal a Dios e nguu a mui el deurreng.

Nguriul ra Jesus ra le mekerus, Ngii a milkiis e ra kodall, el mlo mesisiich e ra kodall lokiu ra klisichel a Demad ra Babeluades. Leng Ngokisel ra Kodall a Jesus, e kid el rokui elmo mekiis ra kodall luriul ra demad. Tia belkul a kmo a reng ra re bekl el chad ma bedengir a lmuut elmo dmak, e kid el rokui a di ngar elmo cherechar el cherungel el diak kede luut el mad. (Mesa “The Atonement of Jesus Christ” ra osisechakl 2.)

A Joseph Smith a ulisechakl: “Sel dodai ra ikel llach e ra klechelid er kid aikel ngara tekingir ra ikel klaumerang er a re Apostol me a re Profet, el melekoi el kirel a Jesus Kristo, el Ngii a mlad, e mildakl, e liluut el milkiis er a kodall er a ongedei el sils, e ngukokl el soiseb er a babeluades; e dirrek el bebil er a osisechakl e ra klechelid er kid a di melutk e ra diosisiu el tekoi” (Teachings of Presidents of the Church: Joseph Smith [2007], 49).

Omesubel Chedaol Llechukl

Mluut el Mesuub el kirel a A Ikal Llach

Ulekrael mora Chedaol Lechukl: “Jesus Christ,” “Atone, Atonement”
Bible Dictionary: “Atonement”
Cheldecheduch el kirel a Ebangkelio: “Jesus Christ,” “Atonement of Jesus Christ”

A Bosech ra Tekingel a Dios

Nguriul ra kodelel a Jesus Kristo, ea re Apostol er Ngii a milemolem el mengeluoleu a ikel losisecheklel a Kristo mel klikiid e lomtebechel ra Ikelesia mel klebechel a urellel. Engdi, te betok el chedal a Ikelesia a mlo iklterir a re Apostol ma ikel suobel el Jesus a ulisechakl.

Nguriul ra le mad a re Apostol, e mlo rengii a klou el bosech ra ebangkelio ma Ikelesia ra Jesus Kristo. Tial bosech a bebil ra taem e tomekedong er ngi el kmo Klou Bosech ra Tekingel a Dios. Leng tiakid ea uchul, ma Dios a ngiluu sel ngerachel ra priesthood er tial beluulechad. Tial kereor a mlo uldimukl er ngii sel ngerachel el lusbechal el lomtebechel e ra Ikelesia. Meng uaisei, mesel Ikelesia el Jesus a kiltmeklii a mlo diak er tial beluulechad.

Meng ngulkiu er tial taem, e a rechad a ngilodech a betok el losisechakl e ra ebangkelio. Ng betok e ra ikel klaudengei el kirel a meral blekerdelel a Demad ra Babeluades, Jesus Kristo, ma Chedaol Reng a milngodech malechub eng ririid. A rechad a dirrek el ngilodech a chedaol lureor ra priesthood, el ua techolb chelid.

Betok el rrak e luriul, ea rusiik a klemerang el redil ma re sechal a milasem elmo mengederodel a ikel losisechakl ma omeruul el milngodech. Te ulsiik a lmuut el llomes ra reng, ea re bebil a dirrek el misaod ra usbechelel a olutel a klemerang. A ikal lurerir a milkdebechii a mlo chelchad ra betok el klechelid.

Tial taem a mlo rengii a klou el lomsodel a llemeltel a klechelid, el ngii a milsa sel techall el kirel olutel a ebangkelio ra klemerang ma ngerachel loba Dios.

A re profet ma re apostol a ulemlauch el kirel tial bosech ra tekingel a Dios (mesa 2 Thesalonika 2:1–3). Te dirrek el lulemlaoch el kmo a ebangkelio ma Ikelesia ra Jesus Kristo a lmuut el mei ra beluulechad (mesa Rellir 3:20–21). A le dimlak a bosech ra tekingel a Dios, ea olutel a dimlak a usbechelel.

Dmolech el Losisechakl: Bosech ra Tekingel a Dios

Molsisechakl ra rechad el kirel sel bosech ra tekingel a Dios el delbodeb el lokiu ra deruchelel tekoi lodengei ma klengar er tir. Molngeseu er tir elmo medengelii a usbechelel sel Lolutel a ebangkelio ra Jesus Kristo.

A ikel Meklou el Tekoi el Locha Bom Molisechakl

Ngoumesind ra rechad a ulektngakl e ra Jesus Kristo ma re Apostol er Ngii (mesa Mateus 24:9; 1 Nephi 11:32–34; 2 Nephi 27:5). Nguriul ra kodelir a re Apostol, ea priesthood a mlo diak er tial beluulechad. Ng mlo diak a ngerachel el kirel a techolb chelid malechub el lomekrael ra Ikelesia.
Sel Mesisiich el beluu ra Rom, e ra uchelel a ulemekcharem ra re Kristiano, ea uriul e te mlo Kristiano. A meklou el ker el kirel a klechelid a silmechokl e lokiu a klautitekangel e ra chelechad ra bai le mengai ra ocholt el mlara Dios. A llach ma chedaol lureor a lultitekangel el kirel e milngodech elmo oltirakl a uldasu ra beluulechad. A loumerang, malechub eng lechukl ra loumerang, a milketmokl el lultuil ra uldesuir a ikel chelchad (mesa Joseph Smith—History 1:19).
A bebil re rechad a milasem el melodech ra kle Kristiano el mengeuid a ikel di mla ngarngii. Engdi, leng ngerachel ra priesthood ra Dios el diak el ngara beluulechad, ea olutel a ngerachel ma klemerang a mle usbechall el lmuut el toketekii a Ikelesia ra Jesus Kristo.

Omesubel Chedaol Llechukl

2 Nephi 28
Mateus 24:9–11
Rrellir 20:28–30
Galatia 1:6–9
2 Thesalonika 2:1–12 (Joseph Smith Translation, bades 2, 3, 7–9)
2 Timothy 4:3–4
2 Petrus 2:1–2
Amos 8:11–12

Mluut el Mesuub el kirel a A ikal Olisechakl

Ulekrael el mora Chedaol Lechukl, “Bosech”
Ulkekrael el Cheldecheduch: “Bosech ra re Mle Kot el Kristiano ra Ikelesia”
Cheldecheduch el kirel a Ebangkelio: “Bosech”

Olutel a Ebangkelio er a Jesus Kristo e lokiu ra Joseph Smith

Sel Kot el Ues me a Okodongel a Joseph Smith el Profet

Ma ikel rrak e ra memong er sera le mui a cherengelel a ebangkelio ra Jesus Kristo melak el ngara beluulechad, ea Demad ra Babeluades a milemolem el lolengeseu ra re ngelekel. Lorael a taem el mong, Ngii a kiltmeklii a rael mel sebecherir el lmuut el mukngeltengat e loba mui el cherengelel a ebangkelio er Ngii. Sel ra le tabesul a rokui el tekoi, Ngii a milkodongii a Joseph Smith el profet el bo lokiu er ngii ea ebangkelio me a Ikelesia ra Jesus Kristo a moluut.

A Joseph Smith a kiliei ra ongos e ra Merikel ra taem el ngarngii a klou el tekingel a klechelid. A rechad e ra blil a mle mesisiich el loltirakl e ra Dios e osiik a klemerang. Betok el klechelid a melekoi el kmo tir ea oba klemerang, ea Joseph a mle soual elmo medengei el ngera er tir a klemerang (mesa Joseph Smith—History 1:18). A bibilia a olisechakl el kmong “imong a Rubak, imong a klaumerang, imong a techolb chelid” (Efesus 4:5). Me a Joseph el lomais el ngara kakerous el klechelid, ng mlo rau a rengul ra kmo ngera rengii a bol chedal. Nguriul eng melekoi:

“Ng di kmal mle klou a rraureng me a nglemuu er a ikal kakerous el klechelid, meng mle meringel er a ngeasek el chad el uai ngak … el dirkak a kmal ngera el bo kudengei el kirel a betok el tekoi, el mo sebechek el melilt el kmo ngera klemerang e ngera diak. …

“Meng klautitekangel ma nglemuu ra tekoi me a uldasu, e ak mlo melbedebek: Ngera kirel ketmekiil? Ngera er a ikang a klemrang; ma lechub, e ngii el rokui el diak el klemerang? Alsekum a ta er ngii a klemerang, e ngera er ngii, e mekera bo kudengei?” (Joseph Smith—History 1:8, 10).

Meng di ua re bekl chad, a Joseph Smith a dirrek el mla rengii a keril el kirel a osebelel a delebengel. Ngii, a seual a kngtil a lousubes e bol klikiid ra medal a Dios. Meng ngulsiik e ra klemerang ra ikel kakerous el klechelid, e chiliuii ra chelsel a Biblia el kmo, “A le ngarngii er kemiu a olngesonges er a llomeserreng, e lolengit er a Dios, me le bsang, e le ngungil a tekingel; e diak a lekiresii er a ngii dil chad ” (James 1:5).

Le ngulkiu er tial bades, e a Joseph a milatk a mo oker ra Dios el kmo ngmo mekerang. Sera spring ra 1820, eng mlora klou el oreomel el kmeed ra blil e mlo tubareuach e meluluuch. Ngarngii a eua el tekoi el kirel sel ues ra uriul, el blel rekord er ngii a Joseph Smith malechub eng tirkel miluches el loureor el morngii (mesa Babier ra Cheldecheduch el kirel a Ebangkelio, “Blekeradel ersel Kot el Ues”). Ngara llechukl el mlamo terkokl el chedaol lechukl, eng milsaud ersel blekeradel el ua tiang:

Sel Kot el Ues, mlara Linda Christensen ma Michael Malm

“Ak milsang a llomes er bebul a bdeluk, el kuk mellomes er a dichel a sils, el mekekokil metengel el mei er ngak. … Ma le mermang er ngak a llomes e ak milsterir a re terung el chad, el llomes ma klebkall lobang a diak a ngii di el ngerang el smodii, e dilechor er a melaongel. A ta er tir a milngedecheduch er ngak, el ulemekedong ra ngklek, e melutk ra chimong—Ngika Betik ra Renguk el Ngelekek el Sechal. Mrengesii!” (Joseph Smith—History 1:16–17).

Ngar tial ues, ea Dios el Chedam ma Ngelekel el, Jesus Kristo, a mlo chemolt e ra Joseph Smith. A Osobel a diluu er ngii mel lak el bol chedal a ngidil ra ikel ikelesia.

Ma kuk tara cheldechedechal tial ues, ea Joseph a uluchais el Osobel a dirrek el silbedii: “A kengtim a bla kusubes. … Momes, Ngak a Rubak er a klebkall. Ngak a mlad el kirel a beluulechad me tirkel rokui loumerang er a ngklek a mo nguu a Diak a Ulebengelel klengar.”

A uriul ersel ues, ma Joseph milebedebek, “A delebengek a mlo mui ra beltik el reng, e mlo betok el sils eng sebechek loldeu ra renguk loba klou el deurreng e a Rubak a diobengkek” (Joseph Smith History, circa Summer 1832, 3, josephsmithpapers.org; ousbech a spelling ma punctuation er chelechal taem).

Ngokiu er tial ues, ea Joseph Smith a mlo sioning ra Jesus Kristo e siluub a meklou el klemerang el kirel a Godhead. El uai tiang, ngii a mlo medengei el kmo a Demad ra Babeluades ma Jesus Kristo kakerous el chad. Sera lomekedong er ngii ra ngklel, eng mlo medengei el kmo Tir a ungil el medengelii. Sera Joseph ra le sbedii el kmo ng mla usubes er ngii, eng mlo medengei el kmo a Dios a ubechubechad. Tial blekeradel a mlo mui ra rengul ra deurreng.

Ma Dios el mla uedikel lobengterir re betok el profet ra uchelel, Ngii a milkedongii a Joseph Smith elmo profet e mokiu er ngii ea mui el cherengelel a ebangkelio a moluut el mera beluulechad. Tial moluut a mo ngosuterir a rengelekel a Dios e metik a deurreng er tial beluulechad mesel merael mei el beluulechad el diak a ulebengelel klengar—el rokui el koiu ra Jesus Christ.

Olutel a Priesthood ma Kiis ra Priesthood.

Ngokiu er Kemiu a re Keldemek el Mesiou, mlara Linda Curley Christensen ma Michael Malm

Nguriul ra bol duum a Demad ma Ngelekel, ea re bebil ra re oderuchel ra babeluades a mlora Joseph Smith me a keldemel ra Oliver Cowdery. A Johanes el Techolb a mlo duum el mla mekiis e ra kodall e ulterkeklii a Aaronic Priesthood ma ikel kiis elmo er tir. A Aaronic Priesthood a uldimukl ersel ngerachel el melcholb.

Sel Ngor er a Petrus, Jakobus, ma Johanes, mlara Welden C. Andersen

Me a uriul, a Petrus, Jakobus, ma Johanes—tedei el mle kot el Apostol ra Kristo—a dilum el mla mekiis ra kodall el chad e ulterkeklii sel Priesthood ra Melchizedek ma ikel kisel ra Joseph Smith ma Oliver Cowdery. Tial Priesthood sel losisiu el ngerachel el Kristo a ngiluu mesterir a re Apostol er Ngii ra uodel el taem.

Image of Moses Elias and Elijah descending into the Kirtland temple and appearing to Joseph Smith.

Ngara chelsel a Templo ra Kirtland, ea Moses, Elias, ma Elijah a mlo duum ra Joseph Smith ma Oliver Cowdery e ulterkokl elmo er tir a lmuut el bebil ra ngerachel me kiis ra priesthood el kirel mo mengetmokl a urellel a Dios ra uriul klebesei. A Moses a ulterkokl a ikel kiis elmo mengudel ra Israel. A Elias a ulterkokl e ra urellel a ebangkelio ra Abraham. A Elijah a mlolterkokl a ikel kiis ra klisiich el lomak. Mesa Doctrine and Covenants110:11–16 ; dirrek el mesaGeneral Handbook, 3.1.)

Cheldelel a Ikelesia

A Joseph Smith a ngiluu a ngerachel elmo mengudel e ra Ikelesia er a Jesus Kristo el luuetang el mei er a beluulechad. Ngokiu ngii, ea Jesus Kristo a omekedong er a re teruich me a terung el Apostol.

A re profet ersel taem ra bibilia a ulemekesiu el kirel a taem el kid a kiei er ngii er chelechnag el kmong nguriul el klebesei. Ngii ea taem eldi kmedung ruchei ra Ongerung Lemei a Jesus Kristo. Sei ea uchul ma Ikelesia a ulengakl el Ikelesia ra Jesus Kristo ra Uriul-klebesei el Santo (mesa Doctrine and Covenants 115:3–4; mesa el dirrek 3 Nephi 27:3–8).

Re Ngar el Profet ma re Apostol er Chelechal Taem

Eldi uai ea Jesus lulmekedong ra re Apostol ra temel mesiou e lomtebechel ra Ikelesia er Ngii, Ngii a mla mekedong ra re Apostol elmo mtebechel er ngii er chelechal taem. A Kot el Presidency me a Cheldebechel ra re Teruich ma terung el Apostol a re profet, omlauch, e melai ocholt.

Ngdi ngkel ngarbab el Apostol a mokedong elprofet le ngii ea mengederedel er tial rokir el Ikelesia e di ngiltang a oba ngerachel el mengedecheduch el mora Rubak. Ngii ea obang a ngerachel el lomtechei ra Joseph Smith. Ngii me tirkel ngarngii el Apostol a omdelid a ngerachel lolab el mora Jesus Kristo el diak le mekimd el ngerachel el mlo terkokl el lulmuchel sera Joseph Smith ra bol moterkokl lokiu a imorir a re mlo durech ra babeluades.

Omesubel Chedaol Llechukl

Mluut el Mesuub el kirel a A ikal Olisechakl

Ulekrael mora Chedaol Lechukl: “Restoration of the Gospel”
“Olutel a Cherrengelel a Ebangkelio er a Jesus Kristo: Erul Dart el Rak el Chais el mo er a Beluulechad”
Cheldecheduch el kirel a Ebangkelio: “Restoration of the Church,” “Restoration of the Priesthood”

A Babier er a Mormon: Tiang a Dirrek el Louchais el Kirel a Jesus Kristo

A Babier ra Mormon a hong ra chedaol lechukl ra eldi ua Bibilia. A Bibilia a tara sioning ra Jesus Kristo, e a Babier ra Mormon a ongerung el sioning el kirel Ngii ra losiou, osisecheklel, ma urerel el Ngii a Osobeled.

A Joseph Smith a mlukrael ra oderuchel ra babeluades el ngklel a Moroni el mora ked el mla rengii a uodel el rekord el delakl er ngii el mlamo meketeket. Tial rekord, el chelduib e ra kolt el blatong (meliliut el lel a deel), a ngarngii a luluches a re profet el kirel a urellel a Dios el mortirkel chad er sera uodel taem ra Merikel. A Joseph Smith a uleiuid a tekoi er tial tial rekord lokiu ra sengk ma klisichel a Dios.

Tirkel profet er tial Babier ra Mormon a mle medengelii sel lurellel a Jesus Kristo me tulsisechakl e ra ebangkelio er Ngii. Nguriul ra Jesus ra le bekiis ra kodall, Ngii a mlo duum el mo er tirkal chad e milesiou elmo er tir. Ngii a ulsisechakl er tir e tilketekii a Ikelesia er Ngii.

A Babier ra Mormon a ngosukid elmo kmeed ra Dios sel dosuub, e omtab, e meruul a ikal dosuub. A Profet Joseph Smith a dilul kmo “a sechal [malechub a redil] a sebechel mo kmeed e ra Dios sel loltirakl a ikel tekoi er tial [babier] ra ikel kuk bebil ra babier” (Teachings: Joseph Smith, 64).

Sel mo medengei el kmo a Babier ra Mormon a meral tekingel a Dios, eng kired el menguiu er ngii, omtab er ngii, e meluluuch el kirel. A re profet er a Babier ra Mormon a yaksok el kmo a Dios a mochotii a klemerang er tial babier el me rekid sel doluluuch el ngara rengud, loba blak el reng, me a klaumerang el ngara Kristo (mesa Moroni 10:3–5). Mesuub e ra Babier ra Mormon a orechudel el kirel a dolemolem el ngara bult.

Mesel donguiu ra Babier ra Mormon e meluluuch el kirel, e kede subii a klemerang el kirel a Jesus Kristo meng mukngeltengat a klengar e rkid. Kede dirrek elmo medengei el kmo a Joseph Smith a mle profet ra Dios ea ebangkelio ma Ikelesia ra Jesus Kristo a mla moluut el lokiu er ngii.

“Ak yaksok el kmo sel moluluuch el mesuub er a Babier er a Mormon er a bek el sils,, e kemiu a mo meruul a ungil telbiil er a—bek el sils. Ak yaksok er kemiu el kmo sel momdasu el kirel a ikel mosuub, e a mado er a babeluades a mo obok, e kemiu a mo ngmai a nger lokor kermiu me a omrollel a klengar er kemiu. Ak yaksok el kmo sel bekl el sils me monguiu ra Babier ra Mormon, e kemo mesisiich e ra ikel mekngit ra bekl el sils” (Russell M. Nelson, “The Book of Mormon: What Would Your Life Be Like without It?” Liahona, Nov. 2017, 62–63).

Dmolech el Losisechakl

Mochotii a Babier ra Mormon el mora Rechad

Sel molecholt ra Babier ra Mormon el mora rechad, e msodii el kmo ng chedaol el rekord er a delongelel a Dios ma rebebil ra rechad ra uodel taem ra Merikel el mlo ngelakl ra tal telael el rrak. Ngokiu ngii e kede suub a betok el kirel a klengar er kid er chelechal taem.

Msodii el kmo a moktek e ra Babier ra Mormon a mo mult a uldesuir a rechad elmo medengei el kmo a Jesus ea Kristo (mesa sel title page). El uai sel lechukl er ngii el kmo, tial babier a “ tara sioning ra Jesus Kristo.” Yaksok ra rechad el kmo te sebecherir elmo ungil medengelii a Osebelir sel longuiu er ngii.

Sel mo mesterir a rechad a lecheklel a Babier ra Mormon, e mduu er tir el kirel sel klisichel a reng el bla mnguu el mera klengar er kau. Mouchais ra imong malechub eng erul bades el ngarngii a belkul lekor kau malechub eng klou a belkul elmo er tir. Sel dil kau ma kuk ngkel keldemem e mosuub, ea Reng a mo ngosukau el smiik a bades el sebechel melisiich e ra rechad.

Mo meksemeriar ra rechad me bol longuiu ra Babier ra Mormon ra bekl el sils. Sel longuiu er ngii e lousebech a ikel llechul, e temo ngeltengat e melchesaur el kmeed ra Dios.

A Babier ra Mormon a Oterkeklii a Klemerang ersel Lolutel a Ebangkelio

Ke locha mousbech e ra tekoi el uai a ikal beldukl el molngeseu ra rechad elmoi medengei el mekerang a Babier ra Mormon a lolterkokl e ra klemerang el kirel Olutel a ebangkelkio ra Jesus Kristo:

“Tial Babier ra Mormon a tara rolel ea Dios a mla terkeklii el me rengak er a klemerang e ra ikal tekoi el bla de chedecheduch. Ng sebechem elmo chemuiu a ikel lerul ngara ulebengelel a ikel lechukl el lomsodel kirel tial babier?

Msodii a belkul a tara ikel luldasu el ngara ikal lerung el lechukl. Molengit er tirkel molisechakl er tir me bol longuiu a telkib ra Babier ra Mormone bo loltirakl a ikel llach el ngara ikal lechukl. Sel lochesuar ra reng ma klemerang el kirel Babier ra Mormon, e temo sebecherir el medengei el kmo a Joseph Smith a mle profet e ra Dios.

Omesubel Chedaol Llechukl

Uchelel a dai er a Babier er a Mormon
Omsodel el kirel a Babier ra Mormon, paragraphs 1–7
Moroni 10:4–5
Doctrine and Covenants 1:17–23; 20:1–12
Joseph Smith—History 1:27–62

Mluut el Mesuub el kirel a A ikal Olisechakl

Ulekrael el kirel Chedaol Lechukl: “Book of Mormon”
Cheldecheduch el kirel Ebangkelio: “Book of Mormon”

Moluluuch elmo Medengelii a Klemerang e lokiu ra Chedaol Reng

Leng Dios el Demad, Ngii a mo ngosukid elmo medengelii a klemerang. Kid a sebeched elmo medengelii sel isel a Olutel a ebangkelio ra Jesus Kristo a klemerang sel donguiu e ra Babier ra Mormon e meluluuch el mora Dios. Sel doluluuch e loba klaumerang e meral ngara rengud, Ngii a mo nger a kerid e mekrolid ra klengar er kid.

A Dios a blechoel longer a nglunguched lokiu ra Chedaol Reng. Mesel doluluuch, e a Chedaol Reng a olsisechakl e olterkokl e ra klemerang. A longedecheduch a Chedaol Reng a kot el mesisiich. Ng blechoel el mei el chelellakl e olterkokl lokiu sel dolchesuar, uldesued, ma domtab (mesa1 Kings 19:11–12; Helaman 5:30; Doctrine and Covenants 8:2).

A mekedekudem lomesubel a chedaol lechukl (tokuni a Babier ra Mormon), ngara bekl miting ra sakrament, e meluluuch loba blak el reng a ngosukid elmo melchesuar ra klisiechel a Chedaol Reng e mo metik a klemerang.

Dmolech el Losisechakl

Nglunguuch

Eldi ua Joseph Smith, te betok elchad a osiik a nger el kirel a meklou a belkul el ker ma kirel a metik e ra Dios. Mouchais el mekerang a nglunguuch a mla ngosukau elmo kmeed e ra Dios. Mouchais el mekerang a ke mla ngmai a nger ma ulekrael lokiu omesuub ma nglunguuch.

msodii el kmo a nglunguuch a erung el rael el mora Dios. Molengit er tirkel molsisechakl er tir me lolengit ra Dios mel ngosuterir e lomekrael er tir. Olengit ra rechad me loluluuch a tara kot el klou a belkul el ongit el sebechem lodersii. Mesel ngai a nger, e temo medengei el kmo te ngelekel a Dios el betik a rengul er tir e Ngii a molngeseu er tir.

Te betok er tirkel chad el molsisechakl er tir a diak el meduch el meluluuch. Ngungil techall el kau a molsisechakl er tir el mesuub el meluluuch e ngmai a ikel klengeltengat e ra omeluluuch el mera klengar er tir. A nglunguuch e a rolel e kede nguu a sioning er kid ra ikel klemerang el kirel a reng.

Molsisechakl e ra rechad el kmo a nglunguuch a ngarngii a ikakid el blechebechel:

Mo muchel el dulii a ngklel a Demad ra Babeluades.
Mdung a ikel tekoi el ngara rengum, el ua omereng el saul el kirel a ikel klengeltengat el mngilai.
Moker, molengit me lomekrael, e molengit a ikel klengeltengat el mousbech.
E morekui ra nglunguchem el kmo, “El loba ngklel a Jesus Christ, amen.”

Molengit ra rechad elmo meluluuch sel longuiu ra Babier ra Mormon mel ngosuterir elmo medengei el kmo tiang a tekingel a Dios louchais el kirel a Jesus Kristo.

Sel moilisechakl e ra rechad elmo meluluuch, e mousbech a beot el tekoi mesel bol loluluuch el sebechir el dirrek el lousbech sel loluluuch. Dil mekekedeb a ikal nglunguuch.

Msiotai er ngkal chad el molisechakl er ngii me bo loluluuch ersel bol merek a omesuub. Mouchais el kmo a Dios a remenges e onger a nglunguched.

Meral Ngara Rengud

Menguiu e loba blak el reng a belkul a kmo ke kongei el moltirakl a ikel suobel e ousbech e ra klengar ra bekl el taem. Meluluuch el meral ngara rengud a belkul a kongei elmo uedikel el kirel a ikel nger el de ngai e ra Dios.

Omesubel Chedaol Llechukl

Moroni 10:3–5
Alma 5:45-46
Doctrine and Covenants 8:2–3
Johanes 14:26
Omsodel el kirel a Babier ra Mormon, paragraphs 8–9

Mluut el Mesuub el kirel a A ikal Olisechakl

Ulekrael el kirel Chedaol Lechukl: “Prayer”
Bible Dictionary “Prayer”
Cheldecheduch el kirel a Ebangkelio: “Prayer”

Kedeb el mora Telkib el Kemanget el Lecheklel a Suobel

A ikal mo rengii el lechukl a okesiul a ikel locha bom molsisechakl el mora tara chad alsekum meng di kedeb el taem a mobang. Sel mousbech er tial lechukl, e mngiltii a imong malechub eng betok el llach el bo molsisechakl. Sel dodai ra suobel el kirel a bek el llach a nagr rengii ersel uchelel a osisechakl.

Mesel molisechakl, e moker a ker e morenges. Modars a ongit el mo ngosuterir a rechad el mesuub el kmo te mekerang a bol keed ra Dios. A tara klou a belkul el ongit a mo rengkel chad me mluut el mesang. A klemengtel sel suobel a mo ultuil ra ker el kau a moker mesel kau el lorenges.

Ngera Sesbechem el Olisechakl el mo er a Rechad er a chelsel a edei el mo er a teruich el bung

A Dios a Demad er a Babeluades, e Ngii a ulemeob er kid el di uai a blebelel. Ngii a medengelkid e betik a rengul er kid. Ngii a soual elmo omekngeltengat er kid loba budech me a mui el deurreng el diak el bol kngemd elmo cherechar.
A Jesus Kristo a Ngelekel a Dios. A Urerel a mo rulii meng mo sebeched elmo klikiid e ra kengtid, mo mesisiich er a kodall, e nguu a diak a ulebengelel klengar.
A Dios a omekedong ra re profet elmo omtechei er Ngii er tial beluulechad. Sera uodel el taem, Ngii a ulemekedong ra re profet el ua Adam, Noah, Abraham, ma Moses. A ngar el profet a melaiu a ocholt ra Dios el molisechakl e oumekrael er kid er chelechal taem.
Sera le temel a Jesus el mesiou, Ngii a kiltmeklii a Ikelesia er Ngii. Nguriul ra le mad a re Apostol ra Jesus, eng mlo rengii a klou bosech ra ebangkelio ma Ikelesia ra Jesus Kristo. A rechad a ngilodech a betok losisechakl ra ebangkelio ma chedaol lurellel a priesthood, el ua techolbechelid.
A Dios a milkodongii a Joseph Smith elmo profet, eldi uai Ngii el lulmekedong ra re profet er sera uchelel a taem. A Demad ra Babeluades ma Jesus Kristo a mlo duum er ngii. A ebangkelio ra Jesus Kristo a mloluut lokiu er ngii.
A Babier er a Mormon a chedaol llechukl. Meng di uai ea Bibilia, eng tekingel a Jesus Kristo e ngosukid elmo kmeed e ra Dios sel dorul el kirel e dosbech a ikel lechul. A Joseph Smith a uleiuid er ngii lokiu ra sengk ma klisichel a Dios.
Ngokiu ra ngara rengud el nglunguuch, eng sebeched el mengedecheduch el mora Dios. Kid a sebeched el mo medengei el kmo sel klumech ra Olutel a ebangkelio ra Jesus Kristo a klemerang.